Read Mokanda na Bomoi Banzembo 66 Bible Online

Banzembo 66 - Mokanda na Bomoi bible

Banzembo 66

¹Wuta na buku ya mokambi ya bayembi. Nzembo. Bino bato ya mokili mobimba, bobetela Nzambe maboko !

²Boyemba banzembo ya lokumu mpo na nkembo ya Kombo na Ye, bopesa lokumu na Ye nkembo.

³Boloba na Nzambe : « Tala ndenge nini misala na Yo ebongi na kobanga yango ! Mpo na nguya monene na Yo, banguna na Yo bakomi koluka kokoma baninga na Yo.

⁴Mokili mobimba efukamaka liboso na Yo ; bayembaka mpo na lokumu na Yo, basanzolaka Kombo na Yo. »

⁵Boya kotala misala ya Nzambe ! Misala na Ye ya minene mpo na bana ya bato ebongi na kobanga yango.

⁶Abongolaki ebale monene mabele ya kokawuka ; bakatisaki ebale na makolo ekawuka. Tozali kosepela kati na Ye.

⁷Na nguya na Ye, akonzaka mpo na libela ; miso na Ye ekengelaka bikolo. Tika ete batomboki batombokela Ye te.

⁸Bino bikolo, bopambola Nzambe na biso ! Bosala ete lokito ya masanzoli na Ye eyokana !

⁹Asalaka ete totangama kati na bato ya bomoi. Abatelaki makolo na biso mpo ete tokweya te.

¹⁰Pamba te, Nzambe, omekaki biso, olekisaki biso kati na moto ndenge basalaka mpo na palata.

¹¹Okangaki biso kati na motambo ; otiaki mikumba ya kilo, na baloketo na biso.

¹²Otikaki moto komatela biso na moto. Tolekaki kati na moto mpe kati na mayi, mpe obimisaki biso kati na yango mpo na komema biso na bofuluki.

¹³Nakokota kati na Ndako na Yo, nakomemela Yo makabo ya kotumba, nakokokisa bandayi na ngai epai na Yo.

¹⁴Bandayi oyo bibebu na ngai moko etatolaki mpe monoko na ngai elobaki na tango nazalaki kati na pasi.

¹⁵Lokola bambeka ya kotumba, nakobonzela Yo banyama minene, bameme elongo na bambeka ya malasi ; nakobonzela Yo bangombe mpe bantaba ya mibali.

¹⁶Bino nyonso oyo botosaka Nzambe, boya koyoka ! Nakoyebisa bino makambo oyo asali mpo na bomoi na ngai.

¹⁷Nabelelaki Ye na monoko na ngai, mpe lolemo na ngai ekumisaki Ye.

¹⁸Soki nazalaki na masumu kati na motema na ngai, Nkolo alingaki koyoka ngai te.

¹⁹Nzokande, Nzambe ayokaki ngai, ayokaki na bokebi libondeli na ngai.

²⁰Tika ete Nzambe akumisama ! Aboyaki te koyoka libondeli na ngai mpe kotalisa ngai bolingo na Ye.