Read Mokanda na Bomoi Banzembo 68 Bible Online

Banzembo 68 - Mokanda na Bomoi bible

Banzembo 68

¹Wuta na buku ya mokambi ya bayembi. Nzembo ya Davidi. Loyembo.

²Soki Nzambe atelemi, banguna na Ye bapalanganaka, mpe bayini na Ye bakimaka mosika na Ye.

³Liboso ya Nzambe, bato mabe bakufaka, ndenge milinga elimwaka, mpe mafuta enyangwamaka na moto.

⁴Liboso ya Nzambe, bato ya sembo basepelaka, batondaka na esengo.

⁵Boyembela Nzambe, boyemba banzembo mpo na lokumu ya Kombo na Ye. Bofungola nzela mpo na Ye oyo atambolisaka mampinga na Ye kati na esobe. Kombo na Ye ezali Yawe. Botonda na esengo liboso na Ye.

⁶Kati na Ndako na Ye ya bule, Nzambe azali Tata ya bana bitike, mpe molobeli ya basi bakufisa mibali.

⁷Nzambe apesaka libota epai ya bato oyo bavandaka bango moko, abimisaka bakangami wuta na minyololo ; kasi batomboki batikalaka na mabele ekawuka.

⁸Oh Nzambe, tango obimaki liboso ya bato na Yo, tango otambolaki na esobe,

⁹mabele eninganaki, likolo mpe esopaki mayi liboso ya Nzambe, Nzambe ya Sinai ; liboso ya Nzambe, Nzambe ya Isalaele.

¹⁰Nzambe, osopaki mvula ya mapamboli, olendisaki libula na Yo mpo ete elembaki.

¹¹Oh Nzambe, bato na Yo bavandaka na mokili oyo obongisaki, na boboto na Yo, mpo na mobola.

¹²Na liloba moko kowuta na Nkolo, basi oyo bamemaka sango basangani bato ebele,

¹³bakonzi ya mampinga bakimi, bapoti mbangu, mpe mwasi oyo atikali na ndako akaboli bomengo ya bitumba.

¹⁴Boni, bokokoba kolala pongi kati na bandako na bino ? Mapapu ya ebenga ezipami na se ya palata, mpe bansala na yango ezipami na se ya wolo.

¹⁵Tango Nkolo-Na-Nguya-Nyonso abenganaki kuna bakonzi, anokisaki mvula ya pembe na ngomba Tsalimoni.

¹⁶Ngomba ya Bashani, ngomba ya Nzambe ; ngomba ya Bashani, ngomba ya basonge ebele,

¹⁷mpo na nini ozali kosala zuwa, ngomba ya basonge ebele, ngomba oyo Nzambe asepelaka kovanda ? Nzokande Yawe akovanda kuna libela na libela.

¹⁸Motango ya bashar ya Nzambe ezali ebele, koleka minkoko ; Nkolo azali kati na yango, kuna na Sinai, kati na Esika ya bule.

¹⁹Yawe Nzambe, tango omataki na likolo, omemaki bakangami, ozwaki makabo epai ya bato, ata epai ya batomboki, mpo ete okoma kovanda kuna.

²⁰Tika ete Nkolo akumisama, mokolo na mokolo ! Nzambe Mobikisi na biso alataka makambo na biso.

²¹Mpo na biso, Nzambe yango azali Nzambe oyo abikisaka ; mpe bikuke ya kufa ezali ya Nkolo Yawe.

²²Solo, Nzambe apanzaka mito ya banguna na Ye, oyo batambolaka kati na bomoi ya masumu, oyo mito na bango etonda na suki.

²³Nkolo alobi : « Wuta na Bashani, nakomema bango ; wuta na mozindo ya ebale monene, nakomema bango,

²⁴mpo ete opanza lokolo na yo kati na makila, mpe mpo ete lolemo ya bambwa na yo ezwa eteni na yango. »

²⁵Oh Nzambe, bazali komona ndenge ozali koya ; koya ya Nzambe na ngai, ya Mokonzi na ngai, kati na Esika ya bule.

²⁶Bayembi bazali liboso ; sima na bango, bato oyo bazali kobeta mandanda ya basinga kati na bilenge basi oyo bazali kobeta bambonda ya mike.

²⁷Bopambola Nzambe kati na mayangani, bopambola Yawe wuta na etima ya Isalaele.

²⁸Kuna, Benjame, leki ya suka, azali kotambolisa bakambi ya Yuda elongo na mampinga na bango, bakambi ya Zabuloni mpe ya Nefitali.

²⁹Nzambe na yo apesi mitindo epai ya makasi na yo ; zala makasi. Nzambe, osaleli biso penza makambo.

³⁰Wuta na Tempelo na Yo ya Yelusalemi epai wapi bakonzi bamemelaka Yo makabo,

³¹bengana ngando oyo ebombami kati na matiti, lisanga ya bangombe ya mibali elongo na bana ngombe ya bikolo oyo batambolaka kati na mbongo ya bibende ya palata, mpe panza bikolo oyo basepelaka na bitumba.

³²Bazwi bakobimela na Ejipito ; bato ya Kushi bakoya na lombangu, bakotombola maboko epai ya Nzambe.

³³Bino, babokonzi ya mabele, boyembela Nzambe ; boyemba banzembo mpo na lokumu ya Nkolo !

³⁴Boyembela Ye oyo atambolisaka mampinga kati na likolo, likolo ya libela ; oyo, wuta na mongongo na Ye, agangaka makasi.

³⁵Bosakola ete nguya ezali ya Nzambe oyo nkembo na Ye ezali na Isalaele, mpe nguya na Ye ezali kati na mapata.

³⁶Nzambe, wuta kati na bisika na Yo ya bule, obongi na botosi ! Nzambe ya Isalaele apesaka na bato na Ye makasi mpe nguya. Tika ete Nzambe akumisama !