Read Mokanda na Bomoi Banzembo 69 Bible Online

Banzembo 69 - Mokanda na Bomoi bible

Banzembo 69

¹Wuta na buku ya mokambi ya bayembi. Nzembo ya Davidi : ezali ya koyemba lokola « lisi. »

²Nzambe, bikisa ngai, pamba te mayi ekomi na kingo na ngai.

³Nazali kozinda na potopoto, na mozindo makasi epai wapi eloko ya kosimba ezali te ; nakiti na mozindo ya mayi, mbonge ememi ngai.

⁴Nalembi nzoto likolo ya kobelela lisungi ; mongongo na ngai ekawuki, miso na ngai elembi mpo na kotalela Nzambe na ngai.

⁵Bato oyo bayinaka ngai na kozanga tina bazali ebele koleka motango ya suki ya moto na ngai ; ba-oyo balukaka kobebisa bomoi na ngai, oyo bazali banguna na ngai kaka pamba, bazali bato na nguya ; bazali kosenga ngai na makasi ete nazongisa eloko oyo nayibaki te.

⁶Nzambe, oyebi bozoba na ngai, mpe mabe na ngai ezali ya kobombama te na miso na Yo.

⁷Nkolo Yawe, Mokonzi ya mampinga, tika ete ba-oyo batiaka elikya kati na Yo basila lokumu te likolo na ngai ! Nzambe ya Isalaele, tika ete bato oyo balukaka Yo bayokisama soni te likolo na ngai !

⁸Pamba te nandimi kofingama mpo na Yo, mpe soni ezipi ngai elongi.

⁹Bandeko na ngai bakomi kozwa ngai lokola moto oyo bayebi te, nakomi lokola mopaya na miso ya bana ya mama na ngai.

¹⁰Pamba te bolingo oyo nazali na yango mpo na ndako na Yo ezali kozikisa ngai, mpe mafinga ya bato oyo bafingaka Yo ezali kokweya na moto na ngai.

¹¹Soki naleli mpe nakili bilei, nasengeli kaka kofingama ;

¹²soki nalati saki, bato basalaka masapo mpo na kotiola ngai.

¹³Bato oyo bavandi na ekuke batiolaka ngai, balangwi masanga bayembaka kombo na ngai kati na banzembo na bango.

¹⁴Yawe, nabondeli Yo ! Nzambe, tango ekoki, tango ya kotalisa ngai bolingo monene na Yo ! Yanola ngai na nzela ya boyengebene mpe lobiko na Yo !

¹⁵Bimisa ngai na potopoto, sala ete nazinda lisusu te, nakangolama wuta na maboko ya bayini na ngai mpe nabima na mayi ya mozindo !

¹⁶Tika ete mbonge ya mayi emema ngai lisusu te, mozindo emela lisusu ngai te, mpe libulu ekangamela ngai te !

¹⁷Yawe, yanola ngai, pamba te bolingo na Yo ezali malamu ; baluka epai na ngai, na mawa monene na Yo.

¹⁸Kobombela lisusu mosali na Yo te elongi na Yo. Yanola ngai noki, pamba te nazali na pasi.

¹⁹Pusana pene na ngai, mpe sikola ngai ; kangola ngai wuta na maboko ya bayini na ngai.

²⁰Oyebi ndenge nini nazali kofingama, oyebi soni mpe kosambwa na ngai ; banguna na ngai nyonso bazali liboso na Yo.

²¹Mafinga ezokisi motema na ngai, mpe pota yango ezali kosila te ; nazelaki elembo ya mawa kowuta na bato, kasi namonaki yango te ; nalukaki babondisi, kasi namonaki bango te.

²²Batiaki ngenge kati na bilei na ngai, mpe bamelisaki ngai vino ya ngayi tango nayokaki posa ya mayi.

²³Tika ete mesa na bango ekoma motambo liboso na bango, mpe kimia na bango ekoma monyama.

²⁴Tika ete miso na bango ekufa mpo ete bamona lisusu te, mpe babela mikongo mpo na libela.

²⁵Sopela bango kanda makasi na Yo, mpe tika ete kanda na Yo ya makasi ekanga bango.

²⁶Tika ete molako na bango etikala polele, mpe ete moto moko te avanda na bandako na bango ya kapo.

²⁷Pamba te bazali konyokola bato oyo ozokisaki, mpe bazali kopanza sango ya pasi ya bato oyo oyokisaki pasi.

²⁸Bakisa mabe na likolo ya mabe na bango, mpe kokota likambo na bango te na bosembo na Yo.

²⁹Tika ete bakombo na bango elongwa na buku ya bomoi, mpe batangama te na molongo ya bato ya sembo.

³⁰Solo, nazali mobola mpe moto ya pasi ; kasi lobiko na Yo, oh Nzambe, ebatelaka ngai.

³¹Nakoyemba mpo na lokumu ya Kombo ya Nzambe, mpe nakopesa Ye nkembo elongo na matondi.

³²Yango nde ekosepelisa Yawe, koleka ngombe oyo ezali na maseke mpe na makolo ekabwana.

³³Babola bamoni mpe bazali kosepela. Tika ete mitema na bino oyo bolukaka Nzambe ezala na bomoi !

³⁴Pamba te Yawe ayokaka bato oyo bakelela, mpe atiolaka bato na Ye te ata bazali bakangami kati na boloko.

³⁵Tika ete likolo mpe mabele, bibale minene mpe nyonso oyo ezali kati na yango ekumisa Ye !

³⁶Pamba te Nzambe akobikisa Siona mpe akotonga lisusu bingumba ya Yuda. Bato bakovanda kuna mpe bakozwa yango lokola libula na bango.

³⁷Bakitani ya basali na Ye bakozwa yango lokola libula, mpe bato oyo balingaka Kombo na Ye bakovanda kati na yango.