Read Mokanda na Bomoi Banzembo 71 Bible Online

Banzembo 71 - Mokanda na Bomoi bible

Banzembo 71

¹Yawe, ozali ebombamelo na ngai ; kondima te ete nayoka soni !

²Na bosembo na Yo, kangola mpe bikisa ngai. Yoka ngai mpe bikisa ngai.

³Zala mpo na ngai ekimelo ya libanga epai wapi nakoki kokende tango nyonso. Ozwaki mokano ya kobikisa ngai, pamba te ozali libanga mpe ndako na ngai batonga makasi.

⁴Nzambe na ngai, kangola ngai wuta na maboko ya bato mabe, na maboko ya batomboki mpe bato na kanza.

⁵Nkolo Yawe, ozali elikya na ngai ; wuta bolenge na ngai, namipesaka na Yo.

⁶Wuta mbotama na ngai, natalelaka Yo ; Yo nde obimisaki ngai na libumu ya mama na ngai. Nakokumisa Yo tango nyonso.

⁷Nazali likamwisi mpo na bato ebele ; ozali ebombamelo na ngai ya makasi.

⁸Tika ete monoko na ngai etonda na masanzoli mpo na lokumu na Yo ; tika ete etatolaka tango nyonso kongenga ya nkembo na Yo.

⁹Kobwaka ngai te awa nakomi mobange, kotika ngai te awa makasi na ngai ekomi kosila.

¹⁰Pamba te banguna na ngai bazali koloba mabe na tina na ngai, mpe bato oyo balukaka koboma ngai basaleli ngai likita.

¹¹Bazali koloba : « Nzambe asundoli ye ; bolanda ye, bokanga ye ; moto oyo akokangola ye azali te ! »

¹²Oh Nzambe, kozala mosika na ngai te ! Nzambe na ngai, yaka noki mpo na kosunga ngai.

¹³Tika ete bato oyo bafundaka ngai bakufa soni mpe balimwa ! Tika ete ba-oyo balukaka pasi na ngai basambwa mpe bayokisama soni !

¹⁴Kasi ngai, nakozala na elikya tango nyonso mpe nakokoba kokumisa Yo.

¹⁵Monoko na ngai ekosakola tango nyonso misala ya bosembo mpe ya lobiko na Yo, pamba te nayebi motango na yango te.

¹⁶Nkolo Yawe, nakoya epai na Yo mpe nakotatola misala na Yo ya nguya ; nakotatola misala malamu ya bosembo na Yo, misala ya bosembo na Yo kaka.

¹⁷Nzambe, wuta bolenge na ngai, oteya ngai ; mpe kino lelo, nazali kotatola bikamwa na Yo.

¹⁸Ezala ndenge nakomi sik’oyo mobange mpe suki na ngai ekomi pembe, oh Nzambe na ngai, kotika ngai te, mpo ete natatola makasi na Yo epai ya bato ya ekeke oyo, mpe misala ya nguya na Yo epai ya bato nyonso oyo bakoya sima.

¹⁹Nzambe, bosembo na Yo ekenda kino na likolo, pamba te osalaka makambo minene. Oh Nzambe, nani akokani na Yo ?

²⁰Atako osalaki ete tokutana na pasi mingi mpe na makambo ya bololo, kasi okotika lisusu biso kozala na bomoi, okobimisa ngai lisusu wuta na mozindo ya mabele.

²¹Okomatisa lisusu lokumu na ngai, mpe okobondisa ngai lisusu.

²²Nzambe na ngai, nakosanzola Yo na lindanda mpo na boyengebene na Yo ; Mosantu ya Isalaele, nakobeta lindanda mpo na lokumu na Yo.

²³Nakoganga na esengo tango nakoyemba banzembo mpo na lokumu na Yo, pamba te okangoli bomoi na ngai.

²⁴Lolemo na ngai ekotatola tango nyonso misala ya bosembo na Yo, pamba te bato oyo balukaka pasi na ngai bayokisami soni mpe basambwe.