Read Mokanda na Bomoi Banzembo 72 Bible Online

Banzembo 72 - Mokanda na Bomoi bible

Banzembo 72

¹Nzembo ya Salomo. Oh Nzambe, pesa na mokonzi mayele na Yo ; mpe na mwana ya mokonzi, bosembo na Yo !

²Tika ete asambisa bato na Yo na bosembo ; mpe babola na Yo, kolanda boyengebene.

³Bangomba milayi ekomemela bato kimia ; mpe bangomba mike, bosembo.

⁴Akokota likambo ya babola kati na bato, akobikisa bana ya moto akelela mpe akobebisa monyokoli.

⁵Bongo bakotosa Yo tango nyonso moyi ekongala, tango nyonso sanza ekongenga, na bikeke nyonso.

⁶Tika ete azala lokola mvula oyo ezali konoka na bilanga oyo balongoli matiti, lokola mamwe oyo ezali kopolisa mabele.

⁷Na tango na ye, moto ya sembo akokende liboso, mpe kimia ekofuluka kino sanza ekongenga lisusu te.

⁸Tika ete akonza longwa na ebale moko ya monene kino na ebale mosusu ya monene, longwa na ebale Efrate kino na suka ya mokili.

⁹Bavandi ya esobe bakofukama liboso na ye, mpe banguna na ye bakolembola putulu.

¹⁰Bakonzi ya Tarsisi mpe ya bisanga bakomemela ye mpako ya mokonzi, bakonzi ya Saba mpe ya Seba bakopesa ye makabo.

¹¹Bakonzi nyonso bakofukama liboso na ye, mpe bikolo nyonso ekosalela ye.

¹²Pamba te akokangola moto akelela oyo azali koganga mpo na kosenga lisungi, mpe mobola oyo azangi mosungi.

¹³Akoyokela mobola mpe moto akelela mawa, mpe akobikisa moto akelela na kufa ;

¹⁴akosikola bango na minyoko mpe na makambo na kanza, pamba te bomoi na bango ezali motuya na miso na ye.

¹⁵Akozala na bomoi, bakopesa ye wolo ya Saba. Bakobanda kosambela mpo na ye tango nyonso mpe kopambola ye mikolo nyonso.

¹⁶Tika ete ble etonda kati na mokili, mbuma na yango ebota ebele na likolo ya bangomba lokola Libani ! Wuta na engumba, bato bakozala na bofuluki lokola matiti ya elanga.

¹⁷Tika ete kombo na ye ewumela libela na libela, ewumela tango nyonso moyi ekozala, mpo ete bato bakoma kotangaka kombo na ye wana bakobanda kopambolanaka, mpe bikolo nyonso ekoma kobengaka ye : moto ya esengo.

¹⁸Tika ete Yawe Nzambe oyo asalaka Ye moko bikamwa, Nzambe ya Isalaele, apambolama !

¹⁹Tika ete Kombo na Ye ya nkembo epambolama libela na libela ! Tika ete mokili mobimba etonda na nkembo na Ye ! Amen ! Amen !

²⁰Mabondeli ya Davidi, mwana mobali ya Izayi, esuki awa.