Read Mokanda na Bomoi Banzembo 73 Bible Online

Banzembo 73 - Mokanda na Bomoi bible

Banzembo 73

¹Nzembo ya Azafi. Solo, Nzambe azali malamu mpo na Isalaele, mpo na bato oyo bazali mitema peto.

²Nzokande mpo na ngai, etikalaki moke ete makolo na ngai eselumuka, etikalaki moke ete nakweya,

³pamba te nazalaki kolula bato ya lofundu tango nazalaki komona kimia ya bato mabe.

⁴Kino na kufa na bango, bazalaka na mitungisi te, nzoto na bango ezalaka sembesembe.

⁵Kati na bango, moko te amonaka pasi oyo bato nyonso bamonaka ; babelaka te bokono oyo ezwaka bato.

⁶Yango wana, lolendo ekoma lokola mayaka na bakingo na bango, mpe makambo na kanza ekoma lokola elamba na bango.

⁷Miso na bango engengaka na bilongi etonda na mafuta ; mitema na bango esalaka kaka mabongisi ya mabe ;

⁸batiolaka mpe balobaka mabe, bagangelaka minyoko.

⁹Minoko na bango etombokelaka Likolo, mpe lolemo na bango esakanelaka mokili.

¹⁰Yango wana bato balandaka bango mpe bamelaka maloba na bango lokola mayi.

¹¹Balobaka : « Nzambe akoyeba ndenge nini ? Ye-Oyo-Aleki-Likolo azali ata na boyebi ? »

¹²Tala ndenge bato mabe bazalaka : tango nyonso, bazalaka na mitungisi te, mpe bomengo na bango emataka se komata.

¹³Solo, ezali kaka na pamba nde nabatelaki motema na ngai peto ; ezali kaka na pamba nde nasukolaki maboko na ngai mpo ete nasala mabe te !

¹⁴Mikolo nyonso, nanyokwamaka ; mpe tongo nyonso, nazwaka etumbu.

¹⁵Soki nalobi : « Nakoloba lokola bango, » wana nateki penza lokumu ya libota na Yo.

¹⁶Tango nakanisaki mpo na koluka kososola, nayokaki pasi na motema

¹⁷kino nakendeki na Esika ya bule ya Nzambe mpe nasosolaki ndenge nini bakosuka.

¹⁸Solo, otielaka bango biloko ya moselu, okweyisaka bango kati na libebi.

¹⁹Ndenge nini babebisamaka mbala moko, bakomaka na suka, mpe somo elimwisaka bango !

²⁰Ndenge ndoto elimwaka soki moto alamuki na pongi, Nkolo, olimwisaka lisolo ya bomoi na bango tango kaka otelemaka.

²¹Tango motema na ngai ezalaki kotomboka mpe molimo na ngai emitungisaki,

²²nasilaki mayele, nakomaki lokola zoba, nakomaki lokola nyama liboso na Yo.

²³Nzokande, nazalaka tango nyonso elongo na Yo ; osimba ngai na loboko na ngai ya mobali.

²⁴Otambolisaka ngai na nzela ya toli na Yo, mpe, na sima, okoyamba ngai kati na nkembo.

²⁵Kuna na Likolo, nani azali mpo na ngai soki Yo te ? Mpe awa na mokili, nasepela na nani soki na Yo te ?

²⁶Nzoto na ngai ekoki kobeba, mpe motema na ngai ekoki kolemba ; kasi Nzambe azali Libanga mpe libula na ngai mpo na tango nyonso.

²⁷Bato nyonso oyo bazali mosika na Yo bakokufa ; obebisaka bato nyonso oyo batosaka Yo te.

²⁸Kasi mpo na ngai, ezali malamu kozala pene ya Nzambe. Nakomisi Nkolo Yawe ebombamelo na ngai, mpo na kopanza sango ya misala na Yo nyonso.