Read Mokanda na Bomoi Banzembo 75 Bible Online

Banzembo 75 - Mokanda na Bomoi bible

Banzembo 75

¹Wuta na buku ya mokambi ya bayembi. Nzembo ya koyemba lokola « Koboma te ! » Nzembo ya Azafi.

²Nzambe, tozali kosanzola Yo, tozali kosanzola Kombo na Yo ; mpo ete Kombo na Yo ezali pene, bato bazali kotatola bikamwa na Yo.

³Olobaki : « Na tango oyo ngai moko nakobongisa, nakokata makambo na bosembo.

⁴Mokili ekoki kolenga elongo na bavandi na yango nyonso, kasi ezali ngai nde nalendisaka makonzi na yango. »

⁵Nazali koloba na moto ya lofundu : « Kotombola lisusu mapeka te ; » mpe na bato mabe : « Bosala lisusu lolendo te.

⁶Bomeka lisusu te kosala lofundu mpe koloba na lolendo. »

⁷Botombwami ewutaka na Este te, na Weste te, ewutaka mpe na esobe te.

⁸Pamba te ezali Nzambe nde akataka makambo : akitisaka moto songolo mpe atombolaka moto pakala.

⁹Loboko na Yawe esimbi kopo oyo etondi na vino ya makasi mpe ya bololo. Azali kosopa yango, mpe bato mabe nyonso ya mokili bazali komeka mpe komela yango kino na mbindo oyo etikalaka na se ya kopo.

¹⁰Mpo na ngai, nakotatola makambo oyo tango nyonso, nakoyemba mpo na lokumu ya Nzambe ya Jakobi,

¹¹oyo azali koloba : « Nakosilisa makasi nyonso ya bato mabe ; kasi nguya ya bato ya sembo ekomata lisusu makasi. »