Read Mokanda na Bomoi Banzembo 76 Bible Online

Banzembo 76 - Mokanda na Bomoi bible

Banzembo 76

¹Wuta na buku ya mokambi ya bayembi. Ezali ya koyemba na lindanda. Nzembo ya Azafi.

²Nzambe ayebani kati na Yuda ; Kombo na Ye ezali monene kati na Isalaele.

³Ndako na Ye ya kapo ezali na Salemi ; mpe esika na Ye ya kovanda ezali na Siona.

⁴Ezali kuna nde abukaki makonga ya makasi, banguba, mipanga mpe bibundeli nyonso ya bitumba.

⁵Ozali kongenga lokola mwinda, otonda na lokumu koleka bangomba ya babotoli bomengo ya bitumba.

⁶Bilombe nyonso ya mpiko bakweyisamaki, balalaki pongi na bango ya suka ; basoda nyonso bakokaki lisusu te kotombola maboko.

⁷Nzambe ya Jakobi, na kanda na Yo, bato oyo babundaka likolo ya bampunda elongo na bampunda bakweyi na somo.

⁸Solo, ozali somo ! Nani akokoka kotelema liboso na Yo soki osiliki ?

⁹Wuta na likolo, osalaka ete mokano na Yo eyokana na matoyi ya bato ; mokili ekomaka na kobanga mpe evandaka kimia

¹⁰tango, Yo Nzambe, otelemaka mpo na kosambisa mpe kobikisa banyokolami nyonso ya mokili.

¹¹Pamba te kanda makasi ya bato esanzolaka Yo, mpe olataka kanda ya batikali.

¹²Epai ya Yawe, Nzambe na bino, bopesa bilaka mpe bokokisa yango. Tika ete bato nyonso oyo bazingeli Ye bamemela Nzambe ya somo makabo !

¹³Abukaka lolendo ya bakambi, mpe bakonzi ya mokili babangaka Ye.