Read Mokanda na Bomoi Banzembo 77 Bible Online

Banzembo 77 - Mokanda na Bomoi bible

Banzembo 77

¹Wuta na buku ya mokambi ya bayembi, kolanda Yedutuni. Nzembo ya Azafi.

²Nabelelaka Nzambe na koganga ; nabelelaka Nzambe mpo ete ayoka ngai !

³Tango nazalaka na pasi, nalukaka Nkolo ; na butu, nalembaka te kotombola maboko na ngai mpe naboyaka kobondisama.

⁴Nakanisaka Nzambe mpe nalelaka, nakotaka na mozindo ya makanisi mpe nalembaka nzoto.

⁵Opimelaka miso na ngai pongi, namitungisaka mpe nayebaka lisusu te eloko ya koloba.

⁶Nakanisaka lisusu mikolo ya kala, mibu nyonso oyo eleka ;

⁷Na butu, nakanisaka lisusu banzembo na ngai ; motema na ngai ezongelaka kokanisa, mpe molimo na ngai ekomaka komituna :

⁸« Boni, Nkolo akobwaka biso penza mpo na libela ? Akosalela biso lisusu bolamu te ?

⁹Bolingo na Ye esili penza mpo na libela ? Bilaka na Ye ekokokisama te mpo na libela ?

¹⁰Nzambe abosani solo kosala ngolu ? Akangi penza motema na Ye mpo na kanda ? »

¹¹Mpe namilobelaka : « Tala likambo oyo ezali kosala ngai pasi : loboko ya mobali ya Ye-Oyo-Aleki-Likolo ebongwani ! »

¹²Nakanisaka misala minene ya Yawe, bikamwa na Yo ya kala.

¹³Nakanisaka nyonso oyo osalaki kino na bikamwa na Yo.

¹⁴Oh Nzambe, banzela na Yo ezali bule ; nzambe nini akokani na Yo na monene ?

¹⁵Ozali Nzambe oyo asalaka bikamwa ; olakisi nguya na Yo kati na bikolo.

¹⁶Na nguya ya loboko na Yo, okangolaki bato na Yo, bakitani ya Jakobi mpe ya Jozefi.

¹⁷Oh Nzambe, mayi emonaki Yo ! Mayi emonaki Yo mpe ekomaki kolenga ; ezala mozindo ya mayi eninganaki.

¹⁸Mapata esopaki mayi ebele, likolo eyokisaki lokito ya kake, mpe makonga na Yo ezalaki koleka-leka na bangambo nyonso.

¹⁹Na lokito ya kake na Yo, mikalikali engengisaki mokili, mabele eninganaki mpe elengaki.

²⁰Opasolaki nzela kati na ebale monene, balabala na Yo kati na mayi monene, mpe moto moko te amonaki bilembo ya matambe na Yo.

²¹Otambolisaki bato na Yo lokola etonga, na loboko ya Moyize mpe ya Aron.