Read Mokanda na Bomoi Banzembo 8 Bible Online

Banzembo 8 - Mokanda na Bomoi bible

Banzembo 8

¹Wuta na buku ya mokambi ya bayembi. Nzembo ya Davidi ; ezali ya koyemba na lindanda ya bato ya Gati.

²Oh Yawe, Nkolo na biso, Kombo na Yo ezali monene kati na mokili mobimba ! Ovandisi nkembo na Yo kati na Lola.

³Na nzela ya masanzoli ya bana mpe bana mike, otelemisi ndako batonga makasi, mpo na kotelemela bayini na Yo mpe kokanga monoko ya monguna mpe ya moto oyo alingaka kozongisa mabe na mabe.

⁴Tango natalaka Lola na Yo, mosala ya misapi na Yo, sanza mpe minzoto oyo otia,

⁵namitunaka : Moto azali nini mpo ete okanisa ye, mpe moto azali nani mpo ete obatela ye ?

⁶Osalaki ye moke koleka ba-anjelu mpe olatisaka ye motole ya nkembo mpe ya lokumu ;

⁷otia ye moyangeli ya misala ya maboko na Yo, otia nyonso na se ya matambe na ye :

⁸bameme, bantaba, bangombe mpe banyama ya zamba,

⁹bandeke ya likolo, mbisi ya ebale monene mpe nyonso oyo etambolaka na bibale.

¹⁰Oh Yawe, Nkolo na biso, Kombo na Yo ezali monene kati na mokili mobimba !