Read Mokanda na Bomoi Banzembo 81 Bible Online

Banzembo 81 - Mokanda na Bomoi bible

Banzembo 81

¹Wuta na buku ya mokambi ya bayembi. Nzembo ya Azafi. Ezali ya koyemba na lindanda ya bato ya Gati.

²Boganga na esengo epai ya Nzambe, makasi na biso ! Bobetela Nzambe ya Jakobi maboko !

³Boyemba banzembo, bobeta bambunda mike, lindanda oyo ebimisaka lokito kitoko mpe nzenze !

⁴Bobeta kelelo na ebandeli ya sanza, na tango oyo sanza mobimba engengaka, mpo na mokolo ya feti na biso !

⁵Pamba te ezali mobeko mpo na Isalaele, mpe mokano ya Nzambe ya Jakobi.

⁶Atiaki yango lokola mobeko mpo na Jozefi tango abundisaki Ejipito. Nazali koyoka lokota oyo nayebi te :

⁷« Nalongolaki mokumba oyo ezalaki na mapeka na ye, mpe maboko na ye elongwaki na bowumbu ya kosimba bitunga. »

⁸Tango ozalaki koganga mpo na pasi, nakangolaki yo, nayanolaki yo kati na kake epai wapi nabombamaki, namekaki yo pembeni ya mayi ya Meriba.

⁹Bato na ngai, boyoka ngai ! Mpe nakokebisa bino. Ah Isalaele, soki kaka ozalaki koyokela ngai !

¹⁰Okozala na nzambe ya mopaya te kati na yo, okogumbamela nzambe mosusu te, longola kaka ngai !

¹¹Nazali Yawe, Nzambe na yo, oyo abimisaki yo na Ejipito ; fungola malamu monoko na yo, mpe nakotondisa yango.

¹²Kasi bato na ngai bayokaki mongongo na ngai te, Isalaele aboyaki kotosa ngai.

¹³Mpo na yango, natikaki bango kotambola kolanda baposa ya mitema makasi na bango ; mpe balandaki makanisi na bango.

¹⁴Soki bato na ngai bazalaki koyokela ngai, soki Isalaele azalaki kolanda banzela na ngai,

¹⁵nalingaki mbala moko koyokisa banguna na bango soni mpe kobundisa bayini na bango.

¹⁶Mpe bato oyo bayinaka Yawe balingaki komikitisa liboso na Ye, mpe etumbu na bango elingaki kowumela mpo na libela.

¹⁷Yawe alingaki koleisa Isalaele bilei ya kitoko mpe kotondisa bango na mafuta ya nzoyi.