Read Mokanda na Bomoi Banzembo 83 Bible Online

Banzembo 83 - Mokanda na Bomoi bible

Banzembo 83

¹Nzembo ya Azafi.

²Oh Nzambe, kovanda nye te ! Nzambe, kokanga monoko na Yo te, kotikala kimia te !

³Tala ndenge banguna na Yo bazali kotomboka ; tala ndenge bayini na Yo bazali kotombola mito na bango !

⁴Bazali kosalela bato na Yo likita, kokanela bato oyo obatelaka.

⁵Bazali koloba : « Boya, toboma bango nyonso mpo ete ekolo na bango ezala lisusu te, mpo ete batanga lisusu kombo ya Isalaele te. »

⁶Basangani mpe bayokani, basali boyokani mpo na kotelemela Yo :

⁷bato ya Edomi mpe bato ya Isimaeli, bato ya Moabi mpe bato ya Agari,

⁸Gebali, Amoni mpe Amaleki, bato ya Filisitia elongo na bato ya Tiri.

⁹Bato ya Asiri mpe basangani elongo na bango mpo na kobakisa bakitani ya Loti makasi.

¹⁰Sala bango ndenge osalaki Madiani, ndenge osalaki Sisera mpe Yabini, kuna na mayi ya Kishoni.

¹¹Babebisamaki na Eyini-Dori, bakomaki lokola matiti ya kopola mpo na mabele.

¹²Sala bato na bango ya lokumu ndenge osalaki Orebi mpe Zeebi ; mpe sala bakambi na bango ndenge osalaki Zeba mpe Tsalimuna

¹³oyo bazalaki koloba : « Tobotola mabele ya Nzambe ! »

¹⁴Nzambe na ngai, balola bango lokola matiti oyo mopepe ezali kopumbwisa.

¹⁵Ndenge moto ezikisaka zamba, ndenge moto makasi ezikisaka bangomba,

¹⁶landa bango na nzela ya mopepe na Yo mpe bangisa bango na nzela ya mopepe makasi na Yo !

¹⁷Yawe, tondisa bilongi na bango na soni mpo ete baluka Kombo na Yo !

¹⁸Tika ete soni mpe somo makasi elata bango mpo na libela ! Tika ete bakufa na soni !

¹⁹Tika bayeba ete Yo, oyo Kombo na Yo ezali Yawe, ozali Ye-Oyo-Aleki-Likolo kati na mokili mobimba !