Read Mokanda na Bomoi Banzembo 85 Bible Online

Banzembo 85 - Mokanda na Bomoi bible

Banzembo 85

¹Wuta na buku ya mokambi ya bayembi. Nzembo ya bana ya Kore.

²Yawe, osalelaki mboka na Yo bolamu, ozongisaki bato ya Jakobi, oyo bazalaki na bowumbu,

³olimbisaki mabe ya bato na Yo mpe olongolaki masumu na bango nyonso.

⁴Otikaki kanda na Yo nyonso ya makasi mpe okitisaki motema na Yo.

⁵Nzambe Mobikisi na biso, zongela biso ! Longola kanda na Yo na tina na biso !

⁶Boni, okosilikela biso penza mpo na libela ? Okokangela penza biso kanda mpo na tango nyonso ?

⁷Okozongisela biso lisusu bomoi te mpo ete bato na Yo basepela kati na Yo ?

⁸Yawe, talisa biso bolingo na Yo, mpe pesa biso lobiko na Yo !

⁹Yawe, nakoyoka maloba na Nzambe ; pamba te alobaka mpo na kimia ya bato na Ye mpe ya bayengebene na Ye. Kasi tika ete bazongela te botomboki na bango.

¹⁰Solo, lobiko na Ye ezali pene ya bato oyo batosaka Ye mpo ete nkembo na Ye ewumela kati na mboka na biso.

¹¹Bolingo mpe boyengebene ekutanaka, bosembo mpe kimia eyambanaka.

¹²Bosolo ebotaka wuta na mabele, mpe bosembo etalaka wuta na likolo.

¹³Ye moko Yawe akopesa esengo, mpe mabele na biso ekobota bambuma.

¹⁴Bosembo etambolaka liboso na Ye mpe elakisaka nzela oyo ekolekela.