Read Mokanda na Bomoi Banzembo 86 Bible Online

Banzembo 86 - Mokanda na Bomoi bible

Banzembo 86

¹Libondeli ya Davidi. Yawe, yoka mpe yanola ngai ; pamba te nazali mobola mpe moto akelela.

²Batela bomoi na ngai, pamba te nazali moyengebene na Yo. Yo, Nzambe na ngai, bikisa ngai, mosali na Yo, oyo natiaka elikya kati na Yo.

³Oh Nkolo, yokela ngai mawa ; pamba te nabelelaka Yo tango nyonso !

⁴Nkolo, sepelisa motema na ngai, mosali na Yo, pamba te natombolaka molimo na ngai epai na Yo.

⁵Nkolo, ozali malamu, olimbisaka, otonda na bolingo mpo na bato nyonso oyo babelelaka Yo.

⁶Yawe, yoka losambo na ngai, yoka libondeli na ngai !

⁷Na mokolo ya pasi na ngai, nabelelaka Yo, pamba te oyanolaka ngai.

⁸Nkolo, nzambe moko te ekokani na Yo, kati na banzambe ; moko te ekoki kosala makambo oyo Yo osalaka.

⁹Nkolo, bikolo nyonso oyo osala ekoya kogumbama liboso na Yo mpe ekoya kopesa Kombo na Yo nkembo.

¹⁰Pamba te ozali monene mpe osalaka bikamwa ; Yo kaka nde ozali Nzambe.

¹¹Yawe, lakisa ngai nzela na Yo, mpe nakotambola kolanda bosolo na Yo. Pesa ngai motema ya sembo mpo ete natosa Yo.

¹²Nkolo, Nzambe na ngai, nakosanzola Yo, na motema na ngai mobimba, nakopesa Kombo na Yo nkembo mpo na Yo libela.

¹³Pamba te bolingo na Yo mpo na ngai ezali monene, mpe okangolaki ngai wuta na mozindo ya mboka ya bakufi.

¹⁴Nzambe, bato ya lofundu bazali kobundisa ngai, mpe ngulupa ya bato na kanza bazali koluka koboma ngai ; batosaka Yo ata moke te.

¹⁵Kasi Yo Nkolo, ozali Nzambe na mawa mpe na ngolu, osilikaka noki te, otonda na bolingo mpe na boyengebene.

¹⁶Balola elongi na Yo epai na ngai mpe yokela ngai mawa ; pesa ngai, mosali na Yo, makasi mpe bikisa ngai mwana ya mwasi mosali na Yo !

¹⁷Salela ngai elembo ya boboto na Yo mpo ete banguna na ngai bamona yango mpe bakufa soni ! Yawe, ozali Mosungi mpe Mobondi na ngai.