Read Mokanda na Bomoi Banzembo 88 Bible Online

Banzembo 88 - Mokanda na Bomoi bible

Banzembo 88

¹Wuta na buku ya mokambi ya bayembi. Nzembo ya bana ya Kore. Ezali ya koyemba na flite. Nzembo ya Emani, moto ya Ezera.

²Yawe, ozali Nzambe ; Yo nde obikisaka ngai ! Butu mpe moyi, nagangaka epai na Yo !

³Tika ete losambo na ngai ekoma epai na Yo ; Yoka koganga na ngai !

⁴Pamba te bomoi na ngai etondi na pasi mpe nakomi pene ya kokufa.

⁵Batie ngai na molongo ya bato oyo bazali kokende na kunda ; nakeseni ata moke te na moto oyo azali lisusu na makasi te.

⁶Nakomi moko kati na bakufi, lokola bato oyo basila kokufa na bitumba mpe bazali sik’oyo kati na kunda, lokola bato oyo okanisaka lisusu te, pamba te obatelaka bango lisusu te.

⁷Obwaki ngai na libulu ya mozindo makasi, kati na mozindo ya molili.

⁸Kanda na Yo ya makasi ekweyeli ngai, bambonge na yango nyonso ezali konyokola ngai.

⁹Okaboli ngai na balingami na ngai ya motema, okomisi ngai eloko ya nkele na miso na bango ; nakomi lokola mokangami kati na boloko, nakoki kobima te !

¹⁰Miso na ngai ezali komona lisusu te mpo na pasi ; nzokande nabelelaka Yo, Yawe, mikolo nyonso, natombolaka maboko na ngai epai na Yo !

¹¹Boni, okosala bikamwa mpo na bakufi ? Boni, bakufi bakoki kotelema mpo na kosanzola Yo ?

¹²Boni, bolingo na Yo etatolamaka kati na kunda, mpe bosembo na Yo, kati na mboka ya bakufi ?

¹³Boni, bikamwa na Yo eyebani kati na molili, mpe bosembo na Yo, kati na mokili ya bato oyo babosana ?

¹⁴Kasi ngai, nazali kobelela nde Yo, Yawe ; nabondelaka Yo tongo nyonso.

¹⁵Yawe, mpo na nini kobwaka ngai mpe kobombela ngai elongi na Yo ?

¹⁶Wuta bolenge na ngai, nazali mobola mpe moto na pasi ; mpe okweyiselaka ngai makambo na Yo ya somo ! Solo, elikya esili ngai !

¹⁷Kanda makasi na Yo ebetaka ngai, minyoko oyo ewutaka epai na Yo ekomisaka ngai moto pamba.

¹⁸Ezingelaka ngai mikolo nyonso, lokola mayi, na bangambo nyonso.

¹⁹Okaboli ngai na baninga mpe balingami na ngai, natikali na moninga kaka moko ya motema : molili !