Read Mokanda na Bomoi Banzembo 9 Bible Online

Banzembo 9 - Mokanda na Bomoi bible

Banzembo 9

¹Wuta na buku ya mokambi ya bayembi. Nzembo ya Davidi.

²Nakosanzola Yawe na motema na ngai mobimba, nakotatola misala minene na Yo nyonso.

³Nakozala na esengo mpe nakosepela kati na Yo, nakoyemba mpo na lokumu ya Kombo na Yo-Oyo-Oleki-Likolo.

⁴Banguna na ngai bazongaka sima, bakweyaka mpe balimwaka liboso na Yo.

⁵Pamba te, okataki likambo na ngai mpe olongisaki ngai, ovandi na Kiti ya Bokonzi lokola Mosambisi ya sembo.

⁶Opamelaki bikolo mpe obomaki moto mabe, olimwisaki kombo na bango mpo na libela.

⁷Banguna na ngai balimwa mpo na libela ; opanzaki bingumba na bango kino bakanisa bango lisusu te.

⁸Yawe akonzaka mpo na libela, atia Kiti na Ye ya Bokonzi mpo na kokata makambo ya bato.

⁹Akonzaka mokili na bosembo, akataka makambo ya bato na alima.

¹⁰Yawe azali ebombamelo mpo na bato oyo bazali konyokolama, mpe ndako makasi mpo na tango ya pasi.

¹¹Bato oyo bayebi Kombo na Yo batiaka elikya na bango kati na Yo ; pamba te, Yo Yawe, osundolaka te bato oyo balukaka Yo.

¹²Boyembela Yawe oyo avandaka kati na Siona banzembo ya masanzoli ; bopanza sango ya misala na Ye kati na bikolo.

¹³Pamba te Yawe azongisaka mabe na mabe mpo na makila oyo esopani, akanisaka koganga ya banyokolami.

¹⁴Yawe, yokela ngai mawa, tala ndenge nini bayini na ngai bazali konyokola ngai, mpe kangola ngai wuta na bikuke ya kufa ;

¹⁵mpo ete napanza sango ya lokumu na Yo kati na bikuke ya Siona, mboka kitoko, mpe nasepela na lobiko na Yo kuna.

¹⁶Bapagano bakweyi na libulu oyo batimolaki, makolo na bango ekangami na mitambo oyo bango moko basalaki.

¹⁷Yawe amilakisi na nzela ya misala na Ye ya bosembo ; bato mabe bakangami na mitambo oyo bango moko basalaki.

¹⁸Bato mabe, bikolo nyonso, oyo bakanisaka Nzambe te, bakokende na mboka ya bakufi.

¹⁹Kasi Nzambe akotikala te kobosana mobola, mpe elikya ya banyokolami ekotikala seko na seko.

²⁰Yawe, telema ! Tika ete moto alonga te ; tika ete bapagano basamba liboso na Yo !

²¹Yawe, tika ete somo ekanga bango ; tika ete bapagano bayeba ete bazali na bango kaka bato !