Read Mokanda na Bomoi Banzembo 91 Bible Online

Banzembo 91 - Mokanda na Bomoi bible

Banzembo 91

¹Moto oyo awumelaka kati na ebombamelo ya Ye-Oyo-Aleki-Likolo avandaka na se ya bobatelami ya Nkolo-Na-Nguya-Nyonso.

²Nalobaka na tina na Yawe : « Nzambe na ngai azali ebombamelo mpe ndako makasi na ngai ; natiaka elikya na ngai kati na Ye ! »

³Ye nde akangolaka yo wuta na mitambo ya mokangi bandeke mpe na bokono oyo ebikisaka te.

⁴Abombaka yo na se ya mapapu na Ye, mpe ozwaka ebombamelo ya malonga na se ya mapapu na Ye ; bolingo na Ye ebatelaka lokola nguba mpe lokola elamba ya ebende.

⁵Okobanga te somo ya butu, makonga oyo epumbwaka na moyi makasi,

⁶bokono oyo etambolaka kati na molili mpe pasi oyo ebebisaka na midi.

⁷Ezala bato nkoto moko bakweyi pembeni na yo, mpe bato nkoto zomi, na ngambo ya loboko na yo ya mobali, ekozwa yo ata moke te.

⁸Okotala kaka na miso na yo mpe okomona ndenge nini bato mabe bazali kozwa etumbu lokola lifuti na bango.

⁹Soki otatoli : « Yawe azali ebombamelo na ngai, » mpe okomisi Ye-Oyo-Aleki-Likolo ekimelo na yo,

¹⁰mabe ata moko te ekokweyela yo, pasi ata moko te ekopusana na ndako na yo ;

¹¹pamba te akopesa mitindo na ba-anjelu na Ye ete babatela yo malamu na banzela na yo nyonso.

¹²Bakomema yo na maboko na bango mpo ete lokolo na yo etutana na libanga te ;

¹³okotambola na likolo ya nkosi mpe ya etupa, okonyata nkosi ya monene mpe dalagona.

¹⁴Lokola akangami na ngai, nakokangola ye ; lokola ayebi Kombo na Ngai, nakobatela ye.

¹⁵Soki abeleli ngai, nakoyanola ye ; nakozala elongo na ye na tango ya pasi, nakokangola ye mpe nakopesa ye lokumu.

¹⁶Nakopesa ye bomoi molayi mpe nakolakisa ye lobiko na ngai.