Read Mokanda na Bomoi Banzembo 92 Bible Online

Banzembo 92 - Mokanda na Bomoi bible

Banzembo 92

¹Nzembo ya koyemba na mokolo ya Saba.

²Tala ndenge ezali malamu kosanzola Yawe mpe koyemba mpo na lokumu ya Kombo na Yo-Oyo-Oleki-Likolo !

³Tala ndenge ezali malamu kosakola bolingo na Yo, na tongo, mpe boyengebene na Yo, na butu,

⁴na lindanda ya basinga zomi mpe na nzenze !

⁵Yawe, misala na Yo esepelisaka ngai ! Nagangaka na esengo liboso ya misala ya maboko na Yo.

⁶Yawe, misala na Yo ezali minene, mpe makanisi na Yo ezali mozindo !

⁷Moto ya kilikili ayebaka te, mpe zoba asosolaka eloko moko te.

⁸Tango bato mabe bakolaka lokola matiti, mpe bato nyonso ya misala mabe bafulukaka, ezalaka nde mpo ete babebisama libela.

⁹Kasi Yo, kuna na likolo, ozali Yawe mpo na libela.

¹⁰Yawe, banguna na Yo, banguna na Yo bakokufa penza ; bato nyonso ya misala mabe bakolimwa.

¹¹Okomisi ngai makasi lokola mpakasa, opakoli ngai mafuta ya sika.

¹²Miso na ngai ekomi komona bayini na ngai, mpe matoyi na ngai ekomi koyoka banguna na ngai nyonso, oyo bamibongisa mpo na kosala ngai mabe.

¹³Bato ya sembo bafulukaka lokola nzete ya mbila, bakolaka lokola nzete ya sedele ya Libani.

¹⁴Lokola bapikama ngwi kati na Tempelo ya Yawe, bamonaka bolamu kati na lopango ya Nzambe na biso.

¹⁵Ata bakomi mibange, babotaka kaka, bazalaka kaka makasi mpe kitoko,

¹⁶basakolaka : « Yawe azali alima, azali Libanga na biso ; kati na Ye, mabe ezali te ! »