Read Mokanda na Bomoi Banzembo 94 Bible Online

Banzembo 94 - Mokanda na Bomoi bible

Banzembo 94

¹Yawe, Nzambe oyo azongisaka mabe na mabe, Nzambe oyo azongisaka mabe na mabe, mimonisa kati na nkembo na Yo !

²Mosambisi ya mokili, telema mpo na kozongisela bato ya lolendo mabe na mabe na bango !

³Yawe, kino tango nini bato mabe, kino tango nini bato mabe bakosepela ?

⁴Bazali komilakisa, bazali kobimisa mafinga ; bato nyonso ya misala mabe bazali komikumisa !

⁵Yawe, bazali konyokola bato na Yo mpe bazali koyokisa libula na Yo pasi ;

⁶bazali koboma mwasi oyo akufisa mobali, mopaya mpe bana bitike ;

⁷bazali koloba : « Yawe amonaka eloko moko te, Nzambe ya Jakobi asosolaka eloko moko te ! »

⁸Bino bato ya kilikili, bososola ! Bazoba, bokokoma mayele tango nini ?

⁹Boni, Ye oyo asala litoyi akoki koyoka te ? Ye oyo asala liso akoki komona te ?

¹⁰Ye oyo apesaka bikolo etumbu akoki kopesa etumbu te ? Ye oyo apesaka bato boyebi.

¹¹Yawe ayebi makanisi ya bato ; ayebi ete ezali na tina te.

¹²Yawe, esengo na moto oyo ozali kozongisa na nzela, moto oyo ozali kolakisa mibeko na Yo

¹³mpo na kopesa ye bopemi na tango ya pasi, kino libulu etimolama mpo na moto mabe !

¹⁴Pamba te Yawe asundolaka bato na Ye te, abwakaka libula na Ye te.

¹⁵Bakosambisa lisusu kolanda bosembo, mpe bato nyonso oyo bazali na mitema alima bakotosa bosembo yango.

¹⁶Nani akotelema mpo na ngai mpo na kotelemela bato mabe ? Nani akokotela ngai liboso ya bato ya misala mabe ?

¹⁷Ah, soki Yawe asungaki ngai te, mbele nakendeki noki na mokili ya kufa !

¹⁸Soki nalobi : « Makolo na ngai ekomi kolenga na somo, » bolingo na Yo, Yawe, epesaka ngai makasi.

¹⁹Soki natungisami na makanisi ebele, kobondisama na Yo epesaka ngai esengo.

²⁰Boni, bokonzi ya mabe oyo ememelaka bato pasi na nzela ya mibeko na yango ; boni, ezali lisanga moko elongo na Yo ?

²¹Bato mabe basanganaka mpo na kobundisa bomoi ya moto ya sembo mpe kokatela moto oyo asali mabe te etumbu ya kufa.

²²Kasi Yawe azali, mpo na ngai, ndako batonga makasi ; Nzambe na ngai azali libanga epai wapi nazwaka ebombamelo.

²³Akozongisela bango mabe na bango mpe akobebisa bango mpo na kanza na bango. Solo, Yawe, Nzambe na ngai, akoboma bango.