Read Mokanda na Bomoi Banzembo 96 Bible Online

Banzembo 96 - Mokanda na Bomoi bible

Banzembo 96

¹Boyembela Yawe nzembo ya sika ! Bino nyonso, bato ya mokili mobimba, boyembela Yawe !

²Boyembela Yawe, bopambola Kombo na Ye ! Bopanza sango ya lobiko na Ye, mokolo na mokolo !

³Bopanza sango ya nkembo na Ye kati na mabota ! Boyebisa bato misala na Ye ya kokamwa kati na bikolo nyonso.

⁴Pamba te Yawe azali monene mpe abongi na lokumu, azali somo makasi mpe aleki banzambe nyonso.

⁵Banzambe nyonso ya bikolo ezali bikeko ya pamba, nzokande Yawe akela likolo.

⁶Kongenga mpe nkembo monene ezali liboso na Ye, nguya mpe nkembo ezali kati na Esika na Ye ya bule.

⁷Bino bituka ya mabota, bosanzola Yawe ; bosanzola Yawe na kopanza sango ya nkembo mpe nguya na Ye !

⁸Bosanzola Yawe mpe bopesa Kombo na Ye nkembo ! Bomema makabo na bino, bokota na lopango na Ye !

⁹Bogumbama liboso ya Yawe oyo bosantu na Ye ezali kongenga makasi ! Bino bavandi ya mokili mobimba, bolenga liboso na Ye !

¹⁰Boloba kati na mabota : « Yawe azali Mokonzi ! Mokili elendisama makasi, ekoningana te. Yawe asambisaka bato na bosembo. »

¹¹Tika ete likolo esepela, mpe mabele ezala kati na esengo ! Tika ete ebale monene elongo na nyonso oyo ezali kati na yango epesa lokito !

¹²Tika ete zamba mobimba elongo na nyonso oyo ezali kati na yango esepela, mpe tika ete banzete nyonso ya zamba eganga na esengo

¹³liboso ya Yawe, pamba te azali koya ! Solo, azali koya kosambisa mabele ; akosambisa mokili na bosembo, mpe bikolo kolanda boyengebene na Ye.