Read Mokanda na Bomoi Banzembo 97 Bible Online

Banzembo 97 - Mokanda na Bomoi bible

Banzembo 97

¹Yawe azali kokonza ! Tika ete mabele esepela ; tika ete ebele ya bisanga ezala na esengo !

²Mapata mpe molili makasi ezingeli Ye, bosembo mpe bosolo ezali miboko ya Kiti na Ye ya Bokonzi.

³Moto etambolaka liboso na Ye, ezikisaka banguna na Ye, oyo bazingeli Ye.

⁴Mikalikali na Ye engengisaka mokili ; mpe tango mabele emonaka bongo, elengaka.

⁵Bangomba enyangwamaka lokola mafuta liboso ya Yawe, liboso ya Nkolo ya mokili mobimba.

⁶Likolo epanzaka sango ya bosembo na Ye, mpe bikolo nyonso bamonaka nkembo na Ye.

⁷Tika ete soni ekanga basambeli nyonso ya bikeko, bato oyo bamikumisaka mpo na banzambe ya lokuta ! Bino banzambe nyonso, bogumbama liboso na Ye !

⁸Yawe, Siona eyoki yango mpe esepeli ; bingumba ya Yuda ezali na esengo mpo na mikano na Yo !

⁹Pamba te, na mokili mobimba, Yo nde Yawe, ozali Ye-Oyo-Aleki-Likolo ; oleki banzambe nyonso.

¹⁰Bino bato oyo bolingaka Yawe, boyina mabe ! Yawe abatelaka bomoi ya bayengebene na Ye mpe akangolaka bango na maboko ya bato mabe.

¹¹Moyi elonami mpo na moto ya sembo, mpe esengo, mpo na bato oyo bazali na mitema alima.

¹²Bino bato ya sembo, bosepela kati na Yawe ; bosanzola Ye na kotatola bosantu na Ye.