Read Mokanda na Bomoi Masese 13 Bible Online

Masese 13 - Mokanda na Bomoi bible

Masese 13

¹Mwana mayele ayokaka mateya ya tata na ye, kasi mwana oyo atiolaka ayokaka pamela te.

²Mbuma ya monoko eleisaka moto bilei ya malamu, kasi molimo ya moto oyo atambolaka na bosembo te ememaka na mobulu.

³Moto oyo abatelaka monoko na ye abatelaka molimo na ye, kasi moto oyo afungolaka monoko na ye makasi akosuka na libebi.

⁴Moto ya goyigoyi ayokaka baposa, kasi akoki kokokisa yango te ; nzokande baposa ya moto ya nzunzu ekokisamaka.

⁵Moto ya sembo ayinaka maloba ya lokuta, kasi moto mabe amiyinisaka mpe apanzaka soni.

⁶Bosembo ebatelaka moto oyo atambolaka alima na nzela na ye, kasi mabe ebebisaka bongo ya moto ya masumu.

⁷Ezali na moto moko oyo asalaka makambo lokola mozwi, nzokande azali na ye ata na eloko moko te ; mpe ezali na moto mosusu oyo asalaka makambo lokola mobola, nzokande azali na bozwi mingi.

⁸Bomengo ya mozwi ebatelaka bomoi na ye, kasi bato mabe batungisaka mobola te.

⁹Pole ya bato ya sembo engengaka makasi, kasi mwinda ya bato mabe ekufaka.

¹⁰Lolendo ememaka kaka na koswana, kasi bato oyo bayokaka toli bazwaka bwanya.

¹¹Bomengo oyo ezwami na lombangu mpe na nzela ya mabe esilaka noki, kasi bomengo oyo babakisaka na moke-moke ekomaka ebele.

¹²Elikya oyo ekokisami te epesaka bokono na motema, kasi posa oyo ekokisami ezali nzete ya bomoi.

¹³Moto oyo atiolaka liloba amiyokisaka pasi, kasi moto oyo atosaka malako akozwa lifuti.

¹⁴Mateya ya moto ya bwanya ezali etima ya bomoi, ekangolaka na mitambo ya kufa.

¹⁵Boyebi ememelaka bato ngolu, kasi nzela ya bato oyo babukaka mibeko ezalaka pasi.

¹⁶Moto ya mayele asalaka makambo kolanda boyebi, kasi zoba, atandaka bozoba na ye.

¹⁷Motindami ya mabe akweyaka kati na pasi, kasi motindami ya sembo amemaka lobiko.

¹⁸Bobola mpe soni ekomelaka bato oyo baboyaka koyekola, kasi moto oyo andimaka pamela akozwa lokumu.

¹⁹Posa oyo ekokisami esalaka esengo na motema, kasi kokabwana na mabe ezali likambo ya nkele na miso ya zoba.

²⁰Moto oyo asanganaka na bato ya bwanya akomaka moto ya bwanya, kasi moto oyo atambolaka nzela moko na bazoba akomona pasi.

²¹Mabe elandaka bato ya masumu, kasi bolamu ezali lifuti ya bato ya sembo.

²²Moto oyo asalaka bolamu atikelaka bakitani na ye libula, kasi bomengo ya moto ya masumu ebombamaka mpo na moyengebene.

²³Bilanga ya mobola ekoki kobotela ye bilei ebele, kasi ezali na bato oyo bazali kobeba mpo na kozanga bosembo.

²⁴Moto oyo aboyaka kobeta mwana na ye fimbu alingaka ye te, kasi moto oyo alingaka mwana na ye abetaka ye.

²⁵Moyengebene aliaka mpe atondaka, kasi libumu ya moto mabe ezalaka na nzala.