Read Mokanda na Bomoi Masese 16 Bible Online

Masese 16 - Mokanda na Bomoi bible

Masese 16

¹Motema ya moto esalaka mabongisi, kasi eyano ewutaka epai na Yawe.

²Nzela nyonso ya moto emonanaka peto na miso na ye, kasi Yawe nde amekaka mitema.

³Pesa misala na yo epai na Yawe, mpe mabongisi na yo ekokokisama.

⁴Yawe asalaka makambo nyonso na tina, ezala bato mabe, asala bango mpo na mokolo ya pasi.

⁵Moto nyonso ya lolendo azalaka nkele na miso ya Yawe ; solo, akozanga te kozwa etumbu.

⁶Bolingo mpe bosembo elongolaka mbeba ; kotosa Yawe etindaka moto kokima mabe.

⁷Soki Yawe asepeli na nzela ya moto, akoyokanisa ye na banguna na ye.

⁸Kozwa biloko moke kati na bosembo ezali malamu koleka kozwa bomengo ebele kati na nzela ya mabe.

⁹Motema ya moto esalaka mabongisi, kasi ezali Yawe nde asalaka ete ekokisama to te.

¹⁰Maloba ya mokonzi ezali lokola Liloba na Nzambe, ekweyaka te kati na kosambisama.

¹¹Emekelo kilo ya sembo mpe basani oyo bamekelaka kilo ezali ya Yawe, mpe kilo nyonso ya saki ezali likambo na Ye.

¹²Ezali malamu te mpo na mokonzi kosala mabe, pamba te bokonzi elendisamaka nde na nzela ya bosembo.

¹³Bakonzi balingaka maloba ya solo, mpe bapesaka moto oyo alobaka na bosembo lokumu.

¹⁴Kanda ya mokonzi ememaka na kufa, kasi moto ya bwanya ayebaka kokitisa yango.

¹⁵Soki elongi ya mokonzi ezali kongenga, elingi koloba : bomoi. Bolamu na ye ezali lokola lipata ya mvula ya eleko ya suka.

¹⁶Bwanya ezali malamu koleka wolo, mpe kozwa mayele ezali na litomba koleka palata.

¹⁷Bato ya sembo batambolaka na nzela oyo epesaka mabe mokongo. Moto oyo abatelaka motema na ye abatelaka nde bomoi na ye.

¹⁸Lolendo eyaka liboso ya kobebisama, mpe komimatisa eyaka liboso ya kokweyisama.

¹⁹Kozala moto ya komikitisa mpe kozala elongo na bato bakelela ezali malamu koleka kokabola bomengo ya bitumba elongo na bato ya lolendo.

²⁰Moto oyo akanisaka na tina na makambo amonaka bolamu. Esengo na moto oyo atiaka elikya na Yawe.

²¹Babengaka moto oyo azali na motema ya bwanya moto ya mayele, mpe bibebu ya kimia ebakisaka boyebi.

²²Mayele ezali etima ya bomoi mpo na bato oyo bazali na yango, kasi bozoba ezali etumbu mpo na bazoba.

²³Motema ya moto ya bwanya ekomisaka monoko na ye mayele, mpe bibebu na ye ebakisaka boyebi.

²⁴Maloba ya elengi ezalaka lokola mafuta ya nzoyi, epesaka kimia na motema mpe lobiko na mikuwa.

²⁵Nzela mosusu emonanaka sembo na miso ya bato, nzokande, na suka, ememaka na kufa.

²⁶Nzala etindaka mosali ete asala mosala, monoko na ye etindikaka ye na mosala.

²⁷Moto ya Beliali abongisaka kosala mabe, mpe maloba na ye ezali lokola moto oyo etumbaka.

²⁸Moto mabe alonaka koswana, moto ya songisongi akabolaka baninga.

²⁹Moto ya mobulu abendaka moninga na ye mpe atambolisaka ye na nzela ya mabe.

³⁰Moto oyo akangi miso mpe bibebu na ye mpo na kosala mabongisi ya mabe asili kosala masumu.

³¹Suki ya pembe ezali motole ya nkembo ; bazwaka yango na nzela ya bosembo.

³²Moto oyo akangaka motema azali makasi koleka elombe, mpe moto oyo ayebi komikanga azali makasi koleka moto oyo abotolaka bingumba.

³³Bakobetaka zeke kati na elamba ya Nganga-Nzambe, kasi mikano nyonso ewutaka na Yawe.