Read Mokanda na Bomoi Masese 17 Bible Online

Masese 17 - Mokanda na Bomoi bible

Masese 17

¹Kolia na kimia ndambo ya lipa ya kokawuka ezali malamu koleka kovanda na ndako etonda na misuni elongo na koswana.

²Mosali ya bwanya akozala na bokonzi likolo ya mwana mobali oyo asalaka soni, mpe akozwa libula elongo na bandeko.

³Bapetolaka palata na kikalungu, mpe bapetolaka wolo na fulu ya moto makasi, kasi ezali Yawe nde amekaka mitema.

⁴Moto oyo asalaka mabe ayokaka maloba ya bato mabe, mokosi apesaka litoyi na ye na maloba ya lokuta.

⁵Moto oyo anyokolaka mobola anyokolaka Mokeli ya mobola yango ; moto oyo asepelaka na pasi ya moninga akozanga te kozwa etumbu.

⁶Bakitani bazali motole ya bakoko, mpe baboti bazali lokumu ya bana.

⁷Ndenge maloba ya lokumu ebongi te mpo na moto mabe, ndenge mpe maloba ya lokuta ebongi te mpo na mokonzi.

⁸Kanyaka ezalaka lokola kisi na miso ya moto oyo azali na yango ; alongaka na esika nyonso oyo akendaka.

⁹Moto oyo abombaka mabe alukaka bolingo, kasi moto oyo azongelaka yango tango nyonso akabolaka bato oyo balingani.

¹⁰Pamela ezalaka na litomba mpo na moto ya mayele, kasi kobeta zoba bafimbu nkama moko ezalaka na litomba te.

¹¹Moto mabe alukaka kaka kotomboka, kasi bakotindela ye ntoma ya motema mabe mpo na kotelemela ye.

¹²Kokutana na ngombolo oyo babotoli bana ezali malamu koleka kokutana na zoba oyo azali kati na bolema.

¹³Pasi etikaka ata moke te ndako ya moto oyo azongisaka mabe mpo na malamu.

¹⁴Kobanda koswana ezali lokola kofungola nzela ya mayi ; tika na yo liboso ete kobendana ekoma makasi.

¹⁵Moto oyo alongisaka bato mabe mpe moto oyo akweyisaka bato ya sembo bazali, bango mibale, nkele na miso ya Yawe.

¹⁶Mpo na nini mbongo ezala na maboko ya zoba ? Mpo ete asomba bwanya wana azali na posa na yango te !

¹⁷Molingami alingaka tango nyonso, mpe akomaka ndeko na tango ya pasi.

¹⁸Moto oyo azangi mayele abetaka tolo mpo na kondima baniongo ya mopaya.

¹⁹Moto oyo alingaka koswana alingaka masumu ; moto oyo atongaka ekuke na ye na likolo amilukelaka kokweya.

²⁰Moto ya motema mabe abongaka te, mpe moto ya lolemo ya lokuta akomona pasi.

²¹Kozala na mwana ya zoba esalaka pasi na motema, mpe tata ya moto ya liboma akotikala kozala na esengo te.

²²Motema ya esengo ebikisaka nzoto, kasi motema oyo etutami ebukaka mikuwa.

²³Moto mabe azwaka kanyaka na nkuku mpo na kobebisa nzela ya bosembo.

²⁴Bwanya emonanaka na elongi ya moto ya mayele, kasi miso ya zoba ekendaka kino na suka ya mokili.

²⁵Mwana oyo azangi mayele apesaka tata na ye mawa, mpe ayokisaka mama na ye pasi na motema.

²⁶Ezali malamu te kopesa moto ya sembo etumbu, mpe ezali malamu te kobeta bato ya lokumu na miso ya bosembo.

²⁷Moto oyo abatelaka monoko na ye azali na boyebi ; moto oyo alengaka-lengaka te azali mayele.

²⁸Ezala moto ya liboma, soki avandi kimia, amonanaka lokola moto ya bwanya ; moto oyo akangaka monoko na ye amonanaka lokola moto ya mayele.