Read Mokanda na Bomoi Masese 18 Bible Online

Masese 18 - Mokanda na Bomoi bible

Masese 18

¹Moyimi alukaka kaka kosepelisa baposa na ye, atelemelaka bososoli nyonso.

²Moto oyo azangi mayele asepelaka te kozwa tango ya kokanisa, kasi asepelaka kaka kotalisa makanisi ya motema na ye.

³Soki moto mabe ayei, kotiola mpe eyaka ; soki soni eyei, kofinga mpe eyaka.

⁴Maloba ya monoko ya moto ezalaka lokola mayi ya mozindo ; etima ya bwanya ezalaka lokola mayi ya ebale oyo etondi makasi.

⁵Ezali malamu te kolongisa moto mabe mpe kokweyisa moyengebene, kati na kosambisama.

⁶Bibebu ya moto oyo azangi mayele eyeisaka koswana, mpe monoko na ye eyeisaka fimbu.

⁷Monoko ya moto oyo azangi mayele ememelaka ye kufa, mpe bibebu na ye ezalaka motambo mpo na molimo na ye moko.

⁸Maloba ya moto ya songisongi ezalaka lokola bilei ya kitoko, ekitaka na esengo kino na libumu.

⁹Moto oyo azongaka sima na mosala na ye azali ndeko ya mobebisi.

¹⁰Kombo ya Yawe ezali lokola ndako molayi batonga makasi ; moyengebene akimelaka kuna mpe azwaka ebombamelo ya makasi.

¹¹Bomengo ya mozwi ezali engumba na ye, oyo batonga makasi ; akanisaka ete ezali lokola mir ya molayi.

¹²Liboso ete moto akweya, motema na ye ekomaka na lolendo ; kasi komikitisa eyaka liboso ya nkembo.

¹³Kopesa eyano liboso ya koyoka ezali liboma mpe bozoba.

¹⁴Kimia kati na motema elendisaka moto na tango ya bokono, kasi nani akokoka kolendisa motema oyo etutami ?

¹⁵Motema ya moto ya mayele ezwaka mayele, mpe litoyi ya moto ya bwanya elukaka boyebi.

¹⁶Kado efungolelaka moto oyo apesi yango nzela mpe ekotisaka ye liboso ya bato minene.

¹⁷Moto ya liboso na kosamba amonanaka lokola nde alongi ; kasi soki moto oyo azali kosamba na ye ayei, akotelemela ye.

¹⁸Zeke esilisaka koswana mpe ekataka makambo kati na bato ya makasi.

¹⁹Kokota lisusu na motema ya ndeko oyo osali mabe ezalaka pasi koleka kokota na engumba batonga makasi ; mpe koswana na moto ezali lokola kokanga bikuke ya ndako batonga makasi na bibende ya minene.

²⁰Moto atondisaka libumu na ye na nzela ya mbuma ya monoko na ye mpe akotonda na lifuti ya bibebu na ye.

²¹Kufa mpe bomoi ezali na se ya nguya ya lolemo ; moto oyo alingaka lolemo akolia mbuma na yango.

²²Mobali oyo azwi mwasi ya malamu azwi bomengo, azwi ngolu kowuta epai na Yawe.

²³Mobola alobaka na mongongo ya kobondela, kasi mozwi azongisaka eyano na lolendo.

²⁴Moto oyo azalaka na balingami ebele amitiaka na pasi, kasi ezali na molingami moko ya motema, oyo aleki ata ndeko.