Read Mokanda na Bomoi Masese 19 Bible Online

Masese 19 - Mokanda na Bomoi bible

Masese 19

¹Mobola oyo atambolaka na bosembo azali malamu koleka mokosi oyo azangi mayele.

²Ezali malamu te kobungisa mayele, kati na bolingo oyo eleka ndelo. Lokolo ya moto oyo atambolaka noki-noki ezangaka te kobeta libaku.

³Bozoba ya moto ebebisaka bomoi na ye ; mpe, na sima, akomaka kotombokela Yawe.

⁴Mozwi azalaka na baninga ebele, kasi mobola akabwanaka ata na molingami na ye ya motema.

⁵Motatoli ya lokuta akozwa etumbu ; moto oyo akosaka akozanga te kozwa etumbu.

⁶Bato mingi balukaka kosepelisa moto ya lokumu, mpe moto nyonso alukaka kozala molingami ya moto oyo asungaka bato.

⁷Soki bandeko nyonso ya mobola bayinaka ye, mpo na nini baninga na ye bakima ye te ? Ata tango azali nanu koloba, batikalaka lisusu wana te.

⁸Moto oyo alukaka kozwa bwanya alingaka bomoi na ye ; moto oyo alingaka mayele alongaka.

⁹Motatoli ya lokuta azwaka etumbu ; moto oyo akosaka akobebisama.

¹⁰Bomoi ya lokumu ebongi na zoba te ; ebongi mpe te na mowumbu kopesa mitindo na bakambi.

¹¹Bwanya ya moto ekomisaka ye motema molayi ; mpe azwaka lokumu tango atalaka pamba mabe oyo basalaka ye.

¹²Kanda ya mokonzi ezali lokola koganga ya nkosi, kasi bolamu na ye ezali lokola mamwe.

¹³Mwana ya zoba azali pasi mpo na tata na ye ; koswana ya mwasi ezali lokola linzanza ya ndako, oyo etangisaka mayi tango nyonso.

¹⁴Moto akoki kozwa bandako mpe bomengo lokola libula kowuta epai ya batata, kasi mwasi ya bwanya azali likabo kowuta na Yawe.

¹⁵Bogoyigoyi ememaka moto na pongi makasi, mpe moto ya goyigoyi akufaka nzala.

¹⁶Moto oyo atosaka mibeko abatelaka molimo na ye ; moto oyo akebaka te na etamboli na ye akokufa.

¹⁷Moto oyo asalaka bolamu epai ya mobola adefisaka Yawe, bongo Yawe akozongisela ye bolamu.

¹⁸Pesaka mwana na yo etumbu wana elikya ezali nanu, kasi kotomboka na yo ekoma te kino na posa ya koboma ye.

¹⁹Tika ete moto oyo asilikaka makasi amema mokumba ya kanda na ye ; pamba te soki obikisi ye, okotinda ye ete azongela lisusu.

²⁰Yoka toli mpe ndima mateya, mpo ete okoma moto ya bwanya.

²¹Motema ya moto ezalaka na makanisi ebele, kasi ezali mokano ya Yawe nde ekokisamaka.

²²Eloko oyo moto alingaka epai ya moninga na ye moto ezali bolingo ya solo, mpe mobola azali malamu koleka mokosi.

²³Kotosa Yawe ememaka na bomoi, esalaka ete moto azala na kimia ; boye ata mabe moko te ekokomela ye.

²⁴Moto ya goyigoyi akotisaka loboko na ye kati na bilei, kasi akokaka te kozongisa yango na monoko na ye.

²⁵Beta motioli fimbu, mpe zoba akozwa mayele ; sembola moto ya mayele, mpe akozwa boyebi.

²⁶Mwana oyo abetaka tata na ye mpe abenganaka mama na ye ayeisaka soni mpe mawa.

²⁷Mwana na ngai, soki otiki koyoka mateya, okobunga nzela ya maloba ya boyebi.

²⁸Moto oyo atiolaka bosembo azali motatoli ya zoba ; mpe monoko ya bato mabe emelaka kaka mabe.

²⁹Etumbu esalema mpo na batioli, mpe fimbu esalema mpo na bazoba.