Read Mokanda na Bomoi Masese 20 Bible Online

Masese 20 - Mokanda na Bomoi bible

Masese 20

¹Vino elobisaka bato maloba ya soni, masanga ya makasi ememaka mobulu ; moto nyonso oyo amipesaka na yango akotikala te kokoma moto ya bwanya.

²Somo oyo mokonzi apesaka ezali lokola koganga ya nkosi ; moto oyo apesaka ye kanda amilukelaka ye moko pasi.

³Koboya koswana epesaka moto lokumu, kasi moto oyo azangi mayele amipesaka na yango.

⁴Moto ya goyigoyi asalaka bilanga te likolo ya kobanga malili ; boye na tango ya kobuka mbuma, alukaka mpe kobuka, kasi akozwa eloko te.

⁵Makanisi ya motema ya moto ezalaka lokola ebale ya mozindo, moto ya mayele alukaka kotoka kati na yango.

⁶Bato ebele batatolaka bolamu na bango, kasi nani akomona moto ya sembo ?

⁷Moyengebene atambolaka na bosembo na ye ; boye sima na ye, bana na ye bakozala bato ya esengo.

⁸Soki mokonzi avandi na kiti mpo na kosambisa, miso na ye ebenganaka mabe nyonso.

⁹Nani akoki koloba : « Nabatelaka motema na ngai peto, nazali peto, nazali na masumu te ? »

¹⁰Kilo mibale mpe bimekelo mibale, nyonso ezali nkele na miso ya Yawe.

¹¹Bayebaka elenge mobali na nzela ya misala na ye, soki ezaleli na ye ezali peto mpe sembo.

¹²Ezala litoyi oyo eyokaka to liso oyo emonaka, ezali Yawe nde asalaki nyonso mibale.

¹³Kolingaka pongi te, noki te okokoma mobola ; sala ete miso na yo ezalaka ya kofungwama, mpe okozanga te bilei ya kobomba.

¹⁴Moto oyo asombaka biloko alobaka : « Biloko oyo ezali mabe ! Ezali malamu te ! » Kasi soki akei, atombolaka mapeka mpo na biloko oyo azwi.

¹⁵Wolo mpe babiju ezalaka na yango ebele, kasi bibebu oyo ebimisaka boyebi eleki na motuya.

¹⁶Kamata elamba ya moto oyo alapi ndayi mpo na niongo ya moto mosusu ; bomba yango lokola ndanga soki alapi ndayi mpo na mwasi mopaya.

¹⁷Bilei oyo ezwami na nzela ya lokuta ezalaka elengi na monoko ya moto, kasi, na sima, monoko na ye etondaka na zelo.

¹⁸Soki ozali kosala mabongisi, tunaka toli ; mpe soki olingi kobunda bitumba, zala na ekenge mpe na mayele.

¹⁹Moto ya bilobaloba abimisaka basekele ; yango wana kima bato oyo balobaka mingi.

²⁰Moto oyo alakelaka tata to mama na ye mabe, mwinda na ye ekokufa kati na molili.

²¹Bomengo oyo moto azwi noki-noki na ebandeli ekopambolama te na suka.

²²Kolobaka te : « Nakozongisa mabe na mabe oyo basali ngai ! » Kasi talela Yawe, mpe akobikisa yo.

²³Kilo oyo ekesana na kilo mosusu ezalaka nkele na miso ya Yawe, mpe emekelo kilo ya lokuta ezalaka eloko ya malamu te.

²⁴Ezali Yawe nde atambolisaka matambe ya moto ; bongo ndenge nini moto akoki kososola ye moko nzela na ye ?

²⁵Ezali motambo mpo na moto koloba na lombangu : « Eloko oyo ebulisami mpo na Yawe, » mpe kokanisa sima na ye kolapa ndayi.

²⁶Mokonzi ya bwanya abenganaka bato mabe mpe azangaka te kopesa bango etumbu.

²⁷Molimo ya moto ezali mwinda oyo Yawe apesi ye ; esosolaka bozindo nyonso ya motema ya moto.

²⁸Bolamu mpe solo ebatelaka mokonzi ; alendisaka bokonzi na ye na nzela ya bolamu.

²⁹Makasi ezali biju ya bilenge, mpe suki ya pembe ezali lokumu ya mibange.

³⁰Bapota elongolaka mabe, mpe bafimbu esukolaka bozindo ya molimo ya moto.