Read Mokanda na Bomoi Masese 21 Bible Online

Masese 21 - Mokanda na Bomoi bible

Masese 21

¹Kati na loboko na Yawe, motema ya mokonzi ezalaka lokola moluka oyo atindaka esika nyonso oyo alingi.

²Nzela nyonso ya moto emonanaka alima na miso na ye, kasi ezali Yawe nde amekaka mitema.

³Na miso na Yawe, kosala makambo ya sembo mpe ya alima ezali motuya koleka bambeka ya kotumba.

⁴Miso ya lofundu, motema ya lolendo mpe kongenga ya bato mabe ezali masumu.

⁵Mabongisi ya moto oyo asalaka mosala ememaka ye na bomengo, kasi kozala motema moto-moto ememaka na kozanga.

⁶Kozwa bomengo na nzela ya lokuta ezali kaka molinga oyo epanzanaka mpe motambo oyo ememaka na kufa.

⁷Makambo ya bato mabe ebebisaka bango moko, pamba te baboyaka kosala makambo ya sembo.

⁸Nzela ya moto mabe ezalaka na mabaku, kasi mosala ya moto ya peto ezalaka sembo.

⁹Kovanda na songe ya ndako ezali malamu koleka kovanda elongo na mwasi oyo aswanaka-swanaka.

¹⁰Molimo ya moto mabe elingaka kaka makambo mabe ; ata moninga na ye penza azwaka ngolu te na miso na ye.

¹¹Tango bapesaka motioli etumbu, zoba akomaka moto ya bwanya ; mpe tango bapesaka malako epai ya moto ya bwanya, azwaka solo boyebi.

¹²Nzambe ya sembo atalaka na bokebi makambo oyo esalemaka kati na bandako ya bato mabe, mpe akweyisaka bango kati na pasi.

¹³Soki moto akangi matoyi na ye mpo na koboya koyoka koganga ya mobola, ye mpe bakoyanola ye te tango akoganga.

¹⁴Likabo oyo bapesi na nkuku ekitisaka kanda, mpe kado oyo batie na tolo ekitisaka kanda makasi.

¹⁵Ezali esengo mpo na moyengebene kosambisa makambo na sembo, kasi yango ezali pasi makasi mpo na bato oyo basalaka mabe.

¹⁶Moto oyo abungi nzela ya bwanya akovanda kati na lisanga ya bakufi.

¹⁷Moto oyo alingaka biyenga akokoma mobola ; moto oyo alingaka masanga ya vino mpe mafuta akotikala kokoma mozwi te.

¹⁸Moto mabe azalaka lokola motuya oyo bafutaka mpo na kosikola moto ya sembo ; moto ya sembo te azalaka lokola motuya oyo bafutaka mpo na kosikola moto ya alima.

¹⁹Kovanda kati na esobe ezali malamu koleka kovanda esika moko na mwasi oyo aswanaka-swanaka mpe asilikaka-silikaka.

²⁰Bilei ya kitoko mpe mafuta ezalaka kati na ndako ya moto ya bwanya, kasi moto oyo azangi mayele abebisaka yango.

²¹Moto oyo alukaka bosembo mpe bolingo akozwa bomoi, bomengo mpe lokumu.

²²Moto ya bwanya abundisaka engumba ya bato ya makasi, mpe akweyisaka bandako ya makasi oyo bato batielaka mitema.

²³Moto oyo abatelaka monoko mpe lolemo na ye abatelaka molimo na ye na pasi.

²⁴Kombo ya moto ya lofundu mpe ya lolendo ezali : « Motioli. » Asalaka makambo na lolendo oyo eleka ndelo.

²⁵Baposa ya moto ya goyigoyi ekoboma ye, pamba te maboko na ye eboyaka kosala.

²⁶Mokolo mobimba, akufaka na ye kaka na baposa makasi ; kasi moto ya sembo apesaka na kobomba te.

²⁷Mbeka ya moto mabe ezalaka nkele ; ezalaka nkele koleka soki amemi yango na makanisi mabe.

²⁸Motatoli ya lokuta akokufa, kasi moto oyo ayokaka akoloba tango nyonso.

²⁹Moto mabe akangaka elongi na ye, kasi moto ya sembo alendisaka nzela na ye.

³⁰Liboso na Yawe, bwanya moko te, mayele moko te mpe toli moko te ekoki kolonga.

³¹Mpunda ebongisama mpo na mokolo ya bitumba, kasi elonga ewutaka na Yawe.