Read Mokanda na Bomoi Masese 23 Bible Online

Masese 23 - Mokanda na Bomoi bible

Masese 23

¹Soki ovandi mpo na kolia mesa moko elongo na mokonzi, tala malamu moto oyo azali liboso na yo.

²Tia mbeli na mongongo na yo soki ozalaka lokoso.

³Kolula te bilei na ye ya kitoko, pamba te, tango mosusu, ezali na yango bololo.

⁴Koboma nzoto te mpo na koluka kozwa bomengo, kotia mayele na yo te kati na yango.

⁵Tango okobwaka miso na ngambo ya bomengo, ekobunga, pamba te ezalaka na mapapu mpe epumbwaka na likolo makasi lokola mpongo.

⁶Kolia te bilei ya moto oyo azali kotala yo na miso mabe mpe kolula te bilei na ye ya kitoko,

⁷pamba te azalaka ndenge makanisi ya motema na ye ezali. Alobaka : « Lia mpe mela, » kasi motema na ye ezali elongo na yo te.

⁸Okosanza eteni oyo oliaki, mpe maloba na yo ya kitoko ekokende pamba.

⁹Kolobaka na zoba te, pamba te akotiola bwanya ya maloba na yo.

¹⁰Kozongisa te na sima mondelo ya kala mpe kokota te na bilanga ya bana bitike,

¹¹pamba te Molobeli na bango azalaka makasi, akozwa makambo na bango na maboko mpo na kotelemela yo.

¹²Tika ete motema na yo endimaka kotosa mibeko, mpe matoyi na yo eyokaka maloba ya boyebi !

¹³Kozangisa te kopesa mwana etumbu ; soki obeti ye fimbu, akokufa te.

¹⁴Na kobeta ye fimbu, okokangola molimo na ye na lifelo.

¹⁵Mwana na ngai, soki motema na yo ezali na bwanya, motema na ngai ekozala na esengo.

¹⁶Solo, bomoto na ngai nyonso ekotonda na esengo, soki bibebu na yo elobi makambo ya sembo.

¹⁷Tika ete motema na yo elulaka te bato ya masumu, kasi zalaka tango nyonso na posa makasi ya kotosa Yawe ;

¹⁸pamba te suka na yo ekozala solo malamu mpe elikya na yo ekozala ya pamba te.

¹⁹Mwana na ngai, yoka mpe zala na bwanya, batela motema na yo kati na nzela ya sembo.

²⁰Kozala esika moko te na balangwi masanga to na bato ya lokoso,

²¹pamba te balangwi masanga mpe bato na lokoso bakomaka babola, mpe bogoyigoyi ekolatisa bango bilamba epasuka.

²²Yokela tata oyo aboti yo, mpe kotiola mama na yo te ata soki anuni.

²³Luka bosolo, kasi koteka yango te ; sala se bongo na bwanya, na mateya mpe na mayele.

²⁴Tata ya moto ya sembo akozala na esengo mingi, mpe moto oyo abota mwana ya bwanya akosepela kati na ye.

²⁵Tika ete tata na yo mpe mama na yo basepela ! Tika ete mama oyo abota yo azala na esengo !

²⁶Mwana na ngai ya mobali, pesa ngai motema na yo, mpe tika ete miso na yo esepela na nzela na ngai !

²⁷Pamba te mwasi ya ndumba azali lokola libulu ya monene, mpe mwasi ya mopaya azali lokola libulu ya mozindo.

²⁸Mwasi ya ndumba atelemaka na ekenge lokola moyibi mpe akomisaka mibali bazoba koleka.

²⁹Mpo na nani : « Ah ngai, mawa ! » Mpo na nani : « Eh ! » Mpo na nani koswanaswana ? Mpo na nani kolelalela ? Mpo na nani kowelana ezanga tina ? Mpo na nani kotelisa miso ?

³⁰Mpo na bato oyo bawumelaka liboso ya masanga ya vino, mpo na bato oyo bamelaka masanga ya makasi.

³¹Kotalaka te masanga ya vino tango ezali motane, tango ezali kongala kati na kopo mpe kokita na pete na mongongo.

³²Na suka na yango, ekoswa yo lokola nyoka mpe ekotia yo minu lokola etupa.

³³Miso na yo ekomona biloko na ndenge ya kokamwa, mpe motema na yo ekobimisa makambo ya bozoba.

³⁴Boye, okokoma lokola moto oyo alali kati na ebale monene, mpe lokola moto oyo alali na songe ya nzete ya molayi.

³⁵Okoloba : « Babeti ngai, kasi nazali koyoka pasi te ; babeti ngai fimbu, kasi nazali koyoka eloko te ! Tango nini nakolamuka ? Nakozongela lisusu komela vino. »