Read Mokanda na Bomoi Masese 24 Bible Online

Masese 24 - Mokanda na Bomoi bible

Masese 24

¹Kolulaka te bato oyo basalaka mabe mpe kolukaka te kozala elongo na bango,

²pamba te mitema na bango ekanisaka kaka kosala mabe, mpe bibebu na bango eyeisaka kaka mobulu soki elobi.

³Ndako etongamaka na nzela ya bwanya, mpe elendisamaka na nzela ya mayele.

⁴Bashambre ekotondisama na biloko nyonso ya talo mpe ya kitoko na nzela ya boyebi.

⁵Moto ya bwanya atondi na nguya, moto oyo azalaka na boyebi alendisaka nguya na ye.

⁶Pamba te kolonga na etumba esengaka bwanya, mpe lobiko ezalaka kati na motango ebele ya bapesi toli.

⁷Bwanya ezalaka likolo mingi mpo na zoba, yango wana azalaka te na likambo ya koloba kati na mayangani oyo esalemaka pembeni ya ekuke.

⁸Moto oyo asalaka mabongisi ya kosala mabe akokende sango lokola moteki baninga.

⁹Mabongisi ya bozoba ezali masumu, mpe bato bayinaka motioli.

¹⁰Soki omilembisi na mokolo ya pasi, makasi na yo ekozala pamba.

¹¹Kangola bato oyo bazali komema bango na kufa, mpe bikisa bato oyo bazali kokende na kufa lokola bato oyo balangwe masanga.

¹²Soki olobi : « Tala, toyebaki likambo moko te kati na makambo oyo nyonso ; » boni, Ye oyo amekaka mitema asosolaka yango te ? Ye oyo abatelaka molimo na yo ayebaka yango te ? Afutaka te moto na moto kolanda misala na ye ?

¹³Mwana na ngai, lia mafuta ya nzoyi, pamba te ezalaka kitoko ! Mwa ndambo ya mafuta ya nzoyi ekozala elengi na lolemo na yo.

¹⁴Yeba lisusu ete bwanya ezali elengi mpo na molimo na yo ; soki ozwi yango, yeba ete lobi na yo ekozala malamu, mpe elikya na yo ekozala ya pamba te.

¹⁵Yo moto mabe, komeka te kotia mitambo kati na ndako ya moto ya sembo, mpe komeka te kopanza yango,

¹⁶pamba te ata soki moto ya sembo akweyi mbala sambo, akotelema kaka ; nzokande pasi ekweyisaka moto mabe.

¹⁷Soki monguna na yo akweyi, kosepela te ; mpe soki apengwi, tika ete motema na yo esepela te ;

¹⁸noki te Yawe akomona, akosepela te mpe akokitisela yo kanda na Ye.

¹⁹Kosilika te likolo ya bato oyo basalaka mabe, kolula te bato mabe ;

²⁰pamba te lobi ya malamu ekozala te mpo na moto oyo asalaka mabe, mpe mwinda ya bato mabe ekokufa.

²¹Mwana na ngai, tosaka Yawe mpe mokonzi, kosanganaka te na batomboki,

²²pamba te bango mibale bakoki kotindela batomboki pasi na pwasa. Bongo, nani ayebi pasi oyo bakoki kotinda ?

²³Makambo oyo mpe ezali toli ya bato ya bwanya : Kopona bilongi, kati na kosambisa, ezali malamu te.

²⁴Moto oyo alobaka na moto mabe : « Ozali moto ya sembo, » bato bakolakela ye mabe, mpe bikolo ekotombokela ye.

²⁵Kasi bato oyo bapamelaka moto mabe bakozala malamu mpe lipamboli ekozala likolo na bango.

²⁶Eyano ya solo ezali lokola beze ya bibebu.

²⁷Bongisa libanda ya mosala na yo, bongisa bilanga na yo, bongo na sima, tonga ndako na yo.

²⁸Kotatola na pamba te mpo na kosala moninga na yo mabe ; mpo na nini olingi kosalela bibebu na yo na lokuta ?

²⁹Kolobaka te : « Nakosala ye ndenge asali ngai, nakozongisela ye kolanda makambo oyo ye asali. »

³⁰Nalekaki pembeni ya elanga ya moto ya goyigoyi, mpe pembeni ya elanga ya vino ya moto oyo azangi mayele ;

³¹bongo, tala ndenge etondi na banzube, tala ndenge matiti mabe ezipi yango, mpe mir na yango ya mabanga ebukani.

³²Tango natiaki makanisi na ngai kati na makambo oyo namonaki, nazwaki mayele oyo :

³³mwa pongi moke, mwa kopema moke, mwa kokanga maboko moke mpo na kolala,

³⁴bobola ekoyela yo na pwasa lokola moleki nzela, mpe pasi ekoyela yo lokola moyibi.