Read Mokanda na Bomoi Masese 26 Bible Online

Masese 26 - Mokanda na Bomoi bible

Masese 26

¹Ndenge mvula ya pembe elimwaka na tango ya molunge, mpe mvula enokaka te na tango ya elanga, ndenge wana mpe lokumu oyo bapesi na zoba ekowumela na ye te.

²Ndenge ndeke ya moke oyo babengaka mwano ekendaka bipai na bipai to mbilambila[2] epumbwaka-pumbwaka, ndenge wana mpe elakeli mabe ezwaka te moto oyo asali na ye mabe te.

³Ndenge fimbu ezalaka malamu mpo na mpunda, mpe ekangiseli ezalaka malamu mpo na monoko ya ane, ndenge wana mpe fimbu ezalaka malamu mpo na mokongo ya zoba.

⁴Kozongisela zoba te kolanda bozoba na ye, noki te okokokana na ye.

⁵Zongisela zoba kolanda bozoba na ye, noki te akomimona moto ya bwanya na miso na ye moko.

⁶Moto oyo atindaka sango na nzela ya zoba azali lokola moto oyo amikati makolo mpe amilukeli makambo.

⁷Ndenge makolo ya ebosono ezalaka makasi te, ndenge wana mpe masese ezalaka na nguya te kati na monoko ya zoba.

⁸Kopesa zoba lokumu ezali lokola kotia libanga na ebambelo mabanga.

⁹Lisese kati na monoko ya zoba ezali lokola etape ya banzube kati na loboko ya moto oyo alangwe masanga.

¹⁰Moto oyo azwaka zoba to moleki nzela na mosala azali lokola soda oyo azokisaka moto nyonso na likonga.

¹¹Ndenge kaka mbwa ezongelaka kolia biloko oyo yango moko esanzi, ndenge wana mpe zoba azongelaka bozoba na ye.

¹²Eleki malamu kotia elikya na zoba, na esika ete otia elikya na moto oyo amimonaka moto ya bwanya na miso na ye moko.

¹³Moto ya goyigoyi alobaka : « Nkosi ekangi nzela ! Nyama moko ya mabe ezali na kati-kati ya balabala ! »

¹⁴Moto ya goyigoyi abalukaka na mbeto na ye ndenge ekuke ebalukaka na biloko oyo efungolaka yango.

¹⁵Moto ya goyigoyi akotisaka loboko na ye kati na bilei, kasi akokaka te kozongisa yango na monoko.

¹⁶Moto ya goyigoyi amimonaka ete azali na bwanya koleka bato sambo ya mayele.

¹⁷Moto oyo akotaka makambo oyo etali ye te azali lokola moto oyo akangi mbwa na matoyi.

¹⁸Ndenge moto ya liboma abwakaka moto, makonga mpe kufa,

¹⁹ndenge wana mpe moto oyo akosi moninga na ye alobaka : « Ezalaki kaka mpo na kosala maseki ! »

²⁰Soki bakoni ezali te, moto ekokufa ; soki bato ya songisongi bazali te, koswana ekokita.

²¹Ndenge makala engalaka na mbabola, mpe bakoni epelisaka moto, ndenge wana mpe moto oyo alinga koswana ayeisaka matata.

²²Maloba ya moto ya songisongi ezalaka lokola bilei ya kitoko, ekitaka na esengo kino na libumu.

²³Maloba ya sukali ya moto ya motema mabe ezalaka lokola palata ya mbindo oyo bapakoli na mbeki basala na mabele.

²⁴Moto oyo ayinaka moninga na ye amibombaka na maloba na ye, kasi atondi na lokuta kati na motema na ye.

²⁵Ata soki abimisi maloba ya esengo, kondimela ye te, pamba te makambo sambo ya mbindo ebombama kati na motema na ye.

²⁶Akoki solo kobomba makanisi na ye ya mabe na maloba ya lokuta, kasi motema mabe na ye ekosuka se na koyebana na miso ya bato nyonso.

²⁷Moto oyo atimolaka libulu akweyaka ye moko kati na yango ; mpe moto oyo atindikaka libanga, libanga yango ekozongela kaka ye moko.

²⁸Lolemo ya lokuta eyinaka bato oyo ezokisi, mpe maloba ya sukali ememaka libebi.