Read Mokanda na Bomoi Masese 29 Bible Online

Masese 29 - Mokanda na Bomoi bible

Masese 29

¹Moto oyo atiaka moto makasi soki bapameli ye, akokweyisama na pwasa mpe akobika te.

²Soki bato ya sembo bakomi ebele, bato basepelaka ; kasi soki bato mabe bakomi koyangela, bato balelaka.

³Moto oyo alingaka bwanya asalaka esengo ya tata na ye, kasi moto oyo alandaka basi ya ndumba akosilisa bomengo na ye nyonso.

⁴Mokonzi oyo akambaka na bosembo ayeisaka kimia na mokili na ye, kasi mokonzi oyo afutisaka mpako ebele abebisaka mokili yango.

⁵Moto oyo alobaka na moninga na ye maloba ya sukali atielaka ye motambo na se ya matambe.

⁶Lisumu ya moto mabe ezalaka na motambo, kasi moto ya sembo agangaka na esengo mpe asepelaka.

⁷Moto ya sembo ayebaka pasi ya babola, kasi moto mabe ayebaka na ye kutu yango te.

⁸Batioli batiaka mobulu kati na engumba, kasi bato ya bwanya basilisaka kanda.

⁹Soki moto ya bwanya akei kosamba elongo na moto ya liboma, ezala asiliki to aseki, akotikala kozala na kimia te.

¹⁰Bato oyo basopaka makila balingaka bato ya sembo te, kasi bato malamu balukaka bato ya sembo.

¹¹Zoba alandaka baposa nyonso ya motema na ye, kasi moto ya bwanya akangaka yango mpe akitisaka yango.

¹²Soki mokonzi akomi koyoka makambo ya lokuta, basali na ye nyonso bakokoma bato mabe.

¹³Mobola mpe monyokoli bazali na likambo moko ya lisanga : Yawe angengisaka miso ya bango mibale.

¹⁴Mokonzi oyo asambisaka babola na bosembo, kiti na ye ya bokonzi ekolendisama tango nyonso.

¹⁵Fimbu mpe pamela epesaka bwanya, kasi mwana oyo basundola ayokisaka mama na ye soni.

¹⁶Soki bato mabe bakomi ebele, mabe mpe ekomaka ebele ; kasi bato ya sembo bakomona bango kokweya.

¹⁷Pesa mwana na yo etumbu, bongo okozala na kimia mpe akotondisa motema na yo na esengo.

¹⁸Soki emoniseli ezali te, bato bakotambola ngulungulu. Esengo na moto oyo atosaka Mobeko !

¹⁹Bapamelaka mosali na maloba te ; pamba te akososola, kasi akoyoka te.

²⁰Soki omoni moto kowela koloba liboso ete akanisa, malamu kotia elikya na zoba, kasi na ye te.

²¹Moto oyo alengelaka mosali na ye wuta bolenge akosuka na kokomisa ye moto makasi.

²²Moto ya kanda amemaka koswana, mpe moto oyo atombokaka noki akomaka na mabe koleka.

²³Lolendo ya moto ekitisaka ye, kasi moto ya komikitisa azwaka lokumu.

²⁴Moto oyo akabolaka biloko elongo na moyibi amiyinaka ; ayokaka bilakeli mabe, kasi amekaka te kofunda ye.

²⁵Kobanga bato ezalaka motambo na se ya matambe, kasi Yawe abatelaka moto oyo atiaka elikya na Ye.

²⁶Bato ebele balukaka kokoma balingami ya mokonzi, nzokande ezali Yawe nde apesaka oyo ekoki na moto na moto.

²⁷Bato ya sembo bayinaka moto ya masumu, mpe moto mabe ayinaka etamboli ya bato ya sembo.