Read Mokanda na Bomoi Masese 30 Bible Online

Masese 30 - Mokanda na Bomoi bible

Masese 30

¹Tala maloba ya Aguri, mwana mobali ya Yake. Ezali ye nde alobaki yango epai ya Itieli, epai ya Itieli mpe Ukali :

²Solo, nazali zoba koleka bato nyonso, nazali ata na mayele ya bomoto te ;

³nayekolaki bwanya te, mpe nazali na boyebi ya Mosantu te.

⁴Nani amata na Lola to mpe akita wuta kuna ? Nani asangisa mopepe kati na maboko na ye ? Nani akanga mayi na kazaka na ye ? Nani akata bandelo nyonso ya mabele ? Kombo na ye nani ? Mpe kombo ya mwana na ye ezali nani ? Yebisa ngai soki oyebi !

⁵Liloba nyonso ya Nzambe ezalaka na libunga te, ezali nguba mpo na bato oyo bazwaka yango lokola ebombamelo na bango.

⁶Kobakisa eloko moko te na maloba na Ye, noki te apamela yo mpe abimisa yo mokosi.

⁷Oh Yawe, nasengi Yo biloko mibale, kopimela ngai yango te liboso ete nakufa :

⁸longola mosika na ngai makambo ya pamba mpe ya lokuta, kopesa ngai te bobola to bozwi, kasi pesa ngai kaka, mokolo na mokolo, lipa oyo ekoki na ngai,

⁹pamba te soki natondi makasi, nakoki kowangana Yo mpe koloba : « Yawe nde nani ? » To soki nazali na bobola, nakoki koyiba mpe koyokisa Kombo ya Nzambe na ngai soni.

¹⁰Kotonga mowumbu te liboso ya nkolo na ye, noki te alakela yo mabe, mpe omona pasi.

¹¹Ezali na bato oyo balakelaka batata na bango mabe mpe bapambolaka te bamama na bango.

¹²Ezali na bato oyo bamimonaka peto na miso na bango moko, nzokande bamipetoli na mbindo na bango te.

¹³Ezali na bato oyo batonda na lolendo mpe bamonaka bato mosusu pamba.

¹⁴Ezali na bato oyo minu na bango ezali lokola mipanga, lokola mbeli mpo na koboma babola kati na mokili mpe bato bakelela kati na bato.

¹⁵Sonzo ezalaka na bana basi mibale, egangaka kaka : « Pesa ! Pesa ! » Ezali na biloko misato oyo etondaka te, minei oyo elobaka te : « Ekoki ! »

¹⁶Mboka ya bakufi, libumu ya mwasi oyo abotaka te, mabele oyo etondaka mayi te, mpe moto oyo elobaka te : « Ekoki ! »

¹⁷Liso oyo etiolaka tata mpe ezanga botosi epai ya mama, ekotobolama na bayanganga ya lubwaku, mpe bana ya mpongo ekolia yango.

¹⁸Ezali na biloko misato oyo nasosolaka te, ata kutu minei oyo nayebaka te :

¹⁹Nzela ya mpongo na likolo, nzela ya nyoka na likolo ya libanga, nzela ya masuwa kati na ebale, mpe nzela ya elenge mobali epai ya elenge mwasi.

²⁰Tala ndenge mwasi ya ndumba asalaka : Soki alie, apangusaka monoko ; mpe na sima, akoloba : « Nasali na ngai mabe te ! »

²¹Ezali na makambo misato oyo eningisaka mokili, ata kutu minei oyo mokili ekokaka kondima te :

²²Mowumbu oyo akomi mokonzi, zoba oyo atondi na bomengo,

²³mwasi oyo balingaka te, kasi abali ; mpe mwasi mosali oyo azwi bomengo ya nkolo na ye ya mwasi.

²⁴Ezali na banyama mike minei na mokili, oyo, nzokande, ezalaka na bwanya mingi :

²⁵Bafurmi : ezali bikelamu oyo ezanga makasi, kasi ebongisaka bilei na yango na tango ya elanga ;

²⁶bampanya ya zamba : ezali bikelamu oyo ezanga nguya, kasi etongaka bandako na yango kati na mabanga ;

²⁷mabanki : ezalaka na mokonzi te, kasi nyonso etambolaka nzela moko na molongo ;

²⁸moselekete : loboko ekoki kokanga yango, kasi ezalaka kati na bandako ya bakonzi.

²⁹Ezali na banyama misato oyo etambolaka malamu, ata kutu minei oyo edendaka soki ezali kotambola :

³⁰Nkosi : nyama ya makasi kati na banyama, ezongaka sima te ata liboso ya nani ;

³¹soso ya mobali, ntaba mobali, mpe mokonzi oyo azali kotambola liboso ya mampinga na ye.

³²Soki osali bozoba mpo na komikumisa, mpe soki ozali na makanisi mabe, tia loboko na monoko na yo,

³³pamba te kobeta-beta mabele ebimisaka manteka, kobeta zolo ebimisaka makila, mpe kotumbola kanda eyeisaka koswana.