Read Mokanda na Bomoi Masese 31 Bible Online

Masese 31 - Mokanda na Bomoi bible

Masese 31

¹Maloba ya mokonzi Lemweli, mateya oyo mama na ye ateyaki ye :

²Eh mwana na ngai ya mobali, mwana oyo abimi na libumu na ngai, mwana mobali oyo nalapelaka ndayi :

³Kosilisa makasi na yo na basi te, komitika te na basi oyo bapengwisaka bakonzi !

⁴Eh Lemweli, ebongi te mpo na bakonzi ; te, ebongi te mpo na bato minene kotuna : « Wapi masanga ya makasi ? »

⁵Noki te soki bameli yango, bakobosana mibeko mpe bakokata na bosembo te makambo ya banyokolami.

⁶Pesa masanga ya makasi epai ya bato oyo balingi kokufa, mpe vino epai ya bato oyo bazali kotungisama na motema.

⁷Tika bango bamela mpo ete babosana pasi na bango mpe batika kokanisa lisusu minyoko na bango.

⁸Fungola monoko na yo mpo na kolobela bato oyo bazali na makoki ya koloba te, mpe mpo na kolongisa bato oyo bazanga basungi.

⁹Fungola monoko na yo mpe sambisa na bosembo, bundela babola mpe bato oyo bakelela.

¹⁰Nani akoki komona mwasi ya lokumu ? Azali na motuya koleka babiju ya talo.

¹¹Mobali na ye atielaka ye motema mpe azangaka te biloko ya motuya.

¹²Tango nyonso ya bomoi na ye, apesaka mobali na ye esengo, kasi mawa te ;

¹³alukaka bapwale ya meme mpe basinga ya lino, bongo maboko na ye etongaka yango na esengo.

¹⁴Azali lokola masuwa ya bato ya mombongo, akendaka koluka bilei na ye mosika ;

¹⁵alamukaka wana butu ezali nanu, abongisaka bilei mpo na ndako na ye mpe akabolelaka basali na ye ya basi misala.

¹⁶Soki asepeli na elanga, asombaka yango ; mpe na mbuma ya misala na ye, alonaka elanga ya vino.

¹⁷Akangaka loketo na ye makasi mpe akembisaka maboko na ye na mosala.

¹⁸Amonaka ete mombongo na ye etambolaka malamu ; mpe kino na butu, mwinda na ye ekokufa te.

¹⁹Maboko na ye esimbaka mitonga oyo batongelaka, mpe misapi na ye etongaka bilamba.

²⁰Afungolaka loboko na ye mpo na kokabela babola, mpe asembolaka yango mpo na kosunga bato bakelela.

²¹Tango mvula ya pembe ekitaka, abangaka eloko moko te mpo na ndako na ye, pamba te bato nyonso kati na ndako na ye balataka bilamba ya malili.

²²Asalaka babulangeti mpo na mbeto na ye mpe alataka bilamba na ye ya lino ya kitoko mpe ya motane.

²³Bapesaka mobali na ye lokumu, na ekuke ya engumba, tango avandaka elongo na bakambi ya mokili.

²⁴Asalaka bilamba ya lino mpe atekaka yango, asalaka mombongo ya mikaba.

²⁵Alataka lokola elamba : molende na mosala mpe lokumu ; mikolo ya lobi ebangisaka ye te, asekaka nde yango.

²⁶Alobaka na bwanya, mpe lolemo na ye epesaka malakisi na bolingo.

²⁷Azalaka na bokebi na makambo nyonso oyo elekaka na ndako na ye, mpe aliaka lipa na bogoyigoyi te.

²⁸Bana na ye bakotelema mpo na kokumisa ye, mpe tala ndenge mobali na ye mpe akumisaka ye :

²⁹« Basi ebele basalaka makambo ya lokumu ; kasi yo, oleki bango nyonso ! »

³⁰Bonzenga ya elongi ekosaka, mpe kitoko ya nzoto ezalaka pamba ; kasi mwasi oyo atosaka Yawe, ye nde abongi na lokumu.

³¹Bopesa ye bambuma ya misala na ye ! Tika ete bapesa ye lokumu, na bikuke ya engumba, mpo na misala nyonso oyo asalaka !