Read Mokanda na Bomoi Masese 4 Bible Online

Masese 4 - Mokanda na Bomoi bible

Masese 4

¹Bana na ngai, boyokaka mateya ya tata, bozalaka na bokebi mpo ete bozwa mayele.

²Pamba te nazali kopesa bino mateya ya malamu ; bobwaka mateya na ngai te.

³Ngai mpe nazalaki mwana malamu na miso ya tata na ngai, boye mama na ngai alingaki ngai makasi lokola mwana oyo abotama kaka ye moko.

⁴Tata na ngai azalaki koteya mpe koloba na ngai boye : « Tika ete motema na yo ebatela maloba na ngai, bomba mibeko na ngai mpe okozala na bomoi,

⁵zwa bwanya, zwa mayele, kobosana yango te, kopesa mokongo te na maloba ya monoko na ngai,

⁶kosundola bwanya te, mpe yango ekobatela yo, linga yango mpe ekobomba yo.

⁷Tala ebandeli ya bwanya : Zwa bwanya, pesa biloko nyonso oyo ozali na yango mpo ete ozwa mayele.

⁸Simba yango makasi, mpe ekotombola yo ; yamba yango, mpe ekopesa yo lokumu.

⁹Ekolatisa yo ekoti ya lokumu na moto, ekopesa yo motole ya nkembo. »

¹⁰Mwana na ngai, yoka mpe yamba maloba na ngai, mpe mibu ya bomoi na yo ekobakisama.

¹¹Nazali kolakisa yo nzela ya bwanya, nazali kotambolisa yo na nzela ya alima.

¹²Mpo ete makolo na yo ezala na mikakatano te tango okotambola ; mpe soki okimi mbangu, okokweya te.

¹³Tingama makasi na mateya oyo bapesi yo, kobwaka yango te, batela yango malamu mpo ete ezali bomoi na yo.

¹⁴Kokotaka te na nzela ya bato ya mobulu mpe kotambolaka te na nzela ya bato mabe.

¹⁵Longwa kati na bango, kolekela wana te, kosala mpe maseki kuna te, kasi kende na yo na nzela mosusu.

¹⁶Pamba te balalaka pongi te soki basali nanu moto mabe te, mpe pongi ekimaka bango soki babomi moto te ;

¹⁷baliaka lipa na nzela ya mabe mpe bamelaka vino na nzela ya mobulu.

¹⁸Nzokande, nzela ya bato ya sembo ezali lokola pole ya tongo makasi, oyo kongenga na yango eyaka malembe-malembe kino tango moyi ekobima makasi.

¹⁹Nzela ya bato ya mobulu ezali lokola molili, bayebaka te eloko nini ekokweyisa bango.

²⁰Mwana na ngai, zala na bokebi na maloba na ngai, pesa litoyi na yo na mateya na ngai.

²¹Tika ete ezala te mosika ya miso na yo ! Batela yango malamu kati na motema na yo,

²²pamba te ezali bomoi mpo na bato oyo bazwaka yango, mpe epesaka nzoto kolongono.

²³Batela malamu motema na yo koleka biloko nyonso, pamba te makambo nyonso oyo tosalaka, wana tozali na bomoi, ewutaka na motema.

²⁴Longola lokuta na monoko na yo, mpe longola mabe na bibebu na yo.

²⁵Tika ete miso na yo etalaka kaka liboso, mpe salaka makambo na bosembo mpe bosolo.

²⁶Bongisa nzela oyo makolo na yo ekolekela, mpe tambola kaka na nzela oyo oyebi malamu.

²⁷Kotengama te, ezala na ngambo ya loboko ya mobali to ya mwasi, longola makolo na yo na mabe.