Read Mokanda na Bomoi Masese 5 Bible Online

Masese 5 - Mokanda na Bomoi bible

Masese 5

¹Mwana na ngai, zala na bokebi na bwanya na ngai, mpe pesa litoyi na yo na mayele na ngai,

²mpo ete ozala na bososoli, mpe bibebu na yo ebomba boyebi.

³Pamba te bibebu ya mwasi ya ndumba ebimisaka mafuta ya nzoyi, mpe lolemo na ye ezali elengi lokola mafuta ;

⁴kasi na suka na nyonso, azali bololo lokola masanga ya bololo, songe lokola mopanga ya minu mibale.

⁵Makolo na ye ekokita kino na kufa, ekokende kino na mokili ya bakufi.

⁶Amitungisaka te mpo na nzela ya bomoi, alandaka nzela oyo ayebi te esika nini ekosuka.

⁷Sik’oyo mwana na ngai, yoka ngai, kopesa maloba na ngai mokongo te ;

⁸longola nzela na yo pembeni na ye mpe kopusana te liboso ya ndako na ye,

⁹noki te akoya kokaba lokumu na yo epai ya bato mosusu, mpe mibu na yo epai ya moto mabe ;

¹⁰noki te bapaya bakotonda na biloko oyo yo omoneli pasi, mpe mbuma ya mosala na yo ekokende na ndako ya mopaya ;

¹¹noki te okokoma kolelalela na suka tango nzoto na yo ekolemba mpe makasi na yo ekosila,

¹²mpe oloba : « Mpo na nini nayinaki mateya, mpe motema na ngai eboyaki koyoka toli ?

¹³Mpo na nini nayokaki te mongongo ya balakisi na ngai mpe napesaki litoyi te epai ya bato oyo bazalaki koteya ngai ?

¹⁴Etikalaki kaka moke ete nakweya na mabe ya mozindo, kati na Lingomba ya bato ya Nzambe. »

¹⁵Melaka mayi ya libulu na yo moko, oyo ezali kobima penza na libulu na yo.

¹⁶Boni, bitima na yo esopa penza mayi na libanda to miluka na yo esopa penza mayi na balabala ?

¹⁷Tika ete ezala kaka mpo na yo moko, kasi kokabola yango te na bapaya.

¹⁸Tika ete etima na yo epambolama, mpe sepela na mwasi ya bolenge na yo,

¹⁹oyo azali lokola mbuli kitoko ya mwasi, lokola mboloko ya mafuta. Tika ete tango nyonso, mabele na ye etondisaka yo na esengo, mpe bolingo na ye elangwisaka yo !

²⁰Mwana na ngai ya mobali, mpo na nini kokufela kolinga mwasi ya ndumba ? Mpo na nini kosepela kosakana na mabele ya mwasi mosusu ?

²¹Solo, nzela ya moto ezali liboso ya Yawe, mpe ayekolaka malamu makambo nyonso oyo moto asalaka.

²²Moto mabe akokangama kaka na motambo ya mabe na ye moko mpe na singa ya lisumu na ye,

²³akokufa likolo ya bozoba, mpe liboma na ye ekobungisa ye nzela.