Read Mokanda na Bomoi Masese 9 Bible Online

Masese 9 - Mokanda na Bomoi bible

Masese 9

¹Bwanya atongi ndako na ye, atelemisi yango na makonzi sambo ;

²abomi banyama na ye, akamoli masanga na ye ya vino mpe, na sima, atandi mesa.

³Atindi basali na ye ya basi mpo ete babelela wuta na basonge ya bangomba ya engumba :

⁴« Tika ete moto nyonso oyo azangi mayele aya awa ! » Atindi maloba epai ya bato oyo bazangi bososoli :

⁵« Boya kolia bilei na ngai mpe komela vino oyo nakamoli,

⁶botika nzela na bino ya bozoba mpe bokozala na bomoi, botambola na nzela ya mayele. »

⁷Moto nyonso oyo apamelaka motioli amilukelaka kosambwa, moto nyonso oyo apamelaka moto mabe amilukelaka ngambo.

⁸Kopamela motioli te, noki te akoyina yo ; kasi pamela moto ya bwanya, mpe akolinga yo.

⁹Teya moto ya bwanya, mpe akokoma lisusu na bwanya koleka ; teya moto ya sembo, mpe akobakisa lisusu boyebi na ye.

¹⁰Kotosa Yawe ezali mosisa ya bwanya ; koyeba Mosantu, yango nde kozala mayele.

¹¹Pamba te, na nzela na ngai, mikolo ya bomoi na yo ekokoma ebele, mpe mibu ya bomoi na yo ekobakisama.

¹²Soki ozali moto ya bwanya, bwanya na yo ezali mpo na litomba na yo moko ; kasi soki ozali motioli, yo moko kaka nde okomona pasi.

¹³Mwasi ya zoba azali mwasi ya makelele, ayokaka te mpe azanga mayele,

¹⁴avandaka na ekuke ya ndako na ye, atiaka kiti na ye na bisika ya likolo ya engumba,

¹⁵mpo na kobenga baleki nzela, bato oyo bazali kokende na nzela na bango.

¹⁶Tika ete moto oyo azangi mayele aya awa ! Atindi maloba epai ya bato oyo bazanga bososoli :

¹⁷« Mayi oyo bayibi ezalaka elengi, mpe lipa oyo baliaka na kobombama ezalaka kitoko. »

¹⁸Kasi bayebi te ete epai na ye nde bakufi basanganaka, mpe ete babengami na ye bazali kati na mokili ya bakufi.