Read Mokanda na Bomoi Mosakoli 10 Bible Online

Mosakoli 10 - Mokanda na Bomoi bible

Mosakoli 10

¹Ndenge nzinzi ekufa ekomisaka malasi solo mabe, ndenge wana mpe mwa bozoba ebebisaka bwanya mpe lokumu.

²Motema ya moto ya bwanya ekendaka na nzela ya malamu, kasi motema ya zoba ekendaka na nzela ya mabe.

³Ata tango zoba atambolaka na nzela, bozangi mayele na ye etalisaka na bato mosusu ete azali zoba.

⁴Soki mokonzi atombokeli yo, kolongwa na esika na yo ya mosala te ; pamba te motema ya kokita epekisaka bambeba minene.

⁵Namonaki mabe moko na se ya moyi, lokola libunga epai ya bakonzi :

⁶bazoba batombolami na bisika ya lokumu makasi, kasi bazwi batikali na bisika ya se.

⁷Namonaki bawumbu kotambola likolo ya bampunda, mpe bakonzi kotambola na makolo lokola bawumbu.

⁸Moto oyo atimoli libulu akoki kokweya kati na yango ; mpe moto oyo abuki mir ya lopango, nyoka ekoki koswa ye.

⁹Moto oyo abukaka mabanga akoki kozoka na yango, oyo apasolaka mabaya akoki mpe kozwa likama.

¹⁰Soki epasola esili minu mpe bapelisi yango te, moto oyo akosalela yango akobimisa makasi mingi ; kasi bwanya epesaka elonga.

¹¹Soki nyoka eswi moto liboso ete asakanisa yango, litomba ezali lisusu te epai ya moto oyo asakanisaka banyoka.

¹²Maloba ya moto ya bwanya epesaka esengo, kasi maloba ya zoba elukelaka ye makambo.

¹³Abandaka na maloba ya bozoba mpe asukisaka na maloba ya mabe.

¹⁴Zoba alobaka mingi. Moto moko te ayebi makambo oyo ekoya ; nani akoki koyebisa ye makambo oyo ekosalema sima na ye ?

¹⁵Mosala ya zoba elembisaka ye, ayebi ata kutu te nzela oyo ememaka na engumba.

¹⁶Mawa na mokili oyo mokonzi na yango azali mwana moke, mpe oyo bakambi na yango balangwaka masanga na tongo-tongo !

¹⁷Esengo na mokili oyo mokonzi na yango abotama na libota ya bato minene, mpe oyo bakambi na yango baliaka na tango oyo esengeli mpo na kozwa makasi, kasi mpo na kolangwa masanga te.

¹⁸Soki moto azali goyigoyi, likolo ya ndako na ye ekobukana ; soki maboko na ye elemba, ndako na ye ekotanga mayi.

¹⁹Basalaka feti mpo na kosepela, mpe masanga ya vino epesaka esengo na motema, mpe mbongo epesaka biyano na makambo nyonso.

²⁰Kolakela mokonzi mabe te, ezala kati na motema na yo ; kolakela mozwi mabe te, ezala na mbeto na yo ya kolala, pamba te ndeke ya likolo ekoki komema maloba na yo mpe kopanza sango ya maloba na yo.