Read Mokanda na Bomoi Ezayi 14 Bible Online

Ezayi 14 - Mokanda na Bomoi bible

Ezayi 14

¹Yawe akoyokela Jakobi mawa, akopona lisusu Isalaele mpe akopemisa bango na mokili na bango ; bongo bapaya bakosangana na bango mpe bakobakisama na ndako ya Jakobi.

²Bato ya bikolo bakozwa bango mpe bakomema bango kino na esika na bango. Bongo, libota ya Isalaele ekokamata bango na mokili ya Yawe lokola basali ya mibali mpe ya basi. Bakokomisa bakangami bato oyo bakangaki bango mpe bakokonza bato oyo bakonzaki bango.

³Na mokolo oyo Yawe akopesa yo bopemi na mosala na yo, na komitungisa na yo mpe na misala makasi oyo bapesaki yo,

⁴okoyemba nzembo oyo mpo na kotiola mokonzi ya Babiloni ; okoloba : « Ndenge nini monyokoli akomi na suka ? Ndenge nini penza lolendo na ye esili ?

⁵Yawe abuki fimbu ya moto mabe, lingenda ya bokonzi ya bakambi,

⁶oyo azalaki kokweyisa bato na kanda mpe kobeta bango na kolemba te, oyo azalaki kokonza bikolo na kanda makasi mpe konyokola bango na mawa te.

⁷Mikili nyonso ezwi bopemi mpe kimia, ekomi koganga na esengo.

⁸Banzete ya sipele ezali kosepela mpo na kokweya na yo, mpe banzete ya sedele ya Libani ezali koloba : ‹ Wuta tango okweyaki na se, moto moko te akweyisaka lisusu biso. ›

⁹Mokili ya bakufi, kuna na se, eningani na sango ya koya na yo, elamusi, mpo na koyamba yo, milimo ya bakufi, bato nyonso oyo bazalaki bakambi na mokili, etomboli bango, na bakiti na bango ya bokonzi, ba-oyo nyonso bazalaki bakonzi ya bikolo.

¹⁰Bango nyonso bakozwa maloba mpe bakoloba na yo : ‹ Yo mpe okomi moto ya bolembu lokola biso, okokani na biso ! ›

¹¹Lokumu na yo nyonso ekiti kino na mokili ya bakufi, elongo na makelele ya mandanda na yo. Nkusu etondi na se na yo lokola mbeto, mpe mitsopi ezipi yo lokola elamba.

¹²Ndenge nini penza okweyi wuta na likolo, oh monzoto oyo engengaka na tongo, mwana mobali ya tongo makasi ? Bakweyisi yo penza kino na mabele, yo moto oyo ozalaki kopanza bikolo !

¹³Ozalaki komilobela kati na motema : ‹ Nakomata kino na Lola, nakotombola kiti na ngai ya bokonzi kino na likolo ya minzoto ya Nzambe mpe nakovanda na ngomba epai wapi banzambe basanganaka, na suka ya mokili ya ngambo ya nor ;

¹⁴nakomata kino na likolo ya mapata, nakomikomisa lokola Ye-Oyo-Aleki-Likolo. ›

¹⁵Kasi okiti nde na mokili ya bakufi, na se penza ya libulu.

¹⁶Bato oyo bazali komona yo batie miso na bango epai na yo, bazali komituna : ‹ Boni, ezali penza ye oyo azalaki koningisa mokili mpe kolengisa bikolo ?

¹⁷Moto oyo azalaki kokomisa mokili esobe, kokweyisa bingumba na yango mpe kotika te ete bakangami na ye bazonga epai na bango ? ›

¹⁸Bakonzi nyonso ya bikolo balalaka na lokumu, moko na moko kati na kunda na ye ;

¹⁹kasi yo obwakami mosika ya kunda na yo lokola kaka eloko moko ya nkele, kati na bibembe ya bato oyo baboma, bato oyo batobola bango na mopanga, bongo bakiti kino na libulu ya mabanga lokola bibembe oyo banyata na makolo.

²⁰Okotikala kosangana na bango te kati na kunda, pamba te obebisaki mokili na yo mpe obomaki bato na yo. Bakotikala lisusu kotanga te bakombo ya bakitani ya bato mabe.

²¹Bobongisa esika mpo na koboma bana na ye ya mibali likolo ya masumu ya batata na bango ! Tika ete balamuka lisusu te mpo na kozwa mabele lokola libula mpe kotondisa mokili elongo na bingumba na bango.

²²Nakotelemela bango, » elobi Yawe, Mokonzi ya mampinga, « nakolongola kombo ya Babiloni mpe nyonso oyo ekotikala, bana mpe bakitani na yango, elobi Yawe.

²³Nakokomisa yango esika ya potopoto mpe lopango ya bampuku ; mpe nakokombola yango na nzela ya ekombelo ya libebi, » elobi Yawe, Mokonzi ya mampinga.

²⁴Yawe, Mokonzi ya mampinga, alapi ndayi : « Solo, ndenge kaka nabongisi, ndenge wana mpe ekosalema ; makambo oyo nazali na yango na makanisi, yango nde ekokokisama.

²⁵Nakobebisa mokili ya Asiri kati na mokili na Ngai, nakonyata-nyata yango na likolo ya bangomba na Ngai ; ekangiseli na bango ekolongwa epai ya bato na Ngai mpe mokumba na bango ekolongwa na mapeka na bango. »

²⁶Yango nde mokano oyo Yawe asili kozwa mpo na mokili mobimba, mpe yango nde loboko oyo asili kosembola mpo na kotelemela bikolo nyonso.

²⁷Pamba te Yawe, Mokonzi ya mampinga, asili kozwa mokano ; bongo nani akolongola yango ? Loboko na Ye esili kosembolama ; nani akozongisa yango ?

²⁸Maloba oyo eyaki na mobu oyo mokonzi Akazi akufaki :

²⁹« Bino bato nyonso ya Filisitia, bosepela te ete fimbu oyo ezalaki kobeta bino esili kobukana, pamba te etupa ebimaka na libumu ya nyoka, mpe dalagona oyo epumbwaka ebimaka na libumu ya nyoka mabe.

³⁰Ye oyo aleki mobola nde akozwa eloko ya kolia, mpe moto oyo akelela nde akolala na kimia ; kasi nakoboma bato na yo na nzala ; mpe bato oyo bakobika, bakoboma bango.

³¹Oh ekuke, lela makasi ! Engumba, ganga makasi ! Mokili mobimba ya Filisitia esili kozinda ! Milinga makasi ezali kobima na ngambo ya nor, mpe moto moko te atikali na libanda ya molongo.

³²Eyano nini tokopesa penza epai ya bamemi sango ya ekolo oyo ? Ezali ete Yawe asili kolendisa Siona mpo ete babola kati na bato na Ye basili kozwa ebombamelo ya malonga. »