Read Mokanda na Bomoi Ezayi 21 Bible Online

Ezayi 21 - Mokanda na Bomoi bible

Ezayi 21

¹Maloba na Yawe na tina na esobe ya ebale monene : Ndenge mopepe makasi elekaka na somo na Negevi, monguna moko azali koya wuta na esobe, wuta na mokili moko ya somo.

²Namonaki emoniseli moko ya somo : Moteki baninga azali koteka baninga, mobebisi azali kobebisa. Elami, bundisa bango ! Medi, zingela bango ! Nakosukisa kolela nyonso oyo ayeisaki na bato.

³Yango wana, loketo na ngai ekomi na pasi, pasi moko ya makasi penza ekangi ngai lokola mwasi oyo azali na pasi ya kobota. Makambo oyo nazali koyoka ezali kopesa ngai somo, mpe oyo nazali komona ezali kosilisa ngai mayele.

⁴Motema na ngai ezali kobeta noki-noki, nakomi kolenga na somo, mwa malili ya pokwa oyo nazelaka na esengo ekomeli ngai somo makasi.

⁵Mesa ebongisami, batandi bilamba ya mesa, bazali kolia mpe komela ! Bino bakonzi ya basoda, bopakola banguba na bino mafuta !

⁶Tala liloba oyo Nkolo alobi na ngai : « Kende, tia mokengeli ; mpe tika ete aloba makambo oyo akomona.

⁷Soki amoni shar oyo bampunda mibale ezali kobenda, basoda oyo batambolaka likolo ya bampunda, bamoko bamati likolo ya ba-ane, bamosusu bamati likolo ya bashamo, tika ete asala keba, asala keba penza ! »

⁸Boye, mokengeli agangaki lokola nkosi : « Nkolo, mokolo mobimba, natelemaka na likolo ya ndako molayi ya kokengela ; mpe butu nyonso, natikalaka kaka se wana.

⁹Tala, moto moko azali koya awa na shar, oyo bampunda mibale ezali kobenda. Azongisaki eyano : ‹ Babiloni esili kokweya, ekweyi solo ! Banzambe na yango nyonso ya bikeko elali-lali mpe epanzani na mabele ! › »

¹⁰Oh bato na ngai, babeti bino ndenge batutaka ble na libanda ! Nazali koyebisa bino makambo oyo nayokaki wuta epai na Yawe, Mokonzi ya mampinga, wuta epai ya Nzambe ya Isalaele.

¹¹Maloba na Yawe na tina na Duma[1]. Moto moko azali kobelela Ngai wuta Seiri : « Mokengeli, olobi nini mpo na butu ? Mokengeli olobi nini mpo na butu ? »

¹²Mokengeli azongisaki : Tongo elingi kotana, kasi butu mpe elingi koya. Soki bolingi kotuna mituna, botuna ; bongo bozonga mpe boya lisusu.

¹³Maloba na Yawe mpo na kotelemela Arabi : Oh bino bato ya mombongo ya Dedani, bokolala na esobe ya Arabi.

¹⁴Bopesa mayi na moto oyo azali na posa ya mayi ; bino bavandi ya mokili ya Tema, bopesa bilei na bato oyo bazali kokima bitumba.

¹⁵Pamba te bazali nde kokima mopanga, mopanga oyo babimisi na ebombelo na yango, bazali nde kokima tolotolo oyo etelemi makasi mpe bitumba ya makasi.

¹⁶Tala liloba oyo Nkolo alobaki na ngai : « Etikali kaka mobu moko, ndenge batangaka mikolo ya mowumbu, nkembo nyonso ya Kedari ekosuka.

¹⁷Bongo, ekotikala kaka mwa ndambo moke ya basoda oyo babundaka na matolotolo mpe ya basoda ya mpiko kati na Kedari, » elobi Yawe, Nzambe ya Isalaele.