Read Mokanda na Bomoi Ezayi 24 Bible Online

Ezayi 24 - Mokanda na Bomoi bible

Ezayi 24

¹Tala, Yawe akobebisa mokili mpe akokomisa yango lokola esobe ; akokotisa mobulu kati na yango mpe akopanza bato na yango.

²Ekozala mpe kaka ndenge moko mpo na Banganga-Nzambe mpe bato, mpo na nkolo mpe mowumbu na ye, mpo na nkolo ya mwasi mpe mwasi mosali na ye, mpo na moteki mpe mosombi, mpo na modefisi mpe modefi, mpo na moto oyo bakofuta ye niongo mpe mpo na moto oyo akofuta niongo.

³Mokili ekobebisama penza nye mpe bakopanza yango nyonso. Yawe nde alobaki yango.

⁴Mokili ezali na matanga mpe ekawuki, mokili mobimba ebebi mpe ekawuki ; ezala likolo mpe ebebi elongo na mokili !

⁵Bato ya mokili bakomisi yango mbindo, bazali kotosa mibeko te ; banyati-nyati bikateli mpe babuki boyokani ya seko.

⁶Mpo na yango, bilakeli mabe ezali kozikisa mokili ; bato na yango bakomema mokumba ya mabe na bango. Yango wana, bato ya mokili bazali kokufa, mpe ndambo moke kaka nde etikali.

⁷Vino ya sika ezali na matanga, elanga ya vino ekawuki ; bato nyonso oyo bamesana na esengo bakomi kolela na pasi.

⁸Esengo ya mbonda esili, makelele ya bato ya biyenga esili, esengo ya lindanda esili ;

⁹komela vino etikali lisusu na banzembo te, masanga ya makasi ekomi bololo mpo na bato oyo bamelaka yango.

¹⁰Engumba oyo ebeba etikali pamba, bikuke ya bandako nyonso ekangami.

¹¹Na babalabala, koganga na koganga ete vino ezali lisusu te, kosepela nyonso ebongwani molili, esengo nyonso elongwe na mokili.

¹²Libebi kaka nde etikali kati na engumba, babuki-buki bikuke na yango na biteni.

¹³Pamba te ekosalema kati na mokili mpe kati na bikolo ndenge esalemaka tango babukaka bambuma ya olive na nzete to tango balokotaka bambuma ya vino soki basilisi kobuka yango.

¹⁴Bamoko bakotombola mingongo na bango mpe bakoganga na esengo ; wuta na weste ya mayi monene, bakobeta milolo mpo na lokumu na Yawe.

¹⁵Yango wana, kuna na ngambo ya este, bopesa nkembo na Yawe ; bonetola Kombo ya Yawe, Nzambe ya Isalaele, kati na bisanga ya ebale monene.

¹⁶Wuta na suka ya mokili, tozali koyoka banzembo : « Nkembo epai ya Nkolo-Na-Bosembo. » Kasi nalobaki : « Nakomi na suka, nakomi na suka ! Mawa mpo na ngai ! Bazoba bateki mboka, na bozoba penza, bazoba bateki mboka ! »

¹⁷Oh bato ya mokili, somo, libulu mpe motambo ezali kozela bino.

¹⁸Moto nyonso oyo akokima na lokito ya somo akokweya na libulu, mpe oyo akoluka kobima kati na libulu akokangama na motambo. Maninisa ya likolo esili kofungwama, makonzi ya mokili ezali koningana.

¹⁹Mokili ebukani-bukani, mokili epanzani, mokili eningani makasi.

²⁰Mokili ekomi kotenga-tenga lokola moto oyo alangwe masanga, ezali koningana na mopepe lokola ndako ya matiti. Mokumba ya botomboki na ye ezali likolo na ye, esili kokweya mpe ekotelema lisusu te.

²¹Kasi na mokolo wana, Yawe akopesa etumbu na mampinga ya lola kuna na likolo, mpe na bakonzi ya mokili na se.

²²Bakosangisa bango elongo kati na libulu ndenge basangisaka bakangami na boloko, bakokangela bango na boloko mpe bakozwa etumbu sima na mikolo ebele.

²³Sanza ekokoma motane, mpe moyi ekoyoka soni, pamba te Yawe, Mokonzi ya mampinga, akokonza na ngomba Siona mpe kati na Yelusalemi, liboso ya bampaka na yango, na nkembo makasi.