Read Mokanda na Bomoi Ezayi 42 Bible Online

Ezayi 42 - Mokanda na Bomoi bible

Ezayi 42

¹Tala mosali na Ngai, oyo nasimbaka ; moponami na Ngai, oyo asalaka esengo na Ngai. Nakotia Molimo na Ngai na likolo na ye, mpe akotia bosembo kati na bikolo,

²akotombola mongongo te, akoganga te, akobelela na mongongo makasi te na babalabala ;

³akobuka te mwa nzete ya kolemba oyo egumbama mpe akoboma te moto ya singa ya mwinda oyo ekomi pene ya kokufa. Akomema bosembo na solo nyonso,

⁴akolemba te mpe akotika te kino tango akotia bosembo na mokili. Bisanga ekotia elikya na mobeko na ye.

⁵Tala liloba oyo Nzambe, Yawe, alobi, Ye oyo akelaki likolo mpe atandaki yango lokola liputa, oyo atandaki mabele mpe biloko nyonso oyo mabele ebimisaka, oyo apesaka pema na bato na yango mpe bomoi na bato oyo batambolaka likolo na yango :

⁶« Ngai Yawe, nabengaki yo na bosembo, nasimbi loboko na yo makasi, nabateli yo mpe natie yo mpo na kosala boyokani elongo na bikolo mpe kozala pole ya bikolo,

⁷mpo na kofungola miso ya bakufi miso, mpo na kobimisa bakangami na boloko mpe kobimisa bavandi ya molili, na kasho.

⁸Nazali Yawe ; yango nde Kombo na Ngai ; nakopesa nkembo na Ngai na mosusu te to lokumu na Ngai epai na banzambe ya bikeko te.

⁹Tala, makambo ya liboso esili koleka, mpe Ngai nazali kotatola makambo ya sika ; nayebisi bino yango liboso ete esalema. »

¹⁰Boyemba loyembo ya sika mpo na Yawe, bokumisa Ye wuta na basuka ya mabele, bino bato oyo botambolaka na ebale monene, mpe nyonso oyo etondisaka yango, bino bisanga mpe bavandi na yango nyonso !

¹¹Tika ete esobe mpe bingumba na yango etombola mingongo, tika ete bamboka mike epai wapi Kedari avandaka esepela ! Tika ete bato ya Sela bayemba na esengo ; tika ete baganga wuta na likolo ya bangomba !

¹²Tika ete bapesa nkembo epai na Yawe mpe batatola lokumu na Ye kati na bisanga !

¹³Yawe akobima lokola elombe, akopelisa zuwa na Ye lokola mobundi bitumba ; akoganga, solo ; akoganga makasi, mpe akolonga banguna na Ye.

¹⁴Wuta kala, navandaki nye, nakangaki monoko mpe motema na ngai ; kasi sik’oyo, lokola mwasi oyo azali na pasi ya kobota, nazali koganga, nazali kolela mpe kopema na pasi.

¹⁵Nakobebisa bangomba milayi mpe mikuse, nakokawusa banzete mpe matiti na yango nyonso, nakokomisa bibale, bisanga, mpe nakokawusa maziba ;

¹⁶nakomema bakufi miso na nzela oyo batikala nanu koyeba te, nakotambolisa bango na nzela oyo bamesana kotambola te ; nakobongola molili pole liboso na bango, mpe nakokomisa nzela ya nyoka-nyoka nzela ya alima. Tala makambo oyo nakosala, nakotika yango te.

¹⁷Kasi bato oyo batiaka elikya na banzambe ya bikeko mpe balobaka na bililingi : « Bozali banzambe na biso, » bakozonga sima mpe bakosambwa.

¹⁸Boyoka, bino bakufi matoyi ! Botala mpe bomona, bino bato bokufa miso !

¹⁹Nani azali mokufi miso soki mosali na ngai te ? Nani yango mokufi matoyi soki ntoma oyo ngai natindaki te ? Nani mokufi miso lokola molobeli na ngai ? Nani mokufi miso lokola mosali na Yawe ?

²⁰Omonaki makambo ebele, kasi ozalaki na bokebi na yango te ; matoyi na yo efungwamaki, kasi oyokaki ata eloko moko te.

²¹Esepelisaki Yawe, mpo na bosembo na Ye, kokomisa Mobeko na Ye eloko ya monene mpe ya lokumu.

²²Kasi tala bato oyo bomengo na bango, babotola yango mpe babebisa bango ; bakanga bango nyonso na mabulu mpe babomba bango kati na boloko, bakoma lokola bomengo ya bitumba, bongo moto akokangola bango azali te ; bakoma lokola mosuni, bongo moto akoloba : « Zongisa bango, » azali te.

²³Nani kati na bino akoyoka makambo yango ? Nani akozala na bokebi na makambo oyo ekoya ?

²⁴Nani akabaki Jakobi na maboko ya babebisi, mpe Isalaele na maboko ya banguna ? Boni, ezalaki Yawe te oyo liboso ya nani basalelaki masumu ? Pamba te balingaki te kolanda nzela na Ye mpe kotosa Mobeko na Ye.

²⁵Boye, asopelaki bango moto ya kanda na Ye, mobulu ya etumba makasi ; azingelaki bango na moto na bangambo nyonso, kasi basosolaki te ; mpe moto ezikisaki bango, kasi bazwaki penza likambo yango na motema te.