Read Mokanda na Bomoi Bileli 3 Bible Online

Bileli 3 - Mokanda na Bomoi bible

Bileli 3

¹Nazali moto oyo amona pasi na nzela ya fimbu ya kanda na Ye.

²Amemaki ngai mpe atambolisaki ngai kati na molili, kasi na pole te.

³Solo, mokolo mobimba, azalaki kobalola loboko na Ye mpo na kotelemela ngai tango nyonso.

⁴Abebisaki nzoto na ngai mpe poso na yango, abukaki mikuwa na ngai.

⁵Mpo na kotelemela ngai, atongaki zingazinga na ngai mir ya ngenge mpe ya pasi.

⁶Atongelaki ngai ndako ya kovanda kati na molili, lokola bato ya tango ya kala oyo bakufa.

⁷Azingelaki ngai na bamir mpo ete nakima te ; akangaki ngai na minyololo ya kilo.

⁸Ezala soki nabeleli mpo na kosenga lisungi, azali koyoka libondeli na ngai te.

⁹Akangaki nzela na ngai na mabanga minene mpe abebisaki banzela na ngai ya mike.

¹⁰Azalaki mpo na ngai lokola ngombolo oyo ebongami, lokola nkosi oyo ebombameli ngai ;

¹¹apengwisaki ngai nzela, apasolaki ngai mpe akomisaki ngai eloko ya pamba.

¹²Abendaki tolotolo na Ye mpe akomisaki ngai esika na Ye ya kobamba makonga.

¹³Atobolaki motema na ngai, na makonga oyo ewutaki na libenga na Ye.

¹⁴Nakomaki eloko ya liseki na miso ya bato na ngai nyonso ; bazalaki tango nyonso kotiola ngai na banzembo.

¹⁵Atondisaki ngai na matiti ya bololo mpe alangwisaki ngai na masanga ya bololo.

¹⁶Abukaki minu na ngai na mabanga, azindisaki ngai na putulu.

¹⁷Nazangaki kimia, nayebaki lisusu te nini yango bolamu.

¹⁸Boye nalobaki : « Lokumu mpe makambo nyonso oyo natielaki elikya na Yawe esili ! »

¹⁹Nakanisi pasi mpe minyoko na ngai, ezali lokola ngenge mpe masanga ya bololo.

²⁰Tango nyonso nakanisaka yango, motema na ngai ebukanaka.

²¹Nzokande, tala makambo oyo nakanisaka ; oyo mpo na yango, nazalaka na elikya :

²²Bolamu ya Yawe esili te, mawa na Ye ekomi nanu na suka te ;

²³ekomaka ya sika tongo nyonso. Solo, boyengebene na Yo ezali monene !

²⁴Namilobeli : « Yawe azali elikya na ngai ; yango wana nakotia motema epai na Ye. »

²⁵Yawe azali malamu mpo na bato oyo batielaka Ye elikya, mpo na bato oyo balukaka Ye !

²⁶Ezali malamu kozela na kimia lobiko kowuta na Yawe !

²⁷Ezali malamu mpo na moto komema ekangiseli na ye wana azali nanu elenge.

²⁸Tika ete avanda kimia mpe avanda ye moko, pamba te Yawe nde alingi bongo mpo na ye.

²⁹Tika ete atia elongi na ye na mabele : tango mosusu elikya ekoki kozala.

³⁰Tika ete apesa litama mpo ete babeta ye mbata, mpe tika ete atonda na soni !

³¹Pamba te Nkolo abwakaka moto te mpo na libela.

³²Ezala soki apesi etumbu, ayokaka kaka mawa mpo na bolingo monene na Ye.

³³Ezalaka na esengo te nde Yawe ayokisaka bato soni to atindelaka bato pasi.

³⁴Tango banyataka na makolo bakangami nyonso ya mokili,

³⁵tango babebisaka lokumu ya moto na miso ya Ye-Oyo-Aleki-Likolo,

³⁶tango banyokolaka moto kati na kosambisama, boni, Nkolo amonaka yango te ?

³⁷Nani akoki kaka kobimisa liloba mpo ete likambo esalema soki Nkolo apesi yango nzela te ?

³⁸Boni, ezali te wuta na monoko ya Ye-Oyo-Aleki-Likolo nde pasi mpe bolamu ekomelaka bato ?

³⁹Mpo na nini moto na bomoi amilela-lela tango bapesi ye etumbu likolo ya masumu na ye ?

⁴⁰Tokota na mozindo ya kososola banzela na biso mpe totala malamu etamboli na biso, bongo tozonga epai na Yawe ;

⁴¹totombola mitema mpe maboko na biso epai ya Nzambe oyo azali na Lola mpe toloba :

⁴²« Tosalaki masumu mpe totombokelaki Yo, yango wana olimbisaki te.

⁴³Omizipaki na kanda ndenge bamizipaka liputa, onyokolaki biso mpe obomaki na mawa te.

⁴⁴Omizipaki lipata mpo ete mabondeli edusola te.

⁴⁵Okomisaki biso lokola eloko ya nkele mpe ya tina te na miso ya bikolo.

⁴⁶Banguna na biso nyonso bafungolaki minoko mpo na kotiola biso ;

⁴⁷libula na biso ekomi : somo, mabulu, kobebisama mpe kufa. »

⁴⁸Miso na ngai ezali kosopa miluka ya mpinzoli mpo ete bato na ngai babebisami.

⁴⁹Miso na ngai ezali kobimisa mpinzoli tango nyonso mpe ezali kolemba te,

⁵⁰kino tango Yawe akotala mpe akomona wuta kuna na Lola.

⁵¹Makambo oyo miso na ngai ezali komona ezali koyokisa motema na ngai pasi likolo na bana basi nyonso ya engumba na ngai.

⁵²Bato oyo bayinaka ngai na pamba balukaki kokanga ngai lokola ndeke ;

⁵³balukaki koboma ngai kati na libulu, babwakelaki ngai mabanga ;

⁵⁴mayi etondaki kino kozipa moto na ngai mpe nakanisaki ete nakomi pene ya kokufa.

⁵⁵Nabelelaki Kombo na Yo, Yawe, wuta na mozindo ya libulu.

⁵⁶Oyokaki ngai libondeli na ngai : « Kokanga matoyi na Yo te wana nazali kobelela Yo mpo ete oyoka kolela na ngai mpe nazwa lisungi kowuta na Yo ! »

⁵⁷Tango nabelelaki Yo, opusanaki pene na ngai mpe olobaki : « Kobanga te ! »

⁵⁸Nkolo, obundelaki ngai solo, osikolaki bomoi na ngai !

⁵⁹Yawe, omonaki mabe oyo basalaki ngai : longisa ngai !

⁶⁰Omonaki solo posa na bango ya kozongisa mabe na mabe mpe mabongisi na bango ya kosala ngai mabe.

⁶¹Yawe, oyokaki mafinga na bango, mabongisi na bango ya kosala ngai mabe,

⁶²maloba ya bayini na ngai mpe makanisi na bango ya kosala ngai mabe.

⁶³Tala mpe mona bango ! Ezala bavandi to batelemi, mosala na bango : kotiola ngai na banzembo na bango.

⁶⁴Yawe, pesa bango lifuti oyo ekoki na bango kolanda misala na bango ;

⁶⁵yeisa mitema na bango makasi, kweyisela bango bilakeli mabe na Yo ;

⁶⁶nyokola bango na kanda makasi na Yo mpe bebisa bango na se ya Lola na Yo, Yawe !