Read Mokanda na Bomoi Bileli 5 Bible Online

Bileli 5 - Mokanda na Bomoi bible

Bileli 5

¹Oh Yawe, kanisa makambo oyo ekomeli biso ! Tala mpe mona soni na biso !

²Libula na biso ekeyi na maboko ya bapaya, bandako na biso ekeyi na maboko ya bato mosusu.

³Tokomi lokola bana bitike, tozangi tata ; bamama na biso bakomi lokola basi bakufisa mibali !

⁴Tosengeli kofuta mbongo ata mpo na mayi na biso ya komela to mpe mpo na bakoni na biso !

⁵Banguna na biso bazali kolanda biso, bakomi na sima ya mokongo ; bongo biso tolembi nzoto, tozangi kimia.

⁶Tokomi ata kobondela bato ya Ejipito mpe ya Asiri mpo ete bapesa biso bilei.

⁷Solo batata na biso basalaki masumu, kasi bazali lisusu te, bongo biso tokomi komema mokumba ya etumbu na bango.

⁸Bawumbu bakomi kokonza biso, mpe moto ata moko te amonani mpo na kokangola biso na maboko na bango.

⁹Tozali kozwa bilei na biso na motuya ya bomoi na biso, likolo na mopanga ya babomi kuna na esobe.

¹⁰Poso ya nzoto na biso ekomi moto lokola nde balekisi yango na mbabola, pamba te nzala ezali kotumba biso makasi.

¹¹Basambwisi basi kati na Siona, mpe bilenge basi oyo bayebi nanu nzoto ya mibali te kati na bingumba ya Yuda.

¹²Badiembiki bakalaka, na maboko na bango ; mpe bapesi bakambi lokumu te.

¹³Bilenge mibali bazali komema libanga oyo banikelaka ble ; bongo bana mike bazali kotepatepa na se ya kilo ya bakoni.

¹⁴Bakambi batika kokende na ekuke ya engumba, mpe bilenge batika kobeta mindule.

¹⁵Esengo ezalaka lisusu te kati na mitema na biso, mabina na biso ebongwana matanga.

¹⁶Mitole ekweyi wuta na mito na biso. Mawa na biso, mpo ete tosali masumu !

¹⁷Soki mitema na biso ezali komona pasi mpe soki miso na biso ekomi komona molili,

¹⁸ezali mpo ete ngomba Siona ebebisami, mpe mbwa ya zamba ekomi kovanda kuna.

¹⁹Oh Yawe, ozali Mokonzi seko na seko ; Kiti ya Bokonzi na Yo ekowumela libela na libela.

²⁰Mpo na nini obosana biso mpo na tango nyonso ? Mpo na nini osundola biso tango molayi ?

²¹Oh Yawe, zongisa biso epai na Yo ; mpe tokozonga penza ! Yeisa mikolo na biso sika ndenge ezalaki na tango ya kala !

²²Boni, osundoli biso solo mpo na libela mpe otombokeli biso na kanda eleka ndelo ?