Read Mokanda na Bomoi Mitango 33 Bible Online

Mitango 33 - Mokanda na Bomoi bible

Mitango 33

¹Tala bisika oyo bana ya Isalaele batongaki milako na bango tango bazalaki na mobembo wuta na mokili ya Ejipito. Bazalaki kotambola na molongo ya bitumba na bokambami ya Moyize mpe Aron.

²Moyize akomaki na mokanda bisika nyonso oyo bazalaki koleka na etinda ya Yawe. Tala bakombo ya moko na moko ya bisika yango :

³Bana ya Isalaele balongwaki na Ramisesi na mokolo ya zomi na mitano, na sanza ya liboso ; ezalaki mokolo oyo elandaki mokolo ya Pasika. Babimaki na matata te na miso ya bato nyonso ya Ejipito,

⁴wana bato ya Ejipito bazalaki kokunda bibembe ya bana mibali na bango ya liboso oyo Yawe abetaki mpo na kopesa etumbu na banzambe na bango.

⁵Tango balongwaki na Ramisesi, bana ya Isalaele bakendeki kotonga molako na bango na Sukoti.

⁶Kolongwa na Sukoti, bakendeki kotonga molako na bango na Etami, pene ya mondelo ya esobe.

⁷Tango balongwaki na Etami, bazongaki na ngambo ya Pi-Ayiroti oyo etalana na Bala-Tsefoni, mpe batongaki molako na bango liboso ya Migidoli.

⁸Kolongwa na Pi-Ayiroti, bakatisaki ebale monene mpe bakomaki na esobe ; batambolaki mikolo misato na esobe ya Etami mpe batongaki molako na bango, na Mara.

⁹Kolongwa na Mara, bakomaki na Elimi epai wapi bakutaki bitima zomi na mibale mpe banzete ya mbila tuku sambo ; batongaki molako na bango kuna.

¹⁰Kolongwa na Elimi, bakendeki kotonga molako na bango pene ya ebale monene ya barozo.

¹¹Kolongwa na ebale monene ya barozo, bakendeki kotonga molako na bango na esobe ya Tsini.

¹²Kolongwa na esobe ya Tsini, bakendeki kotonga molako na bango na Dofika.

¹³Kolongwa na Dofika, bakendeki kotonga molako na bango na Alushi.

¹⁴Kolongwa na Alushi, bakendeki kotonga molako na bango na Refidimi epai wapi bato bazangaki mayi ya komela.

¹⁵Kolongwa na Refidimi, bakendeki kotonga molako na bango na esobe ya Sinai.

¹⁶Kolongwa na esobe ya Sinai, bakendeki kotonga molako na bango na Kibiroti-Atava.

¹⁷Kolongwa na Kibiroti-Atava, bakendeki kotonga molako na bango na Atseroti.

¹⁸Kolongwa na Atseroti, bakendeki kotonga molako na bango na Ritima.

¹⁹Kolongwa na Ritima, bakendeki kotonga molako na bango na Rimoni-Peretsi.

²⁰Kolongwa na Rimoni-Peretsi, bakendeki kotonga molako na bango na Libina.

²¹Kolongwa na Libina, bakendeki kotonga molako na bango na Risa.

²²Kolongwa na Risa, bakendeki kotonga molako na bango na ngomba Keyelata.

²³Kolongwa na ngomba Keyelata, bakendeki kotonga molako na bango na ngomba Seferi.

²⁴Kolongwa na ngomba Seferi, bakendeki kotonga molako na bango na Arada.

²⁵Kolongwa na Arada, bakendeki kotonga molako na bango na Makeyeloti.

²⁶Kolongwa na Makeyeloti, bakendeki kotonga molako na bango na Taati.

²⁷Kolongwa na Taati, bakendeki kotonga molako na bango na Tera.

²⁸Kolongwa na Tera, bakendaki kotonga molako na bango na Mitika.

²⁹Kolongwa na Mitika, bakendaki kotonga molako na bango na Ashimona.

³⁰Kolongwa na Ashimona, bakendeki kotonga molako na bango na Moseroti.

³¹Kolongwa na Moseroti, bakendeki kotonga molako na bango na Bene-Yaakani.

³²Kolongwa na Bene-Yaakani, bakendeki kotonga molako na bango na Ori-Gidigadi.

³³Kolongwa na Ori-Gidigadi, bakendeki kotonga molako na bango na Yotibata.

³⁴Kolongwa na Yotibata, bakendeki kotonga molako na bango na Abrona.

³⁵Kolongwa na Abrona, bakendeki kotonga molako na bango na Etsioni-Geberi.

³⁶Kolongwa na Etsioni-Geberi, bakendeki kotonga molako na bango na Kadeshi, na esobe ya Tsini.

³⁷Kolongwa na Kadeshi, bakendeki kotonga molako na bango na ngomba Ori, na mondelo ya Edomi.

³⁸Ezali kuna na ngomba Ori nde, kolanda etinda ya Yawe, Nganga-Nzambe Aron amataki mpe akufaki na mokolo ya liboso ya sanza ya mitano, sima na mibu tuku minei wuta bana ya Isalaele babimaki na Ejipito.

³⁹Aron azalaki na mibu ya mbotama nkama moko na tuku mibale na misato tango akufaki likolo ya ngomba Ori.

⁴⁰Boye, mokonzi ya Aradi, moto ya mboka Kanana, oyo azalaki kovanda na Negevi ya mboka Kanana, ayokaki sango ya koya ya bana ya Isalaele.

⁴¹Tango balongwaki na ngomba Ori, bakendeki kotonga molako na bango na Tsalimona.

⁴²Kolongwa na Tsalimona, bakendeki kotonga molako na bango na Punoni.

⁴³Kolongwa na Punoni, bakendeki kotonga molako na bango na Oboti.

⁴⁴Kolongwa na Oboti, bakendeki kotonga molako na bango na Iye-Abarimi, na mondelo ya Moabi.

⁴⁵Kolongwa na Iye-Abarimi, bakendeki kotonga molako na bango na Diboni-Gadi.

⁴⁶Kolongwa na Diboni-Gadi, bakendeki kotonga molako na bango na Alimoni-Dibilatayimi.

⁴⁷Kolongwa na Alimoni-Dibilatayimi, bakendeki kotonga molako na bango na bangomba Abarimi, pembeni ya Nebo.

⁴⁸Kolongwa na bangomba Abarimi, bakendeki kotonga molako na bango na bitando ya Moabi, pembeni ya Yordani oyo etalana na Jeriko.

⁴⁹Batongaki molako na bango pembeni ya Yordani, kolongwa na Beti-Yeshimoti kino na Abele-Shitimi, na etando ya Moabi.

⁵⁰Na bitando ya Moabi, pembeni ya Yordani oyo etalana na Jeriko, Yawe alobaki na Moyize :

⁵¹« Loba na bana ya Isalaele, mpe yebisa bango : ‹ Tango bokokatisa ebale Yordani mpo na kokota na mokili ya Kanana,

⁵²bokobengana bato nyonso oyo bavandaka na mboka yango, bokosilisa kobuka banzambe nyonso ya bikeko oyo basala na mabanga, na bibende banyangwisa na moto mpe bokobebisa bisambelo na bango nyonso ya likolo ya bangomba.

⁵³Bokobotola mokili yango mpe bokokoma kovanda kuna, pamba te napesi bino mokili yango mpo ete bobotola yango.

⁵⁴Bokokabola na kobeta zeke mabele ya mokili oyo ezali libula na bino : libota oyo eleki monene ekozwa mpe eteni ya mabele oyo eleki monene ; libota ya moke, ekozwa mpe eteni ya mabele ya moke. Libota moko na moko ekozwa eteni na yango ya mabele na esika oyo zeke ekokweya. Bokokabola yango kolanda masanga ya bituka na bino.

⁵⁵Kasi soki bobengani te bavandi ya mokili yango, ba-oyo bakotikala bakokoma lokola banzube na miso na bino mpe lokola basende na mipanzi na bino. Bakomonisa bino pasi na mokili oyo bokovanda.

⁵⁶Boye, nakosala bino ndenge nakanaki kosala bango. › »