Read Mokanda na Bomoi Matayo 1 Bible Online

Matayo 1 - Mokanda na Bomoi bible

Matayo 1

¹Tala molongo ya mbotama ya Yesu-Klisto, mokitani ya Davidi mpe ya Abrayami :

²Abrayami abotaki Izaki ; Izaki abotaki Jakobi ; Jakobi abotaki Yuda mpe bandeko na ye ya mibali ;

³Yuda abotaki Peretsi mpe Zera na nzela ya Tamari, mwasi na ye ; Peretsi abotaki Etsironi ; Etsironi abotaki Arami ;

⁴Arami abotaki Aminadabi ; Aminadabi abotaki Nashoni, mpe Nashoni abotaki Salima ;

⁵Salima abotaki Boazi na nzela ya Raabi, mwasi na ye ; Boazi abotaki Obedi na nzela ya Rite, mwasi na ye ; Obedi abotaki Izayi,

⁶mpe Izayi abotaki mokonzi Davidi. Davidi abotaki Salomo na nzela ya mwasi ya Uri ;

⁷Salomo abotaki Roboami ; Roboami abotaki Abiya ; Abiya abotaki Asa ;

⁸Asa abotaki Jozafati ; Jozafati abotaki Yorami ; Yorami abotaki Oziasi ;

⁹Oziasi abotaki Yotami ; Yotami abotaki Akazi ; Akazi abotaki Ezekiasi ;

¹⁰Ezekiasi abotaki Manase ; Manase abotaki Amoni ; Amoni abotaki Joziasi ;

¹¹Joziasi abotaki Yekonia mpe bandeko na ye ya mibali wana bana ya Isalaele bakendeki na bowumbu, na Babiloni.

¹²Sima na bana ya Isalaele kokende na bowumbu, na Babiloni, Yekonia abotaki Shealitieli ; Shealitieli abotaki Zorobabeli ;

¹³Zorobabeli abotaki Abiwudi ; Abiwudi abotaki Eliakimi ; Eliakimi abotaki Azori ;

¹⁴Azori abotaki Tsadoki ; Tsadoki abotaki Akimi ; Akimi abotaki Eliwudi ;

¹⁵Eliwudi abotaki Eleazari ; Eleazari abotaki Matani ; Matani abotaki Jakobi ;

¹⁶Jakobi abotaki Jozefi, mobali ya Mari ; mpe Mari azalaki mama ya Yesu oyo babengaka Klisto.

¹⁷Kobanda na Abrayami kino na Davidi, elekaki bikeke zomi na minei ; kobanda na Davidi kino na tango oyo bana ya Isalaele bakendeki na bowumbu, na Babiloni, elekaki lisusu bikeke zomi na minei ; mpe kobanda na bowumbu, na Babiloni, kino na Klisto, elekaki lisusu bikeke zomi na minei.

¹⁸Tala ndenge nini Yesu-Klisto abotamaki : Mari, mama na Ye, azalaki mobandami ya libala na Jozefi ; kasi liboso ete bavanda ndako moko, Mari akomaki na zemi na nguya ya Molimo Mosantu.

¹⁹Jozefi, mobandami na ye ya libala, azalaki moto ya sembo. Boye, lokola Jozefi alingaki te koyokisa Mari soni na miso ya bato, azwaki mokano ya koboya Mari na kimia.

²⁰Wana Jozefi azalaki kokanisa makambo yango, anjelu na Nkolo abimelaki ye kati na ndoto mpe alobaki na ye : « Jozefi, mokitani ya Davidi, kobanga te kobala Mari ; pamba te zemi oyo azali na yango ewuti na Molimo Mosantu.

²¹Akobota mwana mobali mpe okopesa Ye kombo Yesu, pamba te akobikisa bato na Ye na masumu na bango. »

²²Makambo wana nyonso esalemaki mpo na kokokisa maloba oyo Nkolo alobaki na nzela ya mosakoli :

²³« Elenge mwasi oyo ayebi nanu nzoto ya mibali te akokoma na zemi mpe akobota mwana mobali, bongo bakopesa Ye kombo Emanwele oyo elingi koloba : Nzambe elongo na biso. »

²⁴Tango Jozefi alamukaki, asalaki makambo oyo anjelu na Nkolo atindaki ye kosala mpe azwaki Mari lokola mwasi na ye.

²⁵Kasi Jozefi asangisaki nzoto te na Mari kino tango Mari abotaki mwana mobali ; mpe Jozefi apesaki Ye kombo Yesu.