Read Mokanda na Bomoi Matayo 4 Bible Online

Matayo 4 - Mokanda na Bomoi bible

Matayo 4

¹Molimo amemaki Yesu kati na esobe mpo ete Satana ameka Ye.

²Sima na Ye kokila bilei mikolo tuku minei mpe babutu tuku minei, ayokaki nzala.

³Momeki ayaki epai na Ye mpe alobaki na Ye : — Soki ya solo ozali penza Mwana na Nzambe, loba na mabanga oyo ete ebongwana mapa.

⁴Yesu azongisaki : — Ekomama : « Moto akobika na lipa kaka te, kasi mpe na maloba nyonso oyo ebimaka na monoko ya Nzambe. »

⁵Bongo, Satana amemaki Ye na engumba ya bule, atelemisaki Ye na songe ya Tempelo

⁶mpe alobaki na Ye : — Soki ozali penza Mwana na Nzambe, mibwaka na se ; pamba te ekomama : « Akopesa mitindo na ba-anjelu na tina na yo, mpe bakomema yo na maboko na bango mpo ete lokolo na yo etutana na libanga te. »

⁷Yesu azongiselaki ye : — Ekomama mpe : « Okomeka te Yawe, Nzambe na yo. »

⁸Satana amemaki Ye lisusu na likolo ya ngomba oyo eleki molayi mpe alakisaki Ye bokonzi nyonso ya mokili elongo na lokumu na yango ;

⁹alobaki na Ye : — Nakopesa yo nyonso oyo ozali komona, soki kaka ofukameli ngai mpe ogumbameli ngai.

¹⁰Yesu alobaki na ye : — Mosika na ngai, Satana ! Pamba te ekomama : « Okogumbamelaka kaka Yawe, Nzambe na yo, mpe okosambelaka kaka Ye. »

¹¹Boye Satana atikaki Ye, mpe ba-anjelu bayaki kopesa Ye bilei.

¹²Tango Yesu ayokaki ete babwaki Yoane Mobatisi kati na boloko, azongaki na Galile.

¹³Kasi avandaki na Nazareti te ; akendeki nde kovanda na Kapernawumi oyo ezalaki pembeni ya ebale, kati na etuka ya Zabuloni mpe ya Nefitali,

¹⁴mpo na kokokisa maloba oyo mosakoli Ezayi alobaki :

¹⁵« Mokili ya Zabuloni mpe ya Nefitali, nzela ya ebale monene, pembeni ya Yordani, Galile ya bapagano,

¹⁶bato oyo bazalaki kovanda kati na molili bamoni pole makasi ; ba-oyo bazalaki kovanda kati na mokili ya bakufi, pole ebimeli bango. »

¹⁷Wuta na tango wana, Yesu abandaki koteya : « Bobongola mitema na bino, pamba te Bokonzi ya Likolo ekomi pene ! »

¹⁸Wana Yesu azalaki kotambola pembeni ya ebale ya Galile, amonaki bandeko mibali mibale : Simona oyo bazalaki kobenga Petelo, mpe Andre, ndeko na ye ; bazalaki kobwaka monyama na ebale, pamba te bazalaki balobi mbisi.

¹⁹Yesu alobaki na bango : « Bolanda Ngai, mpe nakokomisa bino balobi bato. »

²⁰Mbala moko, batikaki minyama na bango mpe balandaki Yesu.

²¹Tango alongwaki wana mpo na kokoba mobembo na Ye, amonaki lisusu bandeko mibali mibale : Jake, mwana mobali ya Zebede, mpe Yoane, ndeko na ye. Bazalaki kobongisa minyama kati na bwato na bango elongo na Zebede, tata na bango. Yesu abengaki bango ;

²²mpe, mbala moko, batikaki bwato mpe tata na bango, bongo balandaki Yesu.

²³Wana Yesu azalaki kotambola kati na Galile mobimba, azalaki koteya kati na bandako na bango ya mayangani, kosakola Sango Malamu ya Bokonzi ya Likolo, kobikisa bato na pasi mpe na bokono na bango nyonso.

²⁴Sango na Ye epanzanaki kati na Siri mobimba, mpe bato bazalaki komemela Ye babeli oyo bazalaki na bokono ya ndenge na ndenge mpe oyo bazalaki na mikakatano makasi : bato oyo bazalaki na se ya bokonzi ya milimo mabe, bato oyo bazalaki na bokono ya ndeke mpe bato oyo bazalaki na makolo mpe maboko ya kokufa ; mpe azalaki kobikisa bango.

²⁵Ebele ya bato bazalaki kolanda Ye ; bazalaki kowuta na Galile, na Dekapoli[1], na Yelusalemi, na Yuda mpe na etuka mobimba ya ngambo ya Yordani.