Read Mokanda na Bomoi Luka 1 Bible Online

Luka 1 - Mokanda na Bomoi bible

Luka 1

¹Bato mingi bamekaki kokoma makambo oyo elekaki kati na biso,

²kolanda ndenge bayebisaki biso yango na bato oyo, wuta na ebandeli, bamonaki yango na miso mpe bakomaki basali ya Liloba na Nzambe.

³Yango wana, ngai mpe, sima na ngai kotuna-tuna mpo na koluka koyeba malamu makambo nyonso, banda na ebandeli, namonaki lisusu ete ezali malamu mpo na ngai kokomela yo yango ndenge elandanaki, Teofile ya lokumu,

⁴mpo ete oyeba bosolo ya malakisi oyo ozwaki.

⁵Na tango oyo Erode azalaki mokonzi ya Yuda, ezalaki na Nganga-Nzambe moko, kombo na ye ezalaki « Zakari ; » azalaki moko kati na Banganga-Nzambe ya lisanga ya Abiya. Mwasi na ye, Elizabeti, azalaki mokitani ya Aron.

⁶Bango mibale bazalaki bato ya sembo liboso ya Nzambe, bazalaki kotosa, na ndenge esengeli, mibeko nyonso mpe mitindo nyonso ya Nkolo.

⁷Kasi bazalaki na mwana te, pamba te Elizabeti azalaki ekomba ; mpe bango mibale bakomaki mibange.

⁸Mokolo moko, wana Zakari azalaki kosala mosala na ye lokola Nganga-Nzambe, liboso ya Nzambe, pamba te ezalaki ngala ya lisanga na ye,

⁹aponamaki na zeke, kolanda momesano ya bonganga-Nzambe, mpo na kokota kati na Esika ya bule ya Nkolo mpe kotumba kuna malasi ya ansa.

¹⁰Tango ekomaki ngonga ya kotumba malasi ya ansa, lisanga mobimba ya basambeli ezalaki kosambela na libanda.

¹¹Bongo anjelu moko ya Yawe abimelaki ye ya kotelema na ngambo ya loboko ya mobali ya etumbelo ya malasi ya ansa.

¹²Tango Zakari amonaki ye, abangaki makasi, mpe somo monene ekangaki ye.

¹³Kasi anjelu alobaki na ye : — Zakari, kobanga te ! Nzambe ayoki mabondeli na yo. Mwasi na yo, Elizabeti, akobotela yo mwana mobali, mpe okopesa ye kombo « Yoane. »

¹⁴Mwana yango akosala esengo na yo, mpe okosepela na ye makasi ; mpe bato ebele bakosepela mpo na mbotama na ye,

¹⁵pamba te akozala moto monene na miso ya Nkolo. Akomela te ezala vino to masanga ya makasi, mpe akozala atonda na Molimo Mosantu wuta na libumu ya mama na ye.

¹⁶Akozongisa bato ebele ya Isalaele epai ya Nkolo, Nzambe na bango,

¹⁷mpe akotambola liboso ya Nzambe, elongo na molimo mpe nguya oyo ezalaki kovanda kati na Eliya, mpo na kozongisa boyokani kati na batata mpe bana na bango, mpo na kosala ete batomboki bakoma kokanisa lokola bato ya sembo, mpe mpo na kobongisa bato mpo na Nkolo.

¹⁸Zakari atunaki anjelu : — Ndenge nini nakoki koyeba ete ezali ya solo ? Pamba te, ngai, nazali mobange, mpe mibu ya mbotama ya mwasi na ngai esili kopusana makasi.

¹⁹Anjelu azongiselaki ye : — Nazali Gabrieli ; natelemaka liboso ya Nzambe oyo atindi ngai mpo na koyebisa yo mpe kopesa yo basango oyo ya malamu.

²⁰Lokola ondimeli maloba na ngai te, oyo ekokokisama solo na tango na yango oyo ekatama, okokoma baba mpe okokoka lisusu koloba te kino na mokolo oyo makambo yango ekokokisama.

²¹Na tango yango, bato bazalaki kozela Zakari mpe komituna mpo na nini azali kowumela tango molayi kati na Esika ya bule.

²²Tango abimaki, azalaki lisusu te na makoki ya koloba na bango ; boye basosolaki ete azwi emoniseli kati na Esika ya bule, pamba te akomaki koloba na bango na nzela ya bilembo mpe atikalaki baba.

²³Tango mikolo na ye ya mosala ekokaki, azongaki na ndako na ye.

²⁴Sima na mwa tango, mwasi na ye, Elizabeti, akomaki na zemi mpe abombamaki sanza mitano.

²⁵Azalaki komilobela : « Tala likambo oyo Nkolo asali mpo na ngai ! Na mikolo oyo, atalisi ngai ngolu na Ye mpe alongoli soni na ngai na miso ya bato. »

²⁶Sima na basanza motoba, Nzambe atindaki anjelu Gabrieli kati na engumba moko ya Galile, kombo na yango ezalaki « Nazareti. »

²⁷Atindaki ye epai ya elenge mwasi Mari oyo ayebaki nanu nzoto ya mibali te mpe azalaki mobandami ya libala na mobali moko oyo kombo na ye ezalaki Jozefi, mokitani ya Davidi.

²⁸Anjelu akotaki epai ya Mari mpe alobaki na ye : — Mbote na yo, yo oyo osili kozwa ngolu monene ! Nkolo azali elongo na yo !

²⁹Tango Mari ayokaki maloba ya anjelu, amitungisaki makasi mpe akomaki komituna soki mbote yango elakisi nini.

³⁰Kasi anjelu alobaki na ye : — Mari, kobanga te ! Pamba te Nzambe asaleli yo ngolu !

³¹Okozwa zemi, okobota mwana mobali mpe okopesa Ye kombo « Yesu. »

³²Akozala Moto monene, mpe bakobenga Ye : Mwana ya Ye-Oyo-Aleki-Likolo. Nkolo Nzambe akopesa Ye kiti ya bokonzi ya Davidi, koko na Ye.

³³Akozala Mokonzi ya libota ya Jakobi mpo na libela, mpe bokonzi na Ye ekozala na suka te.

³⁴Mari atunaki anjelu : — Ekosalema ndenge nini, pamba te nayebi nanu nzoto ya mibali te ?

³⁵Anjelu azongiselaki ye : — Molimo Mosantu akokitela yo, mpe nguya ya Ye-Oyo-Aleki-Likolo ekozipa yo na elilingi na Ye. Boye Mosantu oyo okobota akobengama Mwana na Nzambe.

³⁶Ndeko na yo ya mwasi, Elizabeti, azali mpe na zemi ; akobota mwana mobali, atako akomi mobange. Ye oyo bazalaki kobenga « ekomba » akomi sik’oyo na zemi ya sanza motoba.

³⁷Pamba te Nzambe alembanaka eloko te.

³⁸Mari azongiselaki ye : — Nazali mwasi mowumbu ya Nkolo, tika ete maloba na yo ekokisamela ngai ! Bongo anjelu akabwanaki na ye.

³⁹Sima na mwa mikolo, Mari atelemaki mpe akendeki na lombangu, na engumba moko kati na mokili ya bangomba ya Yuda.

⁴⁰Kuna, akotaki na ndako ya Zakari mpe apesaki Elizabeti mbote.

⁴¹Tango kaka Elizabeti ayokaki mbote ya Mari, mwana aninganaki kati na libumu na ye. Elizabeti atondisamaki na Molimo Mosantu

⁴²mpe agangaki na mongongo makasi : — Ozali ya kopambolama kati na basi, mpe esengo na mwana oyo azali kati na libumu na yo !

⁴³Ngai nde nani mpo ete mama ya Nkolo na ngai aya epai na ngai ?

⁴⁴Pamba te, tango kaka nayoki mbote na yo, mwana aningani na esengo kati na libumu na ngai.

⁴⁵Esengo na mwasi oyo andimaki ete Nkolo akokokisa elaka oyo apesaki ye !

⁴⁶Bongo Mari alobaki : — Molimo na ngai ezali kokumisa Nkolo,

⁴⁷mpe natondi na esengo mpo na Nzambe, Mobikisi na ngai,

⁴⁸pamba te atali kozanga lokumu ya mwasi mowumbu na Ye. Yango wana, kobanda lelo, bato ya tango nyonso bakobanda kobengaka ngai mwasi ya esengo,

⁴⁹pamba te Nzambe-Na-Nguya-Nyonso asaleli ngai makambo minene ; Kombo na Ye ezali Bule.

⁵⁰Atalisaka boboto na Ye tango nyonso epai ya bato oyo batosaka Ye.

⁵¹Asali misala minene na nguya ya loboko na Ye, apanzi bato oyo batonda na lolendo,

⁵²akitisi bakambi wuta na bakiti na bango ya bokonzi, kasi atomboli bato oyo bamikitisaka.

⁵³Atondisi na biloko ya malamu bato oyo bazalaki na nzala, mpe azongisi bazwi maboko pamba.

⁵⁴Solo, asungi Isalaele, mosali na Ye, abosani te kotalisa boboto na Ye,

⁵⁵ndenge alakaki yango epai ya bakoko na biso, epai ya Abrayami mpe epai ya bakitani na ye, mpo na tango nyonso.

⁵⁶Mari avandaki basanza pene misato elongo na Elizabeti ; sima, azongaki na ndako na ye.

⁵⁷Wana eleko oyo Elizabeti asengelaki kobota ekokaki, abotaki mwana mobali.

⁵⁸Baninga mpe bandeko ya Elizabeti bayokaki ete Nkolo asaleli ye ngolu monene, mpe basepelaki na ye elongo.

⁵⁹Na mokolo ya mwambe, sima na mbotama ya mwana, bakendeki kokatisa mwana ngenga ; balingaki kopesa ye kombo ya tata na ye, Zakari.

⁶⁰Kasi mama na ye alobaki : — Te ! Kombo na ye ezali Yoane.

⁶¹Kasi balobaki na ye : — Ezali na moto moko te, kati na libota na yo, oyo azali na kombo wana.

⁶²Bongo batunaki tata ya mwana, na nzela ya bilembo, mpo ete bayeba soki kombo nini alingaki kopesa na mwana.

⁶³Zakari asengaki mwa libaya mpe akomaki : « Kombo na ye ezali Yoane. » Mpe bango nyonso bakamwaki.

⁶⁴Mbala moko, monoko ya Zakari efungwamaki mpe lolemo na ye ekangolamaki ; akomaki lisusu koloba mpe kokumisa Nzambe.

⁶⁵Baninga na bango nyonso ya pembeni batondaki na somo mpe bazalaki kolobela makambo yango nyonso, kati na mokili ya bangomba ya Yuda.

⁶⁶Bato nyonso oyo bayokaki sango yango bazalaki kokamwa yango mpe komituna : « Yango mwana oyo akozala nani ? » Pamba te loboko ya Nkolo ezalaki elongo na ye.

⁶⁷Tata na ye, Zakari, atondisamaki na Molimo Mosantu mpe akomaki kosakola :

⁶⁸« Tika ete Nkolo, Nzambe ya Isalaele, akumisama, pamba te ayei mpe akangoli bato na Ye ;

⁶⁹abimiseli biso Mobikisi ya nguya, kati na libota ya Davidi, mosali na Ye ;

⁷⁰akokisi elaka na Ye, oyo apesa wuta kala na nzela ya basakoli na Ye ya bule,

⁷¹lobiko liboso ya banguna na biso, mpe kokangolama wuta na maboko ya bayini na biso ;

⁷²atalisi boboto na Ye epai ya bakoko na biso mpe akanisi Boyokani na Ye ya bule ;

⁷³akokiseli biso ndayi oyo alapaki epai ya Abrayami, koko na biso,

⁷⁴ete akokangola biso na maboko ya banguna na biso, mpe akopesa biso nzela ya kosalela Ye na kobanga te,

⁷⁵kati na bosantu mpe bosembo, liboso na Ye, mikolo nyonso ya bomoi na biso.

⁷⁶Bongo yo, mwana na ngai, bakobenga yo : mosakoli ya Ye-Oyo-Aleki-Likolo ; pamba te okotambola na liboso ya Nkolo mpo na kobongisela Ye nzela

⁷⁷mpe mpo na koyebisa bato na Ye ete Nzambe akobikisa bango mpe akolimbisa masumu na bango,

⁷⁸mpo na mawa mpe boboto ya Nzambe na biso, oyo na nzela na yango moyi ya tongo ekongengela biso wuta na likolo,

⁷⁹mpo na kopesa pole na bato nyonso oyo bavandi kati na molili mpe kati na elili ya kufa, mpe mpo na kotambolisa makolo na biso kati na nzela ya kimia. »

⁸⁰Mwana azalaki kokola, mpe molimo na ye ezalaki kokemba ; azalaki kovanda kati na bisobe kino na mokolo oyo ayaki komimonisa na miso ya bato ya Isalaele.