Read Mokanda na Bomoi Ba-Efeso 5 Bible Online

Ba-Efeso 5 - Mokanda na Bomoi bible

Ba-Efeso 5

¹Boye, lokola bozali bana oyo Nzambe alingaka mingi, bomekolaka Ye.

²Botambolaka na bolingo, ndenge kaka Klisto alingaki biso mpe amikabaki mpo na biso epai ya Nzambe lokola likabo mpe mbeka ya solo kitoko.

³Tika ete kindumba, lolenge nyonso ya makambo ya soni mpe lokoso etangamaka kutu te kati na bino, pamba te ebongi te mpo na basantu.

⁴Ezali mpe malamu te mpo na bino kobimisaka maloba ya bozoba, ya bosoto mpe ya maseki, kasi ebongi nde kozongisaka matondi.

⁵Pamba te, boyeba yango malamu, moto nyonso oyo asalaka kindumba, makambo ya soni to atondi na lokoso oyo ekokani na kosambela bikeko, akokota te na Bokonzi ya Klisto mpe ya Nzambe.

⁶Tika ete moko te akosa bino na maloba ezanga tina, pamba te ezali mpo na biloko ya ndenge wana nde kanda ya Nzambe ekweyelaka bato oyo batosaka Ye te.

⁷Bosanganaka te elongo na bato wana.

⁸Na kala, bozalaki molili, kasi sik’oyo bokomi pole kati na Nkolo. Boye, botambolaka lokola bana ya pole,

⁹pamba te mbuma ya pole ezali : boboto, bosembo, mpe bosolo.

¹⁰Bosalaka makasi mpo na kososola makambo oyo esepelisaka Nkolo.

¹¹Bosanganaka te na misala ya molili, oyo ebotaka mbuma te, kasi bobimisaka yango na pwasa.

¹²Pamba te makambo nyonso oyo esalemaka na nkuku ezalaka soni mpo na kolobela yango.

¹³Nzokande nyonso oyo pole ebimisaka na pwasa emonana polele,

¹⁴pamba te nyonso oyo ebimi na pwasa ekomaka pole. Yango wana baloba : « Moto na pongi, lamuka, bima kati na bakufi, mpe Klisto akongengisa yo. »

¹⁵Boye, bosalaka penza keba na ndenge na bino ya kobika ; tika ete ezala te lokola bazoba, kasi lokola bato na bwanya.

¹⁶Bosalelaka tango na bino na ndenge ya malamu, pamba te mikolo ezali mabe.

¹⁷Yango wana, bozalaka bazoba te, kasi bososolaka oyo ebengami mokano ya Nkolo.

¹⁸Bolangwaka masanga te, pamba te ememaka na mobulu ; kasi botondisamaka na Molimo,

¹⁹bolendisanaka na nzela ya banzembo ya masanzoli, banzembo ya lokumu, mpe na nzela ya banzembo oyo ewutaka na Molimo ; boyembelaka mpe bosanzolaka Nkolo wuta na mozindo ya mitema na bino ;

²⁰bozongisaka tango nyonso matondi epai ya Nzambe Tata mpo na makambo nyonso, na Kombo na Yesu-Klisto, Nkolo na biso ;

²¹mpe lokola botosaka Klisto, botosanaka bamoko na bamosusu.

²²Basi, botosaka mibali na bino ndenge botosaka Nkolo.

²³Pamba te mobali azali mokonzi ya mwasi, ndenge Klisto azali Mokonzi ya Lingomba oyo ezali nzoto na Ye, mpe Ye azali Mobikisi na yango.

²⁴Kasi lokola Lingomba etosaka Klisto, tika ete basi mpe batosaka mibali na bango na makambo nyonso.

²⁵Mibali, bolingaka basi na bino ndenge Klisto alingaki Lingomba mpe amikabaki mpo na yango

²⁶mpo na kokomisa yango bule sima na Ye kopetola yango na mayi na nzela ya Liloba na Ye,

²⁷mpe mpo na kotalisa yango epai na Ye moko lokola Lingomba etonda na nkembo, ezanga litono to likwanza to mbeba, kasi lokola Lingomba ya bule mpe ezanga pamela.

²⁸Ezali ndenge wana nde mibali basengeli kolinga basi na bango lokola banzoto na bango moko. Mobali oyo alingaka mwasi na ye amilingaka ye moko.

²⁹Pamba te moko te asila koyina nzoto na ye ; kasi aleisaka mpe abatelaka yango malamu, ndenge kaka Klisto asalaka mpo na Lingomba,

³⁰pamba te tozali biteni ya nzoto na Ye.

³¹Yango wana, mobali akotika tata na ye mpe mama na ye, mpe akosangana na mwasi na ye, bongo bango mibale bakokoma nzoto moko.

³²Ezali wana na mabombami minene, kasi ngai nazali koloba na tina na Klisto mpe Lingomba.

³³Atako bongo, mobali nyonso kati na bino asengeli kolinga mwasi na ye ndenge amilingaka, mpe mwasi nyonso asengeli kotosa mobali na ye.