Read Mokpwe Matiyò 13 Bible Online

Matiyò 13 - Mokpwe bible

Matiyò 13

¹O wòŋgò wùnyà mɛ̀nɛ̀, Yerzù à mà anjiya ò ndawò, a ɛ̀ndɛ ò rzààwà ya yùlu ya Gàlìlì rzi a lìya ò lì òkòlɛ̀.

²Kanatɛ̀ ŋgìndì ndɛnɛ e ma mò tòŋga aŋga, ò èŋgànɛ̀lɛ̀ à mà kpèeyà ò tenì ya wɔ̀lɔ̀ rzìi a lìya, aŋga ndi à mà òkòlɛ̀lɛ̀ e ŋgindi ema e mà tɛ̀mɛ̀ ò rzààwà ya yulu.

³À mà hwa òkòlɛ̀ hweyà rzayì-rzayì nà meyànà. À mà hwa kpɛ̀ɛ̀yà ŋmàna nanù ema, “Mòònèlì wà mbòtà mɔ̀kɔ à mà hwɛ lì mùŋgùlɛ̀ ihvɔ̀ŋgɔ̀.

⁴Nà òmà à mà hwɛ lì mùŋgùlɛ̀ ìhvɔ̀ŋgɔ̀ ja eni, lòŋgò ì mà unda ò njìya, hwènɔ̀nì hwe mà ji rzòmà.

⁵Lòŋgò la hvɔ̀ŋgɔ̀ i ma unda ò ŋmanyu yà èwòmà ya lìŋyàyi ema i rza òhvɛ mɔ̀nyɛ̀ mò kòki iŋgi hvɔ̀ŋgɔ̀ i ma hvùmùwà karzi-karzi èhwanja mɔ̀nyɛ̀ mò rzi kòkè aŋga.

⁶Ndi na òma igbe ja ŋginyà ì mà wurze ì mà rzɛlɛ èŋge mbòtà rzìi e ùhwà, rzìi e ŋwa, èhwanja meyaŋgà me rzi rzɔŋgɔ̀ ò tenì yà mɔ̀nyɛ̀.

⁷Lòŋgò la iŋgi hvɔ̀ŋgɔ̀ hvɛ i ma unda ndì ò tenì ya wàŋga ya hwènyɛ̀ŋgɛnyɛ̀ŋgɛ̀, rzìi hweŋge hwènyɛ̀ŋgɛnyɛ̀ŋgɛ̀ hwe òŋga, hwe lìŋgɛ̀lɛ̀ iŋgi hvɔ̀ŋgɔ̀ ema i ma kɛkɛ.

⁸Lòŋgò la iŋgi hvɔ̀ŋgɔ̀ ì mà unda ndi ò mɔ̀nyɛ̀ mò gbamù. Iŋgi hvɔ̀ŋgɔ̀ ì ma òŋga gbamù ndèŋgànɛ̀lɛ̀ i ma ŋya hvɛ rzayi. Lòŋgò la hwèrzòŋgò hwe ma òhva egbe ya hvɔ̀ŋgɔ̀, lòŋgò hvɛ i ma òhva ndi mènìmòtòhwa lòŋgò hvɛ rzàyiyàwò.”

⁹Yerzù rzìi a òhwa nanù ema, “Tɔ̀ njɛnɛ ema a òhvi màtò a hweye.”

¹⁰O mburza hvònda hwà-òkòwèlì hwa ama Yerzù hwa ma mò uŋmànɛlɛ rzìi hwa mò ijòwa ema, “Mamɛ ndeŋgatɛ ò wa ò òkòlɛ tɛ hwatò, ò gbeyàna ndi meyàna e?”

¹¹Yerzù rzìi a hwa alàhwɛ̀ nanù ema, “Lìhwiye la è wùndɛ̀ ya Lìkànèyà la ŋmanyu yà lohwà lì e ŋgbààhwi ndì inyɔ, ndi rzeketɛ ò hwahvɛhvɛ hwatò.

¹²È mɔ̀ ema a òhvi lì rzɔ̀ŋgìtɛ̀nɛ̀ ò e wùndɛ̀ ya Lìkànèyà là ama Lohwɛ̀, Lohwɛ̀ à mò ŋgbà lì rzɔ̀ŋgìtɛ̀nɛ̀ lì kòki. Ndi è mɔ̀ ema a rza òhvɛ, Lohwɛ̀ à mò wòwànà tɔ̀ è ŋmanà lì rzɔ̀ŋgìtɛ̀nɛ̀ ema a òhvì.

¹³Litiŋga ema na kpɛ̀ɛ̀yà hwatò meyàna lì hwèlì ndì nanù ema, ‘Wɔ̀ hwa ɛnɛ ndi hwa rza emba, hwa òkànèyà ndi hwa rza rzɔ̀ŋgìtɛ̀nɛ̀.’

¹⁴Ene eyà è hwèlì ndi ò lì òndìrzɛ̀ mamɛ yà arzɛ ema Lohwɛ̀ à mà òhwe lì akeyà nà è mòòhwèlì wà èlìŋgɛ̀ Àyìrzayà nanù ema, ‘Hwanu hwatò hwa ò òkànèyà nà lì òkànèyà hvɛ, ndi hwa rza ò rzɔ̀ŋgìtɛ̀nɛ̀, è ò ɔ̀ŋgɔ nà lì ɔ̀ŋgɔ hvɛ, ndi è rza ò emba tɔ̀ eyà.

¹⁵Nà òhwa ndi nanù èhwanja hwanù hwatò hwa rza tànɛyi lì òkòwa hvɛ tɔ̀ eyà. Wɔ̀ hwa umbi hvɛ matò nà mììrzɔ̀ mà awu. Hwa rza ò hweyà nà lì ɛnɛ hvɛ tɔ̀ eyà. È rzi hwɛ tɛ nanù, òma wɔ̀ hwa ɛnɛ nà lì embàneyà. Aŋga nanù òma wɔ̀ hwa hweyàna na matò ma awu ndèŋgànà òma mèèmà me awu meyɔhvɛ̀ me rzɔ̀ŋgìtɛ̀nɛ̀. Wɔ̀ hwa gbèyi tɛ nanù hwa nò timbeya òma nà mà hwa òŋgirzɛ.’

¹⁶Yerzù rzìi a ɛ̀ndɛ̀nɛ̀ e mbɔrzi ò wòrzò ò lì òhwa nanù ema, ‘Ndi inyɔ e nàmìrzɛ̀hwɛ̀ èhwanja e ɛnɛ hweyà ema e ɛnɛ ndèŋgànɛ̀lɛ̀ hvɛ e hwèya hweyà ema e hwèya.

¹⁷Nà è òhweyà nà è jɔ̀kɛ̀ ema, rzayì-rzayì ja hwà-òhwèlì hwa hwèlìŋgɛ̀ na hwahvɛhvɛ hwatò hwa Lohwà hwa ma arza ò lì ɛnɛ na ò lì hwèya mamɛ ema inyɔ e ma ɛnɛ na lì hwèya, ndi hwa rzi tanɛ.’”

¹⁸Yerzù à mà ɛndɛ ò wòrzò ò lì òkòlɛ hwà-òkòwèlì hwa eni nanù ema, “O naŋgɛ rzɔ e òkànèyà mamɛ ema mòŋgò ŋmàna mò e mòònèlì wà è mbòtà mò òhwa.

¹⁹Mòtò a hweyi tɛ ŋmɛ̀ndì mò lì hvòmɛ̀nɛ̀ lìkànèyà la ŋmanyu rzìi à rzi mò rzɔ̀ŋgìtɛ̀nɛ̀, Mòkarzɛ̀ a jà, rzìi à mò ulɛnɛ̀ è mɔ̀ ò ŋmèma mò eni. Lini lìtumba là hwatò lì gbe ndi nàa iŋgi hvɔ̀ŋgɔ̀ ema i ma unda ò njiya.

²⁰Ìhvɔ̀ŋgɔ̀ hvɛ ema jò undi ò èwòmà ya lìŋyàyi i hwèlì ndi nàa hwaŋga hwatò ema hwa hwèya ŋmɛ̀ndì mò Lohwɛ̀ lìwòkìmɛ̀nɛ̀ hwa mò wòwànà na mɔ̀nyɛ̀ŋgì.

²¹Ndi Èya ya Lohwà e rza hwa rzɔ̀ŋgɔ ò mèèmà me awu, ndèŋgànà e rza kùwà mbɔ ò mèèmà me awu. O èŋgànɛ̀lɛ̀ rzɔ mòtàkà tɔ̀ mòhvùŋgu mò hwa jɛlɛlɛ tɛ lì hvòmɛ̀nɛ̀ mòŋgò ŋmɛ̀ndì mò ama Lohwɛ̀, wɔ̀ hwa rzɔnjɛ̀lɛ̀ ŋgelì hvɔ̀kɔ.

²²Ìhvɔ̀ŋgɔ̀ hvɛ ema ì undi ò tenì ya wàŋga ya hwènyɛ̀ŋgɛnyɛ̀ŋgɛ̀, ì hwèlì ndi nàa hwatò ema hwa hweyi ŋmɛ̀ndì mò ama Lohwɛ̀, ndi mètàkà me lòŋgɛ na jɔ̀ɔ̀njì ja mònàmɛ̀ mò ene rze hwe lìŋga mèèmà me awu. Ema me ma hwa gbeyɛ ema naŋgɛ rzɔ hwa rza tànɛyi lì ŋya hwèhvùma hwe gbamù.

²³Ìhvɔ̀ŋgɔ̀ hvɛ ema jò undi ò mɔ̀nyɛ̀ mò gbamù i hwèlì ndi nàa hwatò ema hwa hwèyì ŋmɛ̀ndì mò ama Lohwɛ̀ rzìi hwa mò rzɔ̀ŋgìtɛ̀nɛ̀. Hwa gbeyà rzayi-rzayi ja hweyà hwe gbamù. Ò jɔ̀kɛ̀, wɔ̀ hwa gbèyi rzɔ ndì nàa hwèrzòŋgò ema hwe òhvi lòŋgò egbe, hwenɛyi hvɛ menì mòtòhwa na rzàyiyàwò ja hvɔ̀ŋgɔ̀.”

²⁴Yerzù à mà kpɛ̀ɛyà eŋge ŋgindi mòhvɛhvɛ ŋmàna nanù ema, “Likànèyà la ŋmanyu lì hwèlì ndi nàa mòtò ema à mà òna hvɔ̀ŋgɔ̀ ya gbamù ò mòònda.

²⁵Ndi na òma hwatò hwa arzɛ hwa ma hwɛ lì naŋga, e mɔ̀kɔ̀yèlì wa eni à mà ɛndɛ rzìi a òna hwèwùlè ò tenì ya eŋge mbòtà ya mbàrzi, rzìi a ɛ̀ndɛ e ye eni.

²⁶Nà òma iŋgi mbàrzi i ma wòteyà ò lì òŋga, aŋga ndi hwatò hwa a ɛnɛ hwèwùlè hvɛ hwe òŋga ò tenì.

²⁷Hwagbèèlì hwa eni hwa ma jà rzi hwa mò òhweyà ema, ‘Rzàŋgò, rzeke ò ma òna ndì mbòtà ya gbamù ò mòònda mò aŋgɔ̀ e? One rzɔ hwenè hwèwùlè hwe uhwɛlɛlɛ naŋgɛ e?’

²⁸Rzìi à hwa alàhwɛ̀ nanù ema, ‘È mɔ̀kɔ̀yèlì wa ami ndi à òni hwèwùlè.’ Hwaŋga hwagbèèlì hwa eni rzìi hwa mò ijòwa ema, ‘O arza ema je ɛ̀ndɛ i hwe wuŋguhwe hweŋge hwèwùlè e?’

²⁹Rzìi à hwa alàhwɛ̀ ama, ‘Jàyɛ̀. Èhwanja na òma e wuŋguwa hweŋge hwèwùlè, e tànɛyi e wuŋguhwàna hvɛ iŋgi mbàrzi.

³⁰È hwɛmɛ hwèwùlè na imbàrzi hwe òŋgɛnɛ natɛ̀ɛ e hvònda ya lì rzaŋga la e mbòtà. O eŋge hvònda na ò òhweyà hwàrzàŋgèlì hwa e mbòtà ò lì lòme lì wuŋguwa hwèwùlè, hwa hwe kake hwa hwe rzɛlɛ. O mburza hwene hwègbèèlì rzi hwa rzàŋga imbàrzi ò lì e ika ò tùu ya ami ya lùùtà.’”

³¹Yerzù à mà kpɛ̀ɛ̀yà eŋge ŋgindi mòhvɛhvɛ ŋmàna nanù ema, “Likànèyà là ŋmanyu lì hwèlì ndi nàa ŋmanà hvɔ̀ŋgɔ̀, ema mòtò a wòwi rzi a òni ò mòònda mò eni.

³²Tɔ̀ nɛ eŋge hvɔ̀ŋgɔ̀ e tu lì aka ìhvɔ̀ŋgɔ̀ ja arzɛ ndi e òŋgi tɛ e òlòhwa lì aka hwàànà hwa mayi hwa arzɛ. È ò jà gbèe ema hwènɔ̀nì hwe ŋmanyu hwe jà lì òŋga mùùmbù ma awu ò hwèkɔ̀kɔ̀ hwe eni.”

³³Yerzù rzìi a hwa kpɛ̀ɛyà hvɛ mònò ŋmàna nanù ema, “Lìkànèyà la ŋmanyu lì gbèyi ndi nàa èhwindi ema mòlanà a hvuŋguwani mèyɔnjɔ me hvìlawà meyawò natɛ̀ɛ me ita ò lì gbèyanɛhwɛ.”

³⁴Yerzù à mà hwɛ ndì lì gbeyàna meyàna ò lì òkòlɛ hwatò. O rzìi hwɛ tɔ̀ eyà tɔ̀ yɔ̀kɔ ema à mà hwa òkòlɛ e rzi hwɛ lì hwa kpɛ̀ɛyà ŋmàna.

³⁵A ma gbeyà ene ò lì òndìrzɛ̀ mamɛ e Mòòhwèlì wà èlìŋgɛ̀ à mà òhwe nanù ema, “Nà ò gbeyàna ndi meyàna ò lì òhwìrzɛ̀nɛ̀ hwatò na ò hwa wuluweya hweyà ema hwe utami lì wòteya hwèwèkelì hwe e rze.”

³⁶Yerzù rzìi a hwɛmɛ eŋge ŋgìndì rzìi a kpèeyà ò tenì ya ndawò. Hwà-òkòwèlì hwa eni hwa mò jèeyà rzìi hwa mò òhweyà nanù ema, “O jò telɛlɛ jànda ja mònò ŋmàna mò hwèwùlè ò mbòtà.”

³⁷Yerzù a hwa alàhwɛ̀ nanù ema, “È mɔ̀ ema à mà òna ihvɔ̀ŋgɔ̀ ja gbamù a hwèlì ndi è Ŋmanà wà è Mòtò wà Hwènàmà,

³⁸e hvaya e hwèlì ndi e rze ya arzɛ, i hvɔ̀ŋgɔ̀ ja gbamù i hwèlì ndi hwatò ema hwa hwèlì ò rze ya lìkànèyà la ama Lohwɛ̀, hwèwùlè hvɛ hwe hwèlì ndi hwaŋga hwatò ema hwa hwèlì na mòkarzɛ̀.

³⁹È mɔ̀kɔ̀yèlì ema à mà òna iŋgi hvɔ̀ŋgɔ̀ ja wòhwe a hwèlì ndi Mòkarzɛ̀. Li rzàŋga hvɛ lì hwèlì ndi lìrzukù la hvònda ndèŋgànà hwàrzàŋgèlì hwa hwèlì ndi i aŋgèlì ja ama Lohwɛ̀.

⁴⁰Nà òma hwèwùlè hwe rzàŋgahwa lì rzɛlɛhwɛ ò mùnya nanù hvɛ mɛnɛ ndi hwatò hwa ama mòkarzɛ̀ hwa ò rzàŋgahwɛ na lì aŋgbahwa ò mùnya ò lìrzukù la hvònda.

⁴¹È Ŋmanà wà è Mòtò wà Hwènàmà a ò òma i aŋgèlì je eni, ò lì ulɛ hwatò ema hwa gbeyà hwahvɛhvɛ ò lì gbeyà wòhwe, na hwanɛ̀yi hwatò hwa arzɛ hvɛ ema hwa gbeyà wòhwe.

⁴²Rzìi hwa ò hwa hvimba ò mùnya mò mànyakà ema mò rza lìma. Aŋga ndi wɔ̀ hwa ò eyɛ̀ɛ̀ na lì kɔ̀kɔ̀ mehvehve me awu.

⁴³Rzìi hwatò ema hwa tɛmi ehve-ehve na Lohwɛ̀, hwa ò hvànya ndi nàa igbe ò lìkànèyà la ama Tatɛ̀ wa awu. È òkànèyà, tɔ̀ njɛnɛ ema a òhvi matò inyɛ a hweye.”

⁴⁴Yerzù a kpɛ̀ mòhvɛhvɛ ŋmàna nanù ema, “Lìkànèyà la ŋmanyu lì hwèlì ndi nàa lùùtà ema lì utami ò wàŋga. Ema mòtò à mà ahvùlùhwɛ, ò mɔ̀nyɛ̀ rzìi a timba hvɛ lì li wanda, ò mɔ̀nyɛ̀ŋgì mò eni a ɛndɛ lì àhwirzɛ̀ mamɛ ya arzɛ ema à mà hwɛnɛ rzi anda eŋge wàŋga.”

⁴⁵“Lìkànèyà la ŋmanyu lì hwèlì ndi nàa e mòtò wa nyòŋga ema a arza mànyayi ma wòlìtò.

⁴⁶Nà òma à mà ɛnɛ lìŋyàyi lɔ̀kɔ la wòlìtò ema lì ma ikawa ò nyòŋga, à mà ɛndɛ rzi a àhwirzɛ̀ hwèèmà hwe eni hwe arzɛ ema à mà hwɛnɛ rzìi a anda lìŋgi lìŋyàyi.”

⁴⁷Yerzù à mà kpɛ mòhvɛhvɛ ŋmàna nanù ema, “Lìkànèyà la ŋmanyu lì hwèlì ndi nàa e mbunja ema hwatò hwa mòrzòmbò hwa kòma ò malìhwa rzìi e lɛ̀mbɛ i nyayi ja nyàmà ja arzɛ.

⁴⁸È mbunja e ma ònda, hwatò hwa mòrzòmbò hwa e rzìima ò mòkòkò, rzìi hwa lìya ò rze lì hvɔ̀rzɔ̀ iŋgi nyàmà. È jɔ ja gbamù ji ikahwa ò mòlòŋgà mò awu, rzìi e jɔ ja wòhwe i hvimbahwa.

⁴⁹Nànù ndi e ò hwɛ̀ɛ ò lìrzukù la hvònda. Lohwɛ̀ a ò òma i aŋgèlì ja eni ò lì ɛ̀ndɛ lì kakòhwa hwaŋga hwatò hwa wòhwe ò ìtììtènì ja hwatò hwa gbamù.

⁵⁰Rzìi hwà hwa aŋgba ò mùnya mò mànyakà ema mò rza lìma. Aŋga ndi wɔ̀ hwa ò eyɛ̀ɛ̀ na lì kɔ̀kɔ̀ mehvehve me awu.”

⁵¹Yerzù rzìi a ijòwa hwà-òkòwèlì hwa eni nanù ema, “Inyɔ e ma rzɔ̀ŋgìtɛ̀nɛ̀ hwenè hwèyòkòwèlì hwe arzɛ e?” Wɔ̀ rzìi hwa mò alàhwɛ̀ hwa ama “Ɛ̀ɛ.”

⁵²O èŋgànɛ̀lɛ̀ à mà hwa timbirzɛlɛlɛ ama, “Mòòkòlèlì hwa mbenda ema à mà jɛ̀ɛ̀ ò lì hwɛ mòòkòwèlì wa lìkànèyà la ama Lohwɛ̀, a hwèlì ndi nàa e mòhwɛnɛ wa ndawò ema a ulɛ hwema hwehvènya na e hwe mbòlòwa ò tùu ya eni ya lùùtà.”

⁵³Nà òma Yerzù à mà kulɛ hwèyòkòlèlì na meyàna, à mà hwɛmɛ eŋge ekì,

⁵⁴rzi a timba ò lì ɛndɛ ò mbòwa ya eni. A wòteyà lì òkòlɛ hwatò ò ndawò ya màkànɛ. Ndèŋgànà hwaŋga hvɛ ema hwa ma mò òkànèyà hwa ma tàmà. Rzi hwa wòteyà ò lì ijòwa nanù ema, “One mɔ̀ à lu lìni lìhwiyè e? O nɛ mɔ̀ à gbèeyà hwene hweyà hwe arzɛ hwe mànyakà e?”

⁵⁵“Rzeke mɔ̀ à hwèlì ndì e ŋmanà wa ama e kaminda e? Rzeke Màlìyɛ̀ ndì a hwèlì e nyàŋgò ya eni e? Rzeke Jèmìrzì, Jòrzɛ̀hvù, Rzimɔ̀ni na Jùdàrzì hwa hwèlì ndì wònyànyàŋgò hwa enì e?

⁵⁶Rzeke i ndòmɛ ja eni ja arzɛ i lìya ndi ànu e? One mɔ̀ à uwani hwene hweyà hwe arzɛ e?”

⁵⁷O èŋgànɛ̀lɛ̀ rzɔ hwa ma mò rzɔ̀rzɔ̀. Yerzù rzìi a hwa òhweyà nanù ema, “Mòòhwèlì wà èlìŋgɛ̀ a ŋgbààhwà èluhwe tɔ̀ ima ekì ndi rzeketɛ ò mbòwà yà èni, na lìtùmba la eni.”

⁵⁸Ehwanja wɔ̀ hwa rzi hwɛnɛ lì lòkɛ̀, ò èŋgànɛ̀lɛ̀ mɔ̀ à rzi gbèèye rzayi-rzayi ja hweyà hwe mànyakà aŋga.